ރޯދައަށް ވީއްލާ ގަޑީގައި ވަރަށް ކާލާނަމޭ ހިތާ ސުފުރާ މައްޗަށް އެކި ބާވަތްތައް ތައްޔާރުކޮށް ރޯދަ ވީއްލާ ފަހުން އެތަކެތި ނުކެވިގެން އުކާލަންޖެހުމަކީ ރޯދަމަހު ވަރަށް ގިނައިން ދިމާވާ ކަމެކެވެ. އިސްރާފުގެ މިބައި ބައެއް ގޭގެއިން ފެންނައިރު ކާނެ އެއްޗެއް ނެތިގެން މަގުމައްޗަށް ނެރެފައި ހުންނަ ކުނިކޮތަޅު ހާވާއިގެން ހައި ހޫނުކަން ފިލުވަންޖެހޭ ޙާލަތުގައި ތިބި ބަޔަކުވެސް މިމާލޭގައި ތިބިކަމީ ޤަބޫލުކުރަން ދަތި ހަގީގަތެވެ. ދިވެހި ޒުވާނުންތަކެއް އިސްނަގައިގެން މިކަމަށް މިރޯދަމަހުމިވަނީ ހައްލު ހޯދާދީފައެވެ.
އަމިއްލަ ގެއިން އިސްރާފު ކުޑަކުރުމަށް އެޅި ފިޔަވަޅަކީ ހަމައެކަނި އެގެއާއި ހިސާބުން ނިންމާލާކަމަކަށް ހަދަން ޝައްމާ ޢަބްދުލްޤައްޔޫމް، ޝައްމަ ބޭނުމެއް ނުވިއެވެ. އެންމެން ކައިގެން މޫވްމެންޓާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެމުން ޝައްމަ ބުނީ މިޚިޔާލަކީ އަމިއްލަ ގޭގައި ގިނަ ބާވަތްތަކެއް ނުކެވި އުކާލަންޖެހުމުން އެތަކެތި އުކާނުލާ ބޭނުންޖެހިފައިވާ ބަޔަކަށް ދިނުމަށް އެއްރޭ ނިކުތް ހިސާބުން އުފެދުނު ޚިޔާލެއް ކަމަށެވެ. އަމިއްލަ ގޭގެ ބަދިގެއިން އެންމެން ކައިގެން މޫވްމަންޓް ފެށިނަމަވެސް އިސްރާފުގެ ބައި ކުޑަކުރުމަށް ބޭނުންވާނެ އިތުރު މީހުން ތިބެދާނެ ކަމަށް ވިސްނާ މިމަސައްކަތް ފުޅާކުރަން ޝައްމަ ބޭނުންވިއެވެ.
"އަޅުގަނޑުމެންނަށް ފެނުނު ކޯވިޑްގެ ސަބަބުން ވަރަށް ޙާލުގަ މީހުން އުޅޭތަން. އަޅުގަނޑުމެން ކައިގެން ތިއްބަސް ކާނެ އެއްޗެއް ނެތި އަދި ކާބޯތަކެތި އަގު ބޮޑުވީމަ ރަނގަޅަށް ކާލަން ނުލިބޭ މީހުންވެސް. ކުނިކޮތަޅު ހާވައިގެން ކާންޖެހިފަ ތިބި ޒުވާނުން މިމާލެއިން އަޅުގަނޑުމެންނަށް ފެނިއްޖެ. އެކަމަށްވެސް ޙައްލެއް ބޭނުންވީ." ޝައްމަ ބުންޏެވެ.
އެހެންކަމުން އެއްދުވަސްތެރޭ ޔޫތު މިނިސްޓްރީގެ އެހީގައި ހ.މުނިއުފާ ނުވަތަ ހެންވޭރު ޔޫތު ސެންޓަރުގައި މިކަމަށް ޚާއްސަ ޓެންޓެއް ޖަހާ ރޭގަނޑުގެ 21:30އިން ފެށިގެން 12:00 ޖެހުމާ ހަމައަށް ކާބޯތަކެތި ބަލައިގަނެ ބޭނުން ޖެހިގެން އަންނަ މީހުންނަށް ބެހުމުގެ މަސައްކަތް އަންނަނީ ކުރަމުންނެވެ. މިމަހުގެ 20 ވަނަ ދުވަހު ސޯޝަލް މީޑިއާގައި ޖެހި ޕޯސްޓަކާއެކު މިކަމަށް ބޭނުންވެފައި ތިބި އެތައް ބަޔަކު ތިބިކަންވަނީ އެނގިފައެވެ.
އެންމެން ކައިގެން މޫވްމަންޓަށް ހަފްތާއެއްވުމާ ގާތްވެފައިވާއިރު މި ޙަރަކާތަށް ގިނަބައެއްގެ ޝައުގުވެރިކަންވެސް ވަނީ ހުއްޓިފައެވެ. އެގޮތުން މިކަމަށް އެއްބާރުލުން ދިނުމުގެ ގޮތުން ބައެއް ފަރާތްތަކުންވަނީ އެކަމުގައި ބޭނުންކުރުމަށް މޭޒާއި ޓެންޓާއި ލައިޓްވެސް ހަދިޔާކޮށްފައެވެ.
އިތުރު ސަރަޙައްދެއްގައި އެންމެން ކައިގެން މޫވްމަންޓް ހިންގުމަށް ވިސްނުން ހުރިތޯ ސުވާލުކުރުމުން ޝައްމަ ބުނީ މިކަން އެންމެ ފުރަތަމަ ފެށި ރޭވެސް ހުޅުމާލެއިންވެސް މީހުން ކާބޯތަކެތި ގެނެސްފައިވާކަމަށެވެ. އެހެންކަމުން މިހާރު އެޗްޑީސީއިން އިސްނަގައިގެން އެންމެން ކައިގެން ޙަރަކާތާއި ގުޅިގެން ހުޅުމާލޭގައިވެސް މިކަން ކުރިއަށް ގެންދިޔުމުގެ މަސައްކަތްކުރަމުން އަންނަ ކަމަށް ޝައްމަ ބުންޏެވެ.
"އަޅުގަނޑުމެން އެދެނީ މިކަމުގައި އެހީތެރިވާނެ ވޮލަންޓިއަރުން. ތަންވެސް ހަމަޖެހިދާނެ އެކަމަކު މިއީ އެތައް ބަޔަކަށް ރައްކާތެރި ކާބޯތަކެތި ފޯރުކޮށްދިނުމުގެ މަސައްކަތެއް. ފާހަގަކޮށްލަން ބޭނުން ގޭ ކުދިންނާއި ބައެއް ރައްޓެހިންނާއެކު މިހާރުވެސް މިކަމުގައި އަމިއްލައަށް ޕޭޖަށް މެސެޖުކޮށްގެން އެހީތެރިވާން އައިސްތިބި ކުދިންވެސް އެބަތިބި."ޝައްމަ ބުންޏެވެ.
އެންމެން ކައިގެން މޫވްމަންޓަކީ ގޭގައި ބާކީވާ ކާބޯތަކެތި ރައްކާތެރިކަމާއެކު އެކަމަށް އެދިއެދި ތިބި މީހުނަށް ފޯރުކޮށްދިނުމަށް ހިންގާ ޙަރަކާތެކެވެ. އެހެންކަމުން ކާބޯތަކެތި ގެންނައިރު ޑިސްޕޯސަބަލް ތަކެތީގައި ބަންދުކޮށްގެން ގެނައުމަށް މިޙަރަކާތް އިންތިޒާމުކުރާ ފަރާތްތަކުން އެދެއެވެ. އަދި އެއްވެސް މީހަކު ނެތްނަމަ ކާތަކެތި ދޫކޮށްލާފައި ނުދިޔުމަކީވެސް އެފަރާތްތަކުގެ އެދުމެކެވެ.
ރޯދަމަހުގެ ދުވާލު ގަޑީގައި ރަސްމީ މަސައްކަތުގައި އުޅުމަށްފަހު ރޭގަނޑުގެ ވަގުތު ބޭނުންޖެހިފައިވާ މީހުންނަށް އެހީތެރިވުމަށް ޒުވާނުން މިފެށި ޙަރަކާތަކީ މިފަދަ ފުޅާގޮތެއްގައި ހިންގާ ފުރަތަމަ ޙަރަކާތެވެ.
ޚިޔާލު
ރަމަޟާން މަސް ނިމުނަސް މިކަން ކުރިޔަށް ގެންދަވަން ފެނޭ.
ޢިސްމާއިލް ނަސީރު
ހަގީގަތާ ހިލާފް ހަބަރެއް ކުނިކޮތަޅު ހާވަނީ ކާން ނުލިބިގެނެއް ނޫން، ހަކުރުބޯން ލާރިހޯދަން ވިއްކާނެ އެއްޗެއް ހޯދަން