މާލެއަތޮޅު މާފުށީ ފަޅާ މޫދަށް ބައެއް މީހުން ކުނިއަޅާތީ އެކަން ހުއްޓުވުމަށް ކުރަންޖެހޭ ކަންކަން ވަގުތުކުރުމަށް އެރަށު ކައުންސިލަށް އެންވަޔަރަންމަންޓަލް ޕްރޮޓެކްޝަން އެޖެންސީން އަންގައިފިއެވެ.
މާފުށީގައި ކުނި މެނޭޖްކުރުމަށް އެކަށީގެންވާ ޖާގައާއި ވަޞީލަތްތައް ނެތްކަމަށް ބުނެ ރަށުގެ ފަޅުން ބައެއްގައި ދާ ޖަހައިގެން ކުނި މެނޭޖްކުރާތާ އަހަރުތަކެއް ވަނީ ވެފައެވެ. ނަމަވެސް ދާގަނޑުން ތަންތަންކޮޅު ކަނޑައިގެންގޮސް ކޮށި ޖަހާފައިވާ ސަރަޙައްދުން ބޭރަށްވެސް ކުނި ޖަމާވާތީ ރަށުގެ ރައްޔިތުންވެސް އަންނަނީ އެކަމުގެ ކަންބޮޑުވުން ފާޅުކުރަމުންނެވެ. އަދި މިކަމުގެ ސަބަބުން އަލަށް ހިއްކާފައިވާ ސަރަޙައްދަށްވެސް ކުނިޖަމާވެ މާފުށީ ކައިރީގައި ހުރި ފަރުތައްވެސް އަންނަނީ ތަޣައްޔަރުވަމުންނެވެ.
އެތައް ބައެއްގެ ނުރުހުން މިކަމަށް ބޮޑުވެ ސޯޝަލް މީޑިއާގައިވެސް ގިނަ ބަޔަކު މިކަމާއި ދެކޮޅަށް ވަކާލަތުކުރަމުން އަންނަނިކޮށް އީީޕީއޭއިން މިވަނީ މަފުށީ ކައުންސިލަށް އިންޒާރުތަކެއް ދީފައެވެ. އެގޮތުން ކުނި މެނޭޖްކުރުމުގެ ޤަވައިދުތަކާއި އެއްގޮތަށް އެރަށުގެ ވޭސްޓް މެނޭޖްމަންޓް ޕްލޭން ތައްޔާރުކޮށް އެ އެޖެންސީއަށް ހުށައެޅުމަށް އިޕީއޭއިން ވަނީ އަންގާފައެވެ. އަދި ރަށުގައި އުފެދޭ ކުންޏަށް މިހާރު ހަދަމުން އަންނަގޮތްވެސް ތަފްސީލާއިއެކު ހުށައެޅުމަށްވެސް އީޕީއޭއިން ވަނީ މަފުށީ ކައުންސިލަށް އަންގާފައެވެ.
މީގެއިތުރުން ކުނި މެނޭޖްކުރާނެ ސެންޓަރެއް ގާއިމުކުރެވެންދެން ރަށުގައި އުފައްދާ ކުނި އަޅާނެ ވަކި ސަރަޙައްދެއް ކައުންސިލުން ކަނޑައަޅާ އެކަމުގެ ހުއްދަ އީޕީއޭއިން ނެގުމަށްވެސް އިޕީއޭގެ އިންޒާރުގައިވެއެެވެ. އަދި ރަށުގައި ބަހައްޓާފައިވާ އިންސަނެރޭޓަރުގެ ބޭނުން ހިފުމަށްވެސް އީ.ޕީ.އޭއިން މަފުށީ ކައުންސިލަށް އަންގާފައެވެ.
މާފުށީ ފަޅުތެރެއަށާއި އަތިރިމަތި ސަރަޙައްދަށް ކުނި އަޅަމުންދާ ފަރާތްތައް ހޯދައި އެކަން ހުއްޓުމަށް އަޅަންޖެހޭ އެންމެހާ ފިޔަވަޅުތައް އަޅައި، އެކަމުގައި އެޅި ފިޔަވަޅުތައްވެސް އަންގަން އީ.ޕީ.އޭއިން ވަނީ މާފުށީ ކައުންސިލަށް އަމުރުކޮށްފައެވެ. އަދި މާފުށީގައި މިހާރު ކުނި މެނޭޖްކުރަމުންދަނީ ތިމާވެއްޓާ އެންމެ ރައްޓެހިގޮތަށްކަމަށްނުވާތީ، ރަށުގެ ފަޅުތެރެއަށާއި މޫދުގައި ފެންސް ޖަހައިގެން ކުނި އެޅުން ވަގުތުން ހުއްޓާލާ، އެ ސަރަޙައްދަށް އަޅާފައިވާ ކުނިތައް ނަގާ ސާފުކުރުމަށްވެސް އީޕީއޭއިން މާފުށީ ކައުންސިލަށް ފޮނުވި އިންޒާރުގައިވެއެވެ.
މިކަންކަން ހައްލުކުރުމަށް ތަކުރާރުކޮށް އެކި ފަހަރުމަތިން މާފުށީ ކައުންސިލަށް މީގެކުރިންވެސް އަންގާފައިވާނެކަންވެސް އީޕީއޭގެ އެންގުމުގައިވެއެވެ. އީ.ޕީ.އޭއިން ވިދާޅުވީ، މި މައްސަލަ ބަލައި އެކަން އިންސްޕެކްޓް ކުރުމަށް އެ އިދާރާގެ މެމްބަރުންނާއި އެންވަޔަރަމަންޓް މިނިސްޓްރީ އާއި، އެލް.ޖީ.އޭ ހިމެނޭހެން ޚާއްސަ ޓީމެއް އަންނަ އާދިއްތަ ދުވަހު މާފުއްޓަށް ދިއުމަށް ހަމަޖެހިފައިވާކަމަށެވެ.
މާފުށިން ދުވާލެއްގެ މައްޗަށް ގާތްގަނޑަކަށް 5 ޓަނުގެ ކުނި އުފައްދާއިރު، އެތަކެތި ރައްކާތެރިގޮތުގައި ނައްތާލެވޭވަރުގެ ފެސިލިޓީއެއް ރަށުގައި ގާއިމުވެފައިނެތްކަން އެ ރަށުގެ ކައުންސިލުން ފާހަގަކުރައްވައެވެ. ޕީ.އެސް.އެމް ނިއުސްއަށް މަޢުލޫމާތުދެއްވަމުން މާފުށީ ކައުންސިލުގެ ރައީސް ޢުޘްމާން ރަޝީދު ވިދާޅުވީ، ކުނީގެ މައްސަލައަށް އަވަސް ހައްލެއް ގެނައުމަށްޓަކާ ކައުންސިލުގެ ފަރާތުން ސަރުކާރުގެ ކަމާބެހޭ ފަރާތްތަކުގެ ސަމާލުކަމަށް މިކަން އެކި ފަހަރުމަތިން ގެނެސްފައިވާކަމަށެވެ.
ރަށުގެ ކުނިމެނޭޖްކުރުމުގެ ކަންކަން ހަރުދަނާކުރުމަށް، ދުވާލެއްގެ މައްޗަށް 4 ޓަނުގެ ކުނި ނައްތާލުމުގެ ޤާބިލުކަން ލިބިފައިވާ އިންސިނިރޭޓަރެއް ގެންގޮސް، މިދިޔަ އަހަރު އެ ރަށުގައި ވަނީ އިންސްޓޯލްކޮށްފައެވެ. އެހެންނަމަވެސް މި އިންސެނޭޓަރގެ މަސައްކަތް ރަނގަޅަށް ނުފެށި ލަސްވެފައިވަނީ އެކަމަށް އަންނަން އޮތް އިންޖިނިއަރުންގެ ޓީމަށް ކޯވިޑާއި ހެދިގެން އައުން ލަސްވުމުންކަމަށް ކައުންސިލުގެ ރައީސް ޢުޘްމާން ވިދާޅުވިއެވެ. އަދި މިއަދާއި ހަމައަށްވެސް އިންސިނިރޭޓަރު ބޭނުން ނުކުރެވިވަނީ، އެއާއެކީ ޤާއިމުކުރަންޖެހޭ އިތުރު ވަޞީލަތްތައް ރަށުގައި ޤާއިމުވެފައިނެތުމުންކަމަށް ކައުންސިލުގެ ރައީސް ފާހަގަކުރެއްވިއެވެ.
"އިންސިނިރޭޓަރު އެކަނި އަދި މި ލިބުނީ. އެކަމު ކުނި މެނޭޖްކުރާ ސެންޓަރަށް ބޭނުންވާ އިތުރު ވަޞީލަތެއްނެތް. ކަލެކްޝަން ޕޮއިންޓުތަކެއްވެސް އަދި ޤާއިމުވެފައެއްނެތް. މި އިންސިނިރޭޓަރަކީ ވަރަށް ހައި ޓެމްޕަރޭޗަރގައި މަސައްކަތްކުރާ އެއްޗެއް. ގާތްގަނޑަކަށް 800 ޑިގްރީގައި ހޫނު މިން ހުންނާނެ. ކޮންމެ ފަރަހަކުވެސް އޭގެ ލޯޑެއް އަނދާ ނިމުނީމަ، އަނެއްކާވެސް އޭގެ މަތި ނަގާފައި އަލުން ކުނި ލޯޑުކުރަން މިޖެހެނީ. އިންސާނަކަށް އަޅުގަނޑު ޤަބޫލެއް ނުކުރަން އެހާ ކައިރިއަށް ގޮސްގެން އެކަން ކުރަން ފަސޭހަވެދާނެކަމަކަށް. މިނިސްޓްރީން ވިދާޅުވެފައި އޮތީ ކުނި ލޯޑުކުރާނެ ޚާއްސަ ވެހިކަލްއަކާއި އެހެނިހެން ވަސީލަތްތައްވެސް ހަމަޖެހެމުން އަންނަކަމަށް" ޢުޘްމާން ވިދާޅުވިއެވެ.
މާފުށީގައި ރައްކާތެރިގޮތުގައި ކުނިމެނޭޖްކުރުމަށް ބޭނުންވާ މަސައްކަތްކުރެވެން އޮތީ، އިންސިނިރޭޓަރ ކޮމިޝަންކުރެވި، ކުނި މެނޭޖްކުރުމަށް ބޭނުންވާ ސާމާނާއި، ވެހިކަލާއި، އަދި މުވައްޒަފުން ލިބިގެންކަމަށް މާފުށީ ކައުންސިލުން ފާހަގަކުރައްވާފައިވެއެވެ. އެކަން އަވަސްކުރުމަށްޓަކާ ސަރުކާރުގެ ފަރާތުން ބޭނުންވާ އެހީތެރިކަމާއި އެއްބާރުލުން ދެއްވާނެކަމުގެ ޔަޤީންކަން އެންވަޔަރަމަންޓް މިނިސްޓްރީން ކައުންސިލަށް ދީފައިވާކަމަށް ކައުންސިލުގެ ރައީސް ޢުޘްމާން ވިދާޅުވެފައިވެއެވެ. އަދި މިއަހަރުގެ ކައުންސިލު ބަޖެޓުގައި ކުނި މެނޭޖްކުރުމަށް ޚާއްސަ އިސްކަމެއްދީގެން ގިނަ ކަންތައްތަކެއް ހިމަނާފައިވާނެކަމަށްވެސް ޢުޘްމާން ވިދާޅުވިއެވެ.