ފުވައްމުލަކު ދެކުނުދާއިރާކަޕް ވޮލީބޯޅަ މުބާރާތުގެ ގްރޫޕް ސްޓޭޖްގައި ފުނާޑް ކުޅުނު ތިން މެޗުވެސް ކާމިޔާބުކޮށް، ގްރޫޕްގެ އެއްވަނަ ހޯދައިފިއެވެ. ފުވައްމުލަ ފުނާޑް ސްޕޯރޓްސް ކްލަބުން އިންތިޒާމްކުރާ މުބާރާތުގައި ފުނާޑް ޓީމް ކުޅުނު ތިންވަނަ މެޗު ރޭ ޔޫތް އެމްޕަވަރމެންށް ސޮސައިޓީއާއި ވާދަކޮށް ކާމިޔާބުކުރީ ސީދާ 3 ސެޓުންނެވެ.ފުނާޑް ސްޕޯރޓްސް ކްލަބް މެޗުގެ ސެޓްތައް ގެންދިޔައީ 27-25، 25-16 އަދި 25-18 ނެވެ.މެޗުގެ މޮޅު ކުޅުންތެރިއަކީ ފުނާޑަށް ކުޅޭ ސްރީލަންކާގެ ތިލިނި ވަސަނަ ޕެރެއިރާއެވެ. 7 ޓީމް ވާދަކުރާ މުބާރާތުގައި ފުނާޑް ހިމެނޭ ގްރޫޕްގައި ހިމެނެނީ 4 ޓީމެވެ. މިގްރޫޕްގެ އެއްވަނަ ޓީމްގެ ގޮތުގައި ފުނާޑް ވަނީ ސެމީފައިނަލްގެ ޖާގަ ކަށަވަރުކޮށްފައެވެ. ސެމީފައިނަލްގައި ފުނާޑް މާދަމާ ހަވީރު ވާދަކުރަން ޖެހޭނީ ގްރޫޕް ބީގެ އެއްވަނަ ޓީމާއެވެ.ގްރޫޕް ސްޓޭޖްގެ ފަހު މެޗުގައި މިރޭ ވާދަކުރާނީ މިސްކިތްމަގު އެންމެންގެ ގުޅުމާއި ދަނޑިމަގު ރަނިންއެވެ. މުބާރާތުގެ ފައިނަލް މެޗު ކުޅޭނީ އަންނަ ހުކުރުދުވަހުގެ ރެއެވެ.