ކޯވިޑް-19 ފެތުރެން ފެށުމުން މިދިޔަ މާރިޗު މަހުގައި މުޅި އިންޑިޔާ ފުރަބަންދުކުރުމުގެ ސަބަބުން އެކި ސަރަޙައްދުތަކަށް ހިޖުރަކޮށްފައިވާ އެތައް މަސައްކަތްތެރިންގެ ވަޒީފާ ގެއްލި އުފަން ރަށަށް އަނބުރާ ދިޔުމަށް އެތައް ބަޔަކަށް މަޖުބޫރުވިއެވެ. ދަތުރުފަތުރުގެ ނިޒާމުތައް ހުއްޓުމަކަށް އައުމުން، ގޮތް ހުސްވެފައިވާ މީހުން އަމިއްލަ އަވަށަށް ދިޔުމަށް އެތައް ކިލޯމީޓަރެއްގެ ދިގު ރާސްތާއެއް ފައިމަގުގައާއި ބައިސްކަލުގައި ކަޑައްތުކުރުމަށް މަޖުބޫރުވިއެވެ.
އެގޮތަށް ހިޖުރަކުރި އެކަކަކީ އުމުރުން އެންމެ 15 އަހަރުގެ ޖޯތީ ޕަސްވަނެވެ. ފަގީރު ޢާއިލާއަކަށް އުފަން އެ ކުއްޖާވަނީ ނިއު ދިއްލީގެ ގުރުގުރަމް ކިޔާ ސަރަޙައްދަކުން ބިހާރުގެ ދަރުބަންގާއަށް ދަތުރުކުރުމަށް 1،200 ކިލޯމީޓަރަށްވުރެ ދިގު ރާސްތާއެއް ބައިސްކަލުގައި ކަޑައްތުކޮށްފައެވެ. އޭނާ އެ ބުރަ މަސައްކަތްކުރީ ބަލި ޙާލު ބޮޑުވެފައިވާ އޭނާގެ ބައްޕަ، މޯހަން ޕަސްވާން އަނބުރާ އުފަން އަވަށަށް ގެންދިޔުމުގެ މަޤުސަދުގައި ބައިސްކަލުގެ ފަހަތަށް ބައްޕަ އަރުވައިގެންނެވެ.
ޖޯތީގެ ހިތްވަރުގަދަ ވާހަކައަކީ އެ ވާހަކައަކަށް ގިނަ ބައެއްގެ ސަމާލުކަން ލިބުނު ވާހަކައެކެވެ. ބައިނަލް އަޤްވާނީ ނޫސް އިދާރާތަކުންވެސް ޖޯތީގެ ދަތުރުގެ ވާހަކަވަނީ ގެނެސްދީފައެވެ. އެމެރިކާގެ ރައީސް، ޑޮނަލްޑް ޓްރަންޕުގެ ދަރިކަނބަލުން، އިވަންކާ ޓްރަންޕުވަނީ ޖޯތީގެ ތަޖުރިބާއަކީ ހިތްވަރުއެލުވާނުލާ މަސައްކަތްކުރުމާއި ލޯބީގެ ރީތި މިސާލެއްގެ ގޮތުގައި ސިފަކުރައްވާފައެވެ.
ޖޯތީގެ ބައްޕަ މޯހަން ގުރުގުރަމްގައި މަސައްކަތްކުރަމުން ދިޔައީ އޮޓޯ ދުއްވާ މީހެއްގެ ގޮތުގައެވެ. އޭނާއަށް ދުވާލަކު 500އެއްހާ ރުޕީސް އާމްދަނީގެ ގޮތުގައި ލިބެއެވެ. އަވަށުގެ ގަދަރުވެރި ޢާއިލާއަކަށް ނިސްބަތްނުވާތީ، އެފަދަ އެހެން މީހުންނެކޭ އެއްގޮތަށް މޯހަންގެ އަމިއްލަ ބިމެއް އޭނާގެ އުފަން އަވަށުގައި ނޯވެއެވެ. އެންމެ ދަށް ފެންވަރުގެ އާއިލާއަކަށް ނިސްބަތްވުމުގެ ސަބަބުން މޯހަންއާއި އެފަދަ އެހެން ޢާއިލާތަކުން ދިޔައީ އެމީހުންގެ އުފަން އަވަށުގައި ބާކީވެ މުޖުތަމަޢުގެ ތެރޭގައި ބޮޑެތި ތަފާތުކުރުންތަކާ ކުރިމަތިލަމުންނެވެ.
މިދިޔަ ޖަނަވަރީ މަހުގެ ތެރޭގައި މޯހަން އެކިސެޑެންޓެއް ވުމުން ޖޯތީއާއި އޭނާގެ މަންމަ ފުލޯ ދޭވީ ވަނީ ގުރުގުރާމަށް ގޮސްފައެވެ. ވަޒީފާއަށް އެނބުރި ނިކުންނަންޖެހޭތީ ފުލޯވަނީ އޭގެ ދިހަ ދުވަސް ފަހުން އަނބުރާ ގޮސްފައެވެ. އޭނާ ޢަދާކުރަމުންދިޔަ މައި ވަޒީފާގެ އިތުރުން ދުވަހު މުސާރައަށްވެސް އޭނާ ދިޔައީ މަސައްކަތްކުރަމުންނެވެ. އޭނާގެ ފިރިމީހާއަށް އަނިޔާވެ އާމްދަނީ ލިބޭނެ މަގު ބަންދުވުމުން ބަލި ފިރިމީހާ ބެލުމަށާއި ޢާއިލާގެ ކަންކަން ހަމަޖެއްސުމަށް ވަޒީފާގެ އިތުރުން އިތުރު މަސައްކަތްކުރުމަށް ފުލޯއަށް މަޖުބޫރުވިއެވެ.
ފުލޯ އަނބުރާ މަސައްކަތަށް ދިޔުމުން މޯހަންގެ ހުރިހާކަމެއް ބެލެހެއްޓުމަށް އޭނާ ގާތުގައި މަޑުކުރީ ޖޯތީއެވެ. ފައިސާގެ ކަންކަން ހަމަޖެއްސުމަށް ޖޯތީއާއި އޭނާގެ ބައްޕަ ބޭނުންކުރަމުންދިޔައީ މަންމަގެ ބުރަ މަސައްކަތުން ހޯދައި ފޮނުވަމުންދިޔަ މަދު ފައިސާކޮޅެވެ. އެގޮތުގައި ދުވަސްތައް ވޭތުކުރަމުން ދަނިކޮށް މާރިޗު މަހުގެ 25ވަނަ ދުވަހު އިންޑިޔާ ފުރަބަންދުކުރިއެވެ. އެހާ ހިސާބުން އެއްކޮށްފައި ހުރި މަދު ލާރިކޮޅު ހުސްވެ އިތުރު ފައިސާ ހޯދޭނެ މަގެއް ނުފެނި އެ ދެބަފައިންގެ ކަރު އެލުނެވެ.
ޖޯތީ ބުނީ ސަރުކާރުން ފޯރުކޮށްދެމުންދިޔަ ކާބޯތަކެތީގެ އެހީތެރިކަން ހޯދައި، ބަނޑުހައި ހޫނުކަން ފިލުވުމަށް ދިގު ކިޔުތަކުގައި ގިނަ އިރުވަންދެން މަޑުކޮށްގެން ހުންނަންޖެހުނުކަމަށެވެ. އެއްޗެއް ލިބޭ ފަހަރާއި ނުލިބޭ ފަހަރުވެސް ދާކަމަށް އޭނާ ބުންޏެވެ. ބައްޕައަށް ބޭނުންވާ ބޭސް ގަންނާނެ ފައިސާވެސް އެމީހުންގެ އަތުގައި ނެތްކަމަށް ޖޯތީ ބުންޏެވެ.
މެއި މަހުގެ ފުރަތަމަ ހަފުތާއާ ހަމައަށް ދިޔައިރު ޖޯތީވަނީ އެއްކޮށް ގޮތްހުސްވެފައެވެ. ކުރިމަތިވެފައިވާ ޙާލަތު ބަދަލުކުރާނެ ގޮތަކާމެދު ވިސްނަމުން ދަނިކޮށް ބައިސްކަލުގައި ބިހާރަށް ދަތުރުކުރުމަށް ރާވަމުންދިޔަ ބަޔަކާ އެނާއާއި ދިމާވިއެވެ. އެހާހިސާބުން އޭނާ ވިސްނީ އެމީހުންނާއެކު ބަލި ބައްޕަ ގޮވައިގެން ބައިސްކަލުގައި އެނބުރި ބިހާރަށް ދިޔުމަށެވެ. މަންމައަށް ގުޅައި އެކަމަށް މަންމަގެ ޙުއްދަ ހޯދާ، އަތުގައި އޮތް ފަހު ލާރިކޮޅު ބޭނުންކޮށްގެން ބާ ބައިސްކަލެއް ޖޯތީ ގަތެވެ. އަދި ފެންފުޅިއަކާއި ބައެއް ގޮވާމުގެ ބާވަތްތައް ހިފައިގެން އެ ދެ ބަފައިންގެ ދަތުރު ފެށިއެވެ.
ބައިސްކަލުގެ ފަހަތަށް ބައްޕަ އަރުވައިގެން އެތައް ސަތޭކަ ކިލޯމީޓަރަކަށް ދަތުރުކުރުމަކީ ފަސޭހަ ކަމަކަށް ނުވިއެވެ. އެ މަސައްކަތް އިތުރަށް އުނދަގޫވީ މެއި މަހުގެ އުދާސް ހޫނުގެ ސަބަބުންނެވެ. ފުރަތަމަ ދެ ދުވަސް ވަރަށް އުނދަގޫކަމަށާއި އޭރު ވަރަށް ބޮޑަށް ބިރުގައިންކަމަށް ޖޯތީ ބުންޏެވެ. އެ ދެ ރޭ އެއްވެސް ވަރަކަށް އޭނާއަށް ނުނިދޭކަމަށާއި މުޅި ގައިގައި ރިއްސިކަމަށް އޭނާ ބުންޏެވެ. އެނބުރި އަވަށަށް ދެވޭނެކަމާމެދު ސުވާލު އުފެދުނުކަމަށްވެސް އޭނާ ބުންޏެވެ.
މޯހަންއާއި ޖޯތީ ބުނީ އެކުގައި ދަތުރުކުރި މީހުންގެ ފަރާތުން އެ ދެ ބަފައިންނަށް އެހީތެރިކަން ލިބުނުކަމަށެވެ. ދަތުރުމަތީގައި ދިމާވި އެހެން ބައެއް މީހުންވެސް ކާނޭ އެއްޗެހި ކޮންމެވެސް ވަރަކަށް ދިންކަމަށް މޯހަން ބުންޏެވެ. ދަރިފުޅު ދުއްވަމުންދިޔަ ބައިސްކަލުގެ ފަހަތުގައި އިންނަން ޖެހުމުން މޯހަން ވަރަށް ދެރަވިކަމަށް އޭނާ ބުންޏެވެ. ނަމަވެސް އެނޫން ގޮތެއް ނެތްކަންވެސް އޭނާއަށް އެނގޭކަމަށް މޯހަން ބުންޏެވެ.
ޖޯތީ ބުނީ ދަތުރުމަތީގައި ވަރުބަލިވެގެން މަޑުކުރަންޖެހުނީ ކިތައް ފަހަރުކަންވެސް ބުނަން ނޭނގޭކަމަށެވެ. މަގުމަތިން ދިމާވި އުޅަނދެއްގެ އެހީތެރިކަމާއެކު އެ ދަތުރުގައި ބައިސްކަލު ފިޔަވައި އެހެން ސަވާރީއެއްގައި ދަތުރުކުރީ ގާތްގަނޑަކަށް 50 ކިލޯމީޓަރަށްކަމަށް އޭނާ ބުންޏެވެ. ޖޯތީ ބުނީ އެނާ ކުރި ދިގު އަދި އުނދަގޫ ދަތުރުގައި އޭނާއަށް ހިނިތުންވުމުގެ ފުރުޞަތެއް ލިބުނީ ބައިސްކަލު ދުއްވާފައި ދިޔަމަގުމަތީގައި މަޝްހޫރު ތާޖު މަހަލް ހަމަލޮލަށް ފެނުމުންކަމަށެވެ.
ޖޯތީއާއި މޯހަންގެ ދިގު ދަތުރު ނިމުމަކަށް އައިސް އަމިއްލަ އަވަށަށް ދިޔައިރު ޖޯތީގެ ހަށިގަނޑަށް ގިނަ އަނިޔާތައް ލިބި އަތާއި ފަޔާއި ބުރަކަށީގައިވަނީ ފޮޅުލައި މަށައިގެން ގޮސްފައެވެ. އަނބުރާ އަވަށަށް ދިޔުމުން ދެ ހަފުތާގެ މުއްދަތަށް ކަރަންޓީނުވުމަށް އެ މީހުންނަށް އެނގިއެވެ. މޯހަންއާއި ޖޯތީގެ ފަރާތުން އަވަށަށް ކޮރޯނާ އަންނާނެކަމަށް އަވަށްޓެރިން ދިޔައީ ބުނަމުންނެވެ.
ޖޯތީގެ ވާހަކަ އެނގުމުން އެ އާއިލާއަށް ބޮޑު ސަމާލުކަމެއް ލިބިގެންދިޔައެވެ. ބައިސްކަލު ދުއްވުމާއިބެހޭ ޖަމުޢިއްޔާއަކުން ޖުޔޯތީއަށް އެވޯޑެއް ދިނުމުން އޭނާގެ މަޝްހޫރުކަން އިތުރުވެގެން ދިޔައެވެ. އެހާ ހިސާބުން ރަށްފުށުގެ ފަގީރު ޢާއިލާއަށް ލިބޭ ސަމާލުކަން އިތުރުވެ އެކި ފެންވަރުގެ މީހުން އެ އާއިލާއާ ބައްދަލުކުރަން އައިސް ތަފާތު ގިނަ އެހީތައް ދޭން ފެށިއެވެ.
ޖޯތީގެ ތަޖުރިބާގެ މައްޗަށް ބިނާކޮށް ވާހަކައާއި ފިލްމު ހެދުމަށް ހުށަހެޅުންތައް ލިބެމުންދިޔައެވެ. ގަދަރުވެރި އާއިލާއަކަށް ނިސްބަތްނުވުމުގެ ސަބަބުން މުޖުތަމަޢުގައި ބާކީވެފައިވާ ބާކީވުން ނިމުމަކަށް އައެވެ. މަތީ ފަންތީގެ ގޭގެއަށް ގޮސް ސައިބުއިމަށާއި ކެއުންތަކުގައި ބައިވެރިވުމަށް ދަޢުވަތު ލިބެން ފެށިއެވެ. ފިލްމެއް ހަދަން ޖުޔޯތީގެ ވާހަކަ ބޭނުންކުރުމަށް ޙުއްދަ ދިނުމުން އެ ޢާއިލާއަށް 51،000 އިންޑިއަން ރުޕީސްވަނީ ލިބިފައެވެ. އެ ޢާއިލާއިން އެ ފައިސާ ބޭނުންކުރީ ދިރިއުޅެމުންދިޔަ ޗަކަ ޖިފުޓިން ނިކުމެ ތަނަވަސް މާހައުލެއް އޮތް ގެއެއް އިމާރާތްކުރުމަށެވެ. ޖޯތީގެ ޢާއިލާގެ މިހާރުގެ އުންމީދަކީ ޢާއިލާގެ ހުރިހާ ދަރަންޏެއް އެމީހުންނަށް ލިބުނު ފައިސާގެ އެހީތެރިކަން ބޭނުންކޮށްގެން ދައްކާ ޚަލާސްކުރުމެވެ.
ޖޫލީ
ސަކްސެސް އިޒް ހާރޑް ވޯކާސް ރައިޱް?