އާންމުންގެ މެދުގައި މަގުބޫލު މީސްމީޑިޔާ ޕްލެޓުފޯމް، އިންސްޓަގުރާމުގެ ހޯމް ސްކުރީނަށް ފާއިތުވި 10 އަހަރުގެ ތެރޭގައި ނުގެންނަވަރުގެ ބަދަލުމެއް ގެނައުމަށް ތައްޔާރުވެއްޖެއެވެ. ފޭސްބުކުގެ ބައެއްގެ ގޮތުގައި އޮންނަ އިންސްޓަގުރާމުން އެ ކުންފުނީގެ އެޕުލިކޭޝަންގެ ހޯމް ސްކުރީނަށް ގެނައުމަށް ރާވާފައިވާ ބަދަލުތައް ނޮވެމްބަރު މަހުގެ 12ވަނަ ދުވަހުގައިވަނީ އާންމުންނަށް ދައްކާލައިފައެވެ.
އަލަށް ގެނައި ބަދަލުތަކުގެ ދަށުން 15 ސިކުންތުގެ ކުރު ވީޑިއޯ ކޮޅު އަޕްލޯޑުކުރުމަށް އެޕުގައި ހިމަނާފައިވާ 'ރީލް' ފީޗާއަށް ހޯމް ސްކުރީނުގައި ފިތެއް ޚާއްޞަ ކުރާނެއެވެ. އޭގެ އިތުރުން އިންޓަނެޓު މެދުވެރިކޮށް ބާޒާރުކުރުމަށް 'ޝޮޕިންގ' ފީޗާއެއްވެސް ހޯމް ސްކުރީނުގައިވަނީ ހިމަނާފައެވެ. ބުރާސްފަތި ދުވަހުން ފެށިގެން އެ ބަދަލުތައް އިންސްޓަގުރާމުގެ ހޯމް ސްކުރީނަށް ގެންނަން ފަށާނެކަމަށް އެ ކުންފުނިން ބުނެއެވެ.
އަލަށް ގެންނަ ބަދަލުތައް ބިނާކޮށްފައިވަނީ ކުރު ވީޑިއޯ ކޮޅުކޮޅުގެ ޒަރިއްޔާއިން މުއާމަލާތު ކުރުމާއި އިންޓަނެޓު މެދުވެރިކޮށް ބާޒާރުކުރުމަށް ކުރިމަގުގައި އަންނާނެ ބަދަލުތަކުގެ މައްޗަށެވެ. އެ ދެ ދާއިރާއަކީވެސް އިންސްޓަގުރާމުން ބޮޑެތި ޢަދަދުތަކުން އިންވެސްޓުކުރަމުންދާ ދެ ދާއިރާއެވެ. ނަމަވެސް މިހާތަނަށް އެ ފީޗާތައް ބޭނުންކުރަނީ ކިތައް މީހުންތޯ އާއި އެ ދާއިރާތަކާއި ގުޅޭ އެފަދަ އެހެން ޢަދަދުތައް އިންސްޓަގުރާމުން ހާމަކޮށްފައެއް ނުވެއެވެ.
ހޯމް ސްކުރީނަށް ގެނައި ބަދަލުތަކުގެ ތެރެއިން އެންމެ ފާހަގަކޮށްލެވޭ އެއް ބަދަލަކީ އައު ޕޯސްޓެއް ނުވަތަ ސްޓޯރީއެއް ޝާއިއުކުރުމަށް ބޭނުންކުރާ މައި '+' ފިތުގެ ބަދަލުގައި އެ ޖާގަ ރީލަށް ޙާއްޞަކޮށްފައިވުމެވެ. އައު ޕޯސްޓެއް ޝާޢިއުކުރުމަށް ބޭނުންކުރާ ފިތް މިހާރުވަނީ ހޯމް ސްކުރީނުގެ އެންމެ މައްޗަށް ބަދަލުކޮށްފައެވެ.
އިންސްޓަގުރާމު ބޭނުންކުރާ މީހުންގެ ޙަރަކާތްތައް ބަލާލުމަށް ބޭނުންކުރާ "ހިތް"ވެސްވަނީ ހޯމް ސްކުރީނުގެ އެންމެ މައްޗަށް ބަދަލުކޮށްފައެވެ. އެ "ހިތް" ކުރިން އިން ތަނުގައި މިހާރު އިންނާނީ ބާޒާރުކުރުމަށް ބޭނުންކުރާ "ޝޮޕް" ފިތެވެ. ކުރިއެކޭ އެއްގޮތަށް މެސެޖު ކުރުމަށް ބޭނުންކުރާ ފިތް އަދިވެސް އިނީ ހޯމްސްކުރީނުގެ މަތީ ކަނުގައެވެ.
އިންސްޓަގުރާމުގެ އިސްވެރިޔާ، އެޑަމް މޮސޭރީ ވިދާޅުވީ އިންސްޓަގުރާމުގެ ހޯމް ސްކުރީނަށް ބޮޑު ބަދަލެއް ނުގެންނަތާ ގިނަ އަހަރުތަކެއް ވެފައިވާކަމަށެވެ. ނަމަވެސް މިހާރު މީހުން އިންޓަނެޓު މެދުވެރިކޮށް މުޢާމަލާތްކުރާ ގޮތް ވަރަށް ބޮޑަށް ބަދަލުވެފައިވާކަމަށެވެ. އަދި އަވަސް އަވަހަށް ބަދަލު ގެނައުމުގެ ބަދަލުގައި ގިނަ ދުވަސްތަކެއް ފަހުން ބަދަލުތަކެއް ގެނައީ މީހުން އިންސްޓަގްރާމު މަތިން ފޫހިވުމުގެ ފުރުޞަތު އޮތުންކަމަށެވެ.
މަޝްހޫރު ޓިކްޓޮކް އެޕްލިކޭޝަނުގެ ވައްޓަފާޅި ނަކަލުކޮށް އިންސްޓަގުރާމުން އެކުލަވާލީ "ރީލް" ފީޗާ އިންނަނީ ކޮންމެމީހެއްގެ ޕްރޮފައިލް ޕޭޖްގައެވެ. އެ ފީޗާ އިންކަން ގިނަ ބަޔަކަށް ނޭގެއެވެ. އެހެންކަމުން މި ފަހަރު ގެނައި ބަދަލުގައި އެ ފީޗާ އަށް ބޭނުންވާ ފިތް މިހަރު މިވަނީ ހޯމް ސްކްރީނަށް ބަދަލުކޮށްފައެވެ. އަދި މި ބަދަލާއި އެކު އެ ފީޗާއަށް ލިބޭ ސަމާލުކަން އިތުރުވެގެން ދާނެއެވެ.
އިންސްޓަގުރާމުން މި ބަދަލު ގެނެސްފައި މިވަނީ އެމެރިކާގައި އިތުރަށް ޓިކްޓޮކް ބޭނުންކުރެވިދާނެކަމާއި މެދު ސުވާލު އުފެދިފައިވާ ދަނޑިވަޅެއްގައެވެ. އެނގިފައިވާ ގޮތުގައި ހޯމް ސްކްރީނުގެ ބަދަލު އާންމުންނަށް ދައްކާލުމުގެ ކުރިން ޓިކްޓޮކުގައި މަޝްހޫރުކަން ހޯދާފައިވާ ބައެއް ތަރިންނަށް އިންސްޓަގުރާމަށް އެމީހުންގެ ހުށަހެޅުންތައް ބަދަލުކުރުމަށް އިންސްޓަގުރާމުންވަނީ ހުށަހަޅާފައެވެ.
އިންސްޓަގުރާމު މެދުވެރިކޮށް ވިޔަފާރިކުރުން ފަސޭހަކޮށްދިނުމަށް ގެނެސްފައިވާ ބަދަލުތަކުގެ ސަބަބުން އެ ޕުލެޓުފޯމް މެދުވެރިކޮށް ވިޔަފާރުކުރާ މީހުންގެ ޢަދަދު އިތުރުވާނެކަމަށްވެސް ބެލެވެއެވެ. "ޝޮޕް" ފިތް ބޭނުންކޮށްގެން ގަންނަން ބޭނުންވާ ވަކި ޚާއްޞަ އެއްޗެއް ހޯދުމުގެ ފުރުޞަތުވެސް ލިބޭނެއެވެ. މިއީ މިފަދަ ޚިދުމަތެއް އެ އެޕުން ލިބޭ ފުރަތަމަ ފަހަރެވެ.