އަކްޝޭ ކުމާރު ލީޑު ރޯލުން ފެނިގެންދިއަ ފިލްމު "މިޝަން މަންގަލް"ގެ ޑައިރެކަޓަރ ޖަގަން ޝަކްތީއާއެކު އަނެއްކާވެސް އަކްޝޭ ފިލްމަކަށް ތައްޔާރުވެއްޖެއެވެ. 2019 ވަނަ އަހަރު ރިލީޒްކުރި ފިލްމު "މިޝަން މަންގަލް" އާއި އެއްގޮތަށް މިފަހަރުގެ ފިލްމަކީވެސް ޙަޤީޤީ ޙާދިސާތަކެއްގެ މައްޗަށް ބިނާކޮށް ހަދާ އެކްޝަން ޑްރާމާ ފިލްމުކެވެ.
އަކްޝޭއާއި ޖަގަން ފުރަމަތަ މަސައްކަތްކުރި ފިލްމު "މިޝަން މަންގަލް" އަކީ އިންޑިއަން ސްޕޭސް ރިސާރޗް އޮގަނައިޒޭޝަން ގައި އުޅުނު ސައިންސްވެރިން ތަކެއްގެ މައްޗަށް ބިނާކޮށް ހަދާފައިވާ ފިލްމެކެވެ. މި ފިލްމްވަނީ ބޮކްސް އޮފީހުގައި ގިނަ ކާމިޔާބީތަކެއް ހޯދާފައެވެ.
އަލަށް ނެރުމަށް ހަމަޖެހިފައިވާ މި ފިލުމަކީވެސް މިކަހަލަ ޙަޤީޤީ ވާހަކަތަކެއްގެ މައްޗަށް ހަދާ ފިލްމެކެވެ. ފިލުމުގެ ސްކްރިޕްޓް ހަދާ ނިމި އަންނަ އަހަރު ޝޫޓިންތައް ފެށޭނެވަރުވާނެއެވެ. އަކްޝޭގެ ނިންމަންޖެހޭ އެހެން ޕްރޮޖެކްޓްތައް ނިމުނުހާ އަވަހަކަށް ފިލްމުގެ ޝޫޓިންތައް ފަށާނެކަމުގައި ރިޕޯޓްތައް ބުނެއެވެ.
އަކްޝޭ ކުމާރަކީ ގިނަ ބައެއްގެ މެދުގައި މަގްބޫލު ތަރިއެކެވެ. އުމުރުން 53 އަހަރުގެ އަކްޝޭ ކުމާރް ވަނީ ފިލްމީ ދާއިރާއިން އެވޯޑުތަކެއް ހާސިލް ކޮށްފައެވެ. އެގޮތުން ބަލާއިރު، 2008 ވަނަ އަހަރު އައިޓީއޭ ޕޮޕިއުލާ އައިކަން އެވޯޑާއި 2010، 2011، 2012 މި ތިން އަހަރު ޖެހި ޖެހިގެން ސްޓާ ޑަސްޓުގެ "ބެސްޓް ކޮމެޑީ" އަދި "ރޮމޭންސް އެކްޓަރު" ލިބިފައިވެއެވެ. މީގެ އިތުރުން 2009 ވަނަ އަހަރު އަކްޝޭވަނީ ޕަދްމަޝްރީ އެވޯޑްވެސް ޙާޞިލްކޮށްފައެވެ.
އަކްޝޭ ކުމާރް މިހާތަނަށް 113 ފިލްމެއް ކުޅެފައިވާ އިރު 52 ފިލްމަކީ ވަރަށް ކާމިޔާބު ފިލްމުތަކެކެވެ. މި ފަހުން މަޝްހޫރު ވެފައިވާ ފިލްމު ތަކުގެ ތެރޭގައި "ހައުސްފުލް 4" އާއި "ގުޑް ނިއުޒް" ހިމެނެއެވެ. އަކްޝޭގެ ކުރިއަށް ހުރި ފިލްމުތަކުގެ ތެރޭގައި ރޯހިތް ޝެޓީގެ "ސޫރްޔަވަންޝީ،" "ބެލްބޮޓޮމް" "އަތްރަންގީރޭ" "ރަކްޝާބަންދަން" "ޕްރިތްވީ ރާޖް" އަދި "ރާމް ސެޓޫ" ހިމެނެއެވެ.