ހަސަތޭކަ އަކަފޫޓު ހަމަނުވާ ގޯތިތައްވެސް ރަޖިސްޓްރީ ކުރެވޭނެގޮތަށް ރައްޔިތުންގެ މަޖިލީހުން ފާސްކުރެއްވި އިސްލާހުގެ ބިލް ރައީސުލްޖުމްހޫރިއްޔާ މިއަދު ތަސްދީގުކުރައްވައިފިއެވެ.މި ބިލު ތަޞްދީޤް ކުރެއްވުމާ ގުޅިގެން، މިއަދު ވަނީ ދިވެހި ސަރުކާރުގެ ގެޒެޓްގައި ޝާއިޢު ކުރައްވާފައެވެ.ރައީސުލްޖުމްހޫރިއްޔާ މިއަދު ތަސްދީގުކުރެއްވި ބިލުގައި ބުނެފައިވަނީ، ބަންޑާރަ ގޯއްޗެއް ދޫކުރެވިފައިވާ މީހަކު މަރުވެއްޖެނަމަ އެގޯއްޗެއްގައިވާ އިމާރާތާއި ނުއުފުލޭ މުދާ، ތަރިކައިގެ އުސޫލުން ލިބޭ ބައެއްގެ މެދުގައި އެގޯއްޗެއް ވަކި ގޯތިތަކަކަށް ބައިކޮށް ވަކިކޮށްދެވިދާނެކަމަށެވެ. އަދި ތަރިކައިގެ އުސޫލުން އެތަނެއް ލިބޭ އެންމެންގެ ނަމުގައި އެބަޔަކު އެދޭނަމަ އެގޯއްޗެއް ރަޖިސްޓްރީކޮށް ރަޖިސްޓްރީ ހަދައިދޭންވާނެކަމަށެވެ.މިއިސްލާހު ހުށައެޅުމުގެ މަޤްޞަދެއްކަމުގައި ބުނެފައިވަނީ، ތިންމީހުންނަށް ނުވަތަ ހަތަރު މީހުންނަށް ލިބޭ ބިންކޮޅު ނުވަތަ ގޯތި ހަސަތޭކަ އަކަފޫޓަށް ވުރެ ކުޑަނަމަ އެމީހުންނަށް ރަޖިސްޓްރި ނުލިބޭތީ ލޯނު ނަގަން ބޭނުންވެއްޖެ ހިނދެއްގައި ލޯނު ނެގުމަށާއ،ި ރަހުނު ކުރުން ފަދަ މުއާމަލާތްކުރުމަށް ދަތިވާތީކަމަށެވެ.މީގެއިތުރުން ޖިނާއީ ކުށެއްގެ ހުކުމް ތަންފީޒު ކުރާ މީހެއްގެ އަދަބުގެ ބާވަތް ބަދަލުކުރުމުގެ ބާރު ރައީސުލްޖުމްހޫރިއްޔާއަށް ލިބިދޭ ގޮތަށް ރައްޔިތުންގެ މަޖިލީހުން ފާސްކުރެއްވި އިސްލާހު ތަސްދީގުނުކުރައްވާ އަލުން މަޖިލީހުން ވިސްނާވަޑައިގަތުމަށް އެދިވަޑައިގެން، މިބިލު އަނބުރާ ރައްޔިތުންގެ މަޖިލީހަށް މިއަދު ވަނީ ފޮނުއްވާފައެވެ.މި ބިލާ ގުޅޭގޮތުން ރައީސުލްޖުމްހޫރިއްޔާ، ރައްޔިތުންގެ މަޖިލީހުގެ ރައީސް ޢަބްދުﷲ މަސީޙް މުޙައްމަދަށް ފޮނުއްވި ސިޓީފުޅުގައި، މި ބިލަށް އެޓަރނީ ޖެނެރަލްގެ ޤާނޫނީ ލަފާ ހޯއްދެވުމަށް ފޮނުއްވުމުން، ބިލާ ގުޅޭގޮތުން އެޓަރނީޖެނެރަލް ފާހަގަކުރެއްވި މައްސަލަތަކަށް ތަފްޞީލުކޮށް ބައްލަވާލައްވާފައިވެއެވެ. އަދި އެޓަރނީޖެނެރަލް ފާހަގަކުރައްވާފައިވާ މައްސަލަތަކަށް ރިޢާޔަތް ކުރައްވައި، މިބިލަށް އިޞްލާޙު ގެންނަވަން ފެނިވަޑައިގަންނަވާ ކަމަށް ރައީސުލްޖުމްހޫރިއްޔާ ވިދާޅުވެފައިވެއެވެ.މިބިލުގައި ބުނެފައިވަނީ، މައާފްދިނުމާއި އަދަބު ލުއިކޮށްދިނުމުގެ ޤާނޫނަށް ހުށައަޅާފައިވާ އިސްލާހުގައި ވަނީ މީހަކު ކުރި ކުށަކާ ގުޅިގެން އޭނާގެ މައްޗަށް ކަނޑައަޅާފައިވާ އަދަބުގެ ބާވަތް ބަދަލުކޮށްދިނުމަކީ ވެސް މައާފްކޮށްދިނުމާއި އަދަބު ލުއިކޮށްދިނުމުގެ ގިންތިއެއް ކަމަށް ބުނެފައެވެ. ނަމަވެސް ބޮޑެތި ކުށްތަކުގެ ގޮތުގައި ގާނޫނުގައި ކަނޑައަޅާފައިވާ ކުށްތަކަށް އަދަބުގެ ބާވަތް ބަދަލުކޮށް ނުދެވޭނެ ކަމަށް ކަނޑައަޅަފައިވެއެވެ. އެކުށްތަކަކީ މީހަކު މެރުމުގެ ކުށާއި، އިސްލާމީ ޝަރީއަތުގައި ހައްދު ކަނޑައެޅިފައިވާ ކުށާއި، ޓެރަރިޒަމްގެ ކުށާއި، ކުޑަކުއްޖަކަށް ޖިންސީ ގޯނާކުރުމުގެ ކުށުގެ އިތުރުން އެއްވެސް ގާނޫނެއްގެ ދަށުން ސާދަ ގްރާމަށް ވުރެ ގިނަ އަދަދަކަށް މަސްތުވާތަކެތި ހުރެގެން އުމުރަށް ޖަލަށްލުމަށް އަދަބު ކަނޑައަޅާފައިވާ ކުށް އަދި ގަދަކަމުން ބަދު އަޚުލާގީ އަމަލު ހިންގުމުގެ ކުށާއި، އެއް ޖިންސުން ގުޅުން ހިންގުމުގެ ކުށެވެ.