އައްޑޫސިޓީގެ ދޮންދީނީގެ އާބާދީ ބެލުމަށް ޚާއްޞަ ސާރވޭއެއް ކުރިއަށް ގެންދިއުމަށް އެންވަޔަރަމަންޓަލް ޕްރޮތެކްޝަން އެޖެންސީ، އީޕީއޭއިން ނިންމައިފިއެވެ.
މިސާރވޭގައި ބައިވެރިވާން ބޭނުންވާ ފަރާތްތަކަށް އީޕީއޭއިން ވަނީ އާއްމުކޮ އެފުރުޞަތު ހުޅުވާލާފައެވެ. މިމަހުގެ 15 އިން 30 އަށް ކުރިއަށްގެންދާ މިސާރވޭގައި ބައިވެރިވާން ބޭނުންވާ ފަރާތްތަކުން އެކަމަށް ޚާއްސަކޮށްފައިވާ ފޯމް ފުރުމުން ސާވޭގައި ބައިވެރިވެވޭނެއެވެ. އަދި ސާރވޭގެ ބައިވެރިން އެމީހެއްގެ ހޯދުންތައް އޮންލައިންކޮށް ހުށައެޅުމަށްވެސް ވަނީ ހުޅުވާލާފައެވެ. އީޕީއޭއާއި އައްޑޫސިޓީ ކައުންސިލް އަދި އައްޑޫ ނޭޗަރ ޕާކް ގުޅިގެން ކުރިއަށްގެންދިއުމަށް ނިންމާފައިވާ މިސާރވޭގެ އެންމެ ބޮޑު ބޭނުމަކީ އައްޑޫސިޓީގެ ދޮންދީނީގެ އާބާދީ ދެނެގަތުމެވެ.
ދޮންދީންޏަކީ ރާއްޖޭގައި ހިމާޔަތްކޮށްފައިވާ ދޫންޏެކެވެ. އަދި މިއީ ހިމާޔަތްކޮށްފައިވާ ދޮންދީނި އާއި ގުޅޭގޮތުން ކުރިއަށްގެންދާ މިފަދަ ފުރަތަމަ ސާރވޭއެވެ.
ދޮންދީންޏަކީ އަކީ ރާއްޖޭގައި ހަމައެކަނި އައްޑޫސިޓީގައި އުޅޭކަމަށް މަޝްހޫރު އަދި އައްޑޫއަށް ޚާއްސަ ދޫންޏެކެވެ. ގައިގައި ހުންނަ ފަތުގައި ސާފު ހުދުކުލަ ހުންނަ މި ދޫނީގެ ތުނބުގައި ހުންނަނީ ކަޅު ކުލައެވެ. މިދޫނި ބިސްއަޅަނީވެސް ގަސްގަހުގެ ކަތްޕަށެެވެ. މިއީ އުމުރު ދިގު ދޫންޏެކަށްވާއިރު، މިދޫނި ގާތްގަނޑަކަށް 18 އަހަރު ދިރިއުޅޭކަމަށްވެއެވެ.
އާންމު ގޮތެއްގައި މިދޫނި ދިރިއުޅެނީ ޓްރޮޕިކަލް ސަރަހައްދުތަކުގައެވެ. ދޮންދީންޏަކީ ރާއްޖޭގެ ދެކުނުގެ ރަށްތަކުގައި ދިރިއުޅޭ އަދި އާބާދީ މަދު ދޫންޏަކަށް ވާތީ، އެދޫނި ހިފުމާއި ކޮށީގައި ބަންދުކޮށްގެން ގެންގުޅުމާއި އެދޫނި ދިރިއުޅޭ މާހައުލަށޤ ގެއްލުން ދިނުން މަނާކޮށް އެދޫނިވަނީ ހިމާޔަތްކޮށްފައިވާ ދޫނިތަކުގެ ލިސްޓުގައި ހިމަނާފައެވެ.