މަސްވެރިންގެ ދުވަހެއް ފާހަގަކުރަން ފަށާފައިވަނީ 1981 ވަނަ އަހަރުއެވެ. މިދުވަސް ފާހަގަކުރުމުގެ ބޭނުމަކީ، މަސްވެރިންކަން ކުރާ ފަރާތްތަކުގެ އަގުވަޒަންކޮށް އެމަސައްކަތް ދިރުވާ އާލާކުރުމާއި، މަސްވެރިކަމަށް ދިމާވެފައިވާ އެކި އެކި ގޮންޖެހުންތައް ދެނެގަނެ ސަރުކާރުން އެ ދާއިރާ ކުރިއެރުވުމަށް ކުރާ މަސައްކަތްތައް އެންގުމެވެ.
މިއަހަރު މި ދުވަސް ފާހަގަކުރަމުންދާއިރު، މަސްވެރިންނަށް ދިމާވެފައިވާ ގިނަ ގޮންޖެހުންތަކަކާ، ކަންބޮޑުވުންތަކެއް ހުރިކަމަށް މަސްވެރިން އަންނަނީ ބުނަމުންނެވެ. އެގޮތުން އެންމެ ބޮޑު ކަންބޮޑުވުމެއް އޮތީ މަސްވެރިން ބާނާ މަސް ކިރުވުމުގައި ހުރި ގޮންޖެހުންތަކެވެ. މިހުރިހާ ކަމެއް ހައްލުކޮށްދެއްވުމަށް ސަރުކާރުން އަންނަނީ ގިނަ މަސައްކަތްތެރިކަމެއް ކުރަމުންނެވެ.
މިދާއިރާ ކުރިއެރުވުމަށް ސަރުކާރުން މިހާތަނަށް ކޮށްފައިވާ ބައެއް ބޮޑެތި މަސައްކަތްތަކަށަށް ބަލާލާއިރު، މަސްވެރިންގެ ކާޑެއްހަދައި، ބޭންތަކުން މަސްވެރިންނަށް ލޯނުނެގޭނެ ފަސޭހަ ނިޒާމެއް ވަނީ ހަމަޖައްސަވާފައެވެ. އަދި ރާއްޖޭގެ 3 ސަރަހައްދެއްގައި މަސްވެރިންނަށް އައިސް ލިބޭނެ އިންތިޒާމް ހަމަޖެއްސުމުގެ ގޮތުން ރާއްޖޭގެ 3 ރަށެއްގައި އައިސްޕްލާންޓް ބެހެއްޓުމުގެ މަސައްކަތް ވަނީ ފަށާފައެވެ. އަދި އިތުރު އައިސްޕްލާންޓްއެއް ބެހެއްޓުމަށް ޓެންޑަރ ކުރެވިފައިވާކަމަށް މަސްވެރިކަމާބެހޭ ވުޒާރާއިން ވިދާޅުވެއެވެ.
މަސްވެރިކަން ކުރުމަށް ބޭނުން ކުރާ އުޅަނދު ފަހަރު ބޮޑުވެގެން ދާއިރު، މަސް ކުންފުނިތައް މިއަދާ ހަމައަށްއައިރު ތަރައްޤީ ނުކުރެވި އޮތްއޮތުން އެއީ ކަންބޮޑުވާންޖެހޭ ކަމެއްކަމަށް މަސްވެރިކަމާ ބެހޭ ވަޒީރު ވަނީ ވިދާޅުވެފައެވެ. މަސްވެރިކަން ފުޅާކުރުމަށް ސަރުކާރުން ކުރިއަށްގެންދާ އެންމެ ބޮޑު މަޝްރޫއު އަކީ މަސްވެރިންގެ ކުންފުނި މިފްކޯ ޒަމާނީ ވަސީލަތްތަކާއެކު ތަރައްޤީކޮށް މަސްވެރިންނަށް ދަތި ނުވެ އައިސް ލިބޭނެ ގޮތްހެދުމަށް ކުރާ މަސައްކަތެވެ.
މިމަސައްކަތުގެ ދަށުން މިފްކޯއަށް 4000 ޓަނުގެ މަސް ރައްކާކުރެވޭނެ ސްޓޯރޭޖްއެއް އިތުރުކުރުކޮށް، ދުވާލަކު 50 ޓަނު އައިސް އުފެއްދޭވަރުގެ ޕްލާންޓްއެއް ބެހެއްޓުން ހިމެނެއެވެ. މިއާއެކު މަސް ރައްކާކުރުމަށް މިފްކޯގައި ހަދާފައިވާ ސްޓޯރޭޖްގެ ބޮޑުމިން 8000 ޓަނަށް އިތުރުވެގެންދާނެއެވެ. މީގެ ދަށުން މ އަތޮޅާ ގދ އަތޮޅުގައި ކަލެކްޝަން ސެންޓަރުތަކެއް ޤާއިމް ކުރުން ހިމެނެއެވެ މިކަމުގެ ސަބަބުން މަސްވެރިން ބާނާ މަސް ކިރުވުމަށް ދަތުރު ކުރަންޖެހޭ ޖެހުމަށް ލުޔެއް ލިބިގެންދާނެކަމަށް އެވުޒާރާއިން ވިދާޅުވެއެވެ.
މަސްވެރިކަމުގެ ސިނާއަތަކީ ކުރިއަރާފައިވާ އަދި ރައްޔިތުންގެ އިތުބާރު ލިބޭ އަދި މަސްވެރިންކަންކުރާ ބުރަ މަސައްކަތަށް ރަނގަޅު އާމްދަނީއެއް ލިބޭނެ ގޮތްތަކެއް ހެއްދެވުމަށް ސަރުކާރުން އަންނަނީ މަސައްކަތްތަކެއް ކުރަމުންނެވެ. އެގޮތުން މަސްވެރިކަމާ ބެހޭ ގާނޫނު އިސްލާޙުކޮށް، ޒަމާނަށް ފެތޭ ޤާނޫނެއް ވަނީ ވުޖޫދަށް ގެނެސްފައެވެ. މިއީވެސް ސިނާއަތް ކުރިއެރުވުމަށް ސަރުކާރުން ކުރަމުންގެންދާ މުހިންމު މަސައްކަތެކެވެ. އެގޮތުން މިހާތަނަށް އޮތް އެންމެ ބޮޑު ގޮންޖެހުމަކީ، ޤާނޫނުތަކުގެ ދަށުން ހަދާފައިވާ ޤަވާއިދުތަކުގެ ސަބަބުން މަސް އެކްސްޕޯޓް ކުރުމުގައި ހުރި ދަތިތަކެވެ.
މަސްވެރިކަމުގެ ސިނާއަތް ކުރިއެރުވުމަށް ކުރާ މަސައްކަތުގެ ދަށުން މީގެކުރިން މަސްގަތުމުގެ ހުއްދަ ސަރުކާރުން ދީފައި އޮންނަނީ ހަތަރު ކުންފުންޏަކަށެވެ. އެހެންނަމަވެސް މިސަރުކާރު ވެރިކަމާ ހަވާލުވެވަޑައިގެންނެވި ހިސާބުން އެކަން ބަދަލުކޮށް އިތުރު ކުންފުނިތަކަށް މަސްގަތުމުގެ ހުއްދަދިނެވެ. އެކަމުގެ ސަބަބަބުން މަހުގެ އަގު ކޮންޓްރޯލް ކުރެވިފައި އޮތްއޮތުން ބަދަލުވެގެންދިޔައެވެ.
މީގެ އިތުރުން މަސްވެރިކަމުގައި ބޭނުންކުރާ އެކި އާލާތްތަކުން ޑިއުޓީ ކަނޑާލުމުން އެކަންކަމަށް ކުރާ ހޭދަ ބޮޑުތަނުން ކުޑަވިއެވެ. މަސްވެރިކަން ކުރިއަރުވާ ރާއްޖެއިން ބޭރަށް މަސްބޭރުމުގައި ގެންގުޅޭ އުކުޅުތައް ބަދަލުކޮށް ބޭރު ދުނިޔޭގެ ރަގަޅު މާކެޓްކުރުމަކީވެސް ސަރުކާރުން ކުރަމުންގެންދާ މަސައްކަތެކެވެ.
ބޮޑުކަންނެލި މާކެޓް ކުރުމުގައިވެސް ދަތިތަކެއް ހުރިކަން ސަރުކާރުން ގަބޫލުކުރެއެވެ. އެގޮތުން ބޮޑުކަންނެލި ރާއްޖެއިން ބޭރަށް މާކެޓް ކުރުމުގައި ހުރި ގޮންޖެހުންތައް ދެނެގަނެ އެކަންކަން ހައްލުކޮށް ބޮޑުކަންނެލީގެ މަހަށް ހަމަ އަގު ހޯދައިދިނުމަށްވެސް ސަރުކާރުން އަންނަނީ މަސައްކަތްކުރަމުންނެވެ.
ރާއްޖޭގެ އިޤްތިސާދީ ދުވެހި ހަލުވިކުރުމަށްޓަކައި ސަރުކާރުން މިއަހަރު ހިންގި މެރިކަލްޗަރ ޕައިލެޓް ޕްރޮގްރާމަކީވެސް މިފަދަ ދުވަހެއްގައި ފާހަގަކޮށްލަން ޖެހޭކަމެކެވެ. އެގޮތުން ކަސް ފާނަ އާލާކޮށް ރައްޔިތުންނަށް ނަފާ ނެރެދިނުމަށް ހިނގި ޕައިލެޓް ޕްރޮގްރާމް ކުރިއަށްގެންގޮސްފައިވަނީ އދ އަތޮޅުގެ ބައެއް ރަށްތަކުގައެވެ.
މި ސަރަހައްދުގެ މަހުގެ އަގު ކަނޑައެޅުމުގެ ބާރު ދިވެހިންނަށް އޮންނަންޖެހޭނެކަމަށާ، މިކަން ހާސިލު ކުުރުމަށްޓަކައި، ރާއްޖޭގައި މަސްވެރިކަމުގައި ގެންގުޅޭ ސިޔާސަތުތަކަށް ބަދަލު ގެންނަވާނެ ކަމަށް މަސްވެރިންގެ ދުވަސް ފާހަގަކުރުމަށް މިދިޔަ އަހަރު ދަރުބާރުގޭގައި ބޭއްވި ޖަލްސާގައި ރައީސުލް ޖުމްޙޫރިއްޔާ އިބްރާޙިމް މުޙައްމަދު ސާލިޙް ވަނީ ވިދާޅުވެފައެވެ. މި މަސައްކަތްވެސް ސަރުކާރު ތެރެއިން ކުރެވެމުންދާކަމަށް މަސްވެރިކަމާ ބެހޭ ވުޒާރާއިން ވިދާޅުވެއެވެ.