ކުޑަކުދިންގެ ޢަދުލުގެ ޤާނޫނުގެ ދަށުން އުފައްދަންޖެހޭ ޑިޕާޓްމަންޓް އޮފް ޖުވެނައިލް ޖަސްޓިސް ހުޅުވައިފިއެވެ. މިޑިޕާޓްމަންޓް ރަސްމީކޮށް ހުޅުއްވައިދެއްވީ މިނިސްޓަރ އޮފް ހޯމްއެފެއާޒް އިމްރާން ޢަބްދުﷲއެވެ.
ހޯމް މިނިސްޓްރީގެ ދަށުން ހިންގާ ޑިޕާޓްމަންޓް އޮފް ޖުވެނައިލް ޖަސްޓިސް ހުޅުއްވައިދެއްވައި ވާހަކަފުޅު ދައްކަވަމުން ހޯމް މިނިސްޓަރ ޢިމްރާން ވިދާޅުވީ ރާއްޖޭގައި ކުޑަކުދިން ޢަދުލުގެ ނިޒާމުގެ ތެރެއަށް ވަންނަ ކުދިންގެ ޢަދަދު އިތުރުވަމުންދާކަމަށެވެ. ރާއްޖޭގެ އާބާދީގެ ގާތްގަނޑަކަށް ތިންބައިކޮށް އެއްބަޔަކީ ކުޑަކުދިންކަމުގައިވާއިރު އެކުދިން ކުދިން އެފަދަ މަގުތަކުން ހިނގުން ހުއްޓުވިގެން ނޫނީ ރާއްޖޭގައި އުޖާލާ މުސްތަޤުބަލެއް ޤާއިމުވެގެން ނުދާނެކަމަށެވެ. ޤާނޫނީ ބާރު ލިބިގެން މިމައްސަލަ ޙައްލުކުރުމަށް ސަރުކާރުން ފެށި މިމަސައްކަތުގެ ސަބަބުން ކުދިން ކުށުގެ ވެއްޓާ ދުރަށް ގެންދެވޭނެކަމަށް މިނިސްޓަރ ވިދާޅުވިއެވެ.
"ޢާއްމު އަދުލުގެ ނިޒާމުގެ ތެރެއިން ކުޑަކުދިންގެ ޢަދުލުގެ ނިޒާމެއް ހަރުދަނާގޮތެއްގައި ހިންގި އެނިޒާމު ފުރިހަމަވުމަކީ މުޖުތަމަޢު ހަރުދަނާވެ، ބަދަހިވެ ދުޅަހެޔޮވުން. އެކަމަށްޓަކައި އަޅުގަނޑުމެން މިއެޅި ބިންގަލަކީ ވަރަށް މުހިއްމު ބިންގަލެއް." މިނިސްޓަރ އިމްރާން ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން ޑިޕާޓްމަންޓް އޮފް ޖުވެނައިލް ޖަސްޓިސްގެ ޑިރެކްޓަރ ފާތުމަތު ރޫނާ ވިދާޅުވީ މުޖުތަމަޢުގައި ކުދިންގެ މަޤާމަކީ ގެއާއި ސްކޫލްތައް ކަމަށެވެ. އަދި ޖަލަކީ ކުޑަކުދިން ތިބެންޖެހޭ ތަނެއް ނޫންކަމަށެވެ.
"ކުދިން ތިބެންޖެހޭ ތަނަކީ ގެ. ދެން އެކުދިން ތިބެންޖެހޭނީ ސްކޫލްތަކުގައި. ޖަލަކީ ކުދިން ތިބެންޖެހޭ ތަނެއް ނޫން. އެކަން އެގޮތަށް ވިޔަ ނުދޭން އަޅުގަނޑުމެން އެއް އަމާޒެއްގައި މަސައްކަތް މިކުރަނީ." ފާތުމަތު ރޫނާ ވިދާޅުވިއެވެ.
ޑިޕާޓްމަންޓް އޮފް ޖުވެނައިލް ޖަސްޓިސް އުފެއްދުމާ ގުޅިގެން ހޯމް މިނިސްޓްރީގެ ދަށުން ހިންގަމުން އައި ޖުވެނައިލް ޖަސްޓިސް ޔުނިޓުވަނީ އުވިގެން ގޮސްފައެވެ. ކުޑަކުދިން ކުށްކުރުމާ ދުރުކުރުމަށް މަސައްކަތްކުރާ ޔުނިޓެއްގެ ގޮތުގައި ޚާއްސަ ޔުނިޓެއް ޖުވެނައިލް ޖަސްޓިސްގެ ނަމުގައި އުފައްދާފައިވަނީ 2007ވަނަ އަހަރުގައެވެ.
ޑިޕާޓަމަންޓް އޮފް ޖުވެނައިލް ޖަސްޓިސްގެ ދަށުން ޤާނޫނާ ޚިލާފުވާ ޢުމުރުން 18 އަހަރުން ދަށުގެ ކުދިންގެ މަސްލަޙަތު ޙިމާޔަތްކޮށް ކޭސްވޯކްކުރުމަށާއި، ކުދިން އިސްލާޙުކޮށް އަނބުރާ މުޖުތަމަޢަށް ނެރުމަށް އެކި ޕްރޮގްރާމްތައް ހިންގާނެކަމަށް ހޯމް މިނިސްޓްރީން ވިދާޅުވެއެވެ. މީގެ އިތުރުން ޝަރުޢީ އަދި ތަޙުގީގީ މަރުޙަލާގައިވެސް ކުދިންގެ މަސްލަޙަތު ޙިމާޔަތްކުރުމުގެ އިތުރުން ކުށުގެ ވެއްޓަށް ހުށައެޅުމުގެ ފުރުސަތު އޮންނަ ކުދިންނާއި ނަފްސާނީ ގޮތުންނާއި އިޖުތިމާޢީ ގޮތުންވެސް ކުދިންނަށް ހުރިހާ މަރުޙަލާއެއްގައިވެސް މިޑިޕާޓްމަންޓުން ފޯރުކޮށްދޭނެއެވެ.