ދަރްމާ ޕްރޮޑަކްޝަންއިން މިއަހަރު ގެނެސްދޭން ރަސްމީކޮށް ތާރީޚް ކަނޑައަޅާފައި އޮތް ހަމައެކަނި ފިލްމު "ލައިގާ" އެޅުވުންވެސް ކޯވިޑްގެ ބަލިމަޑުކަމާހެދި ލަސްވެއްޖެއެވެ.
ދަރްމާ އިން ބުނީ 9 މެއި ގައި ފިލްމުގެ ޕަވަރ ޕެކް ޓީޒަރ އެއް ގެނެސްދޭން ނިންމާފައި އޮތްކަމުގައިވިޔަސް ޤައުމު މިހާރު މިއޮތް ހާލާތުގައި ފިލްމު ލަސްކުރަން ނިންމާފައިވާކަމަށެވެ.
ޕޫރީ ޖަގްނާތް ޑައިރެކްޓްކޮށްފައިވާ މިފިލްމަކީ ތެލުގޫ އަދި ހިންދީ ބަހުން ހަދާ ފިލްމެކެވެ. ރޮމޭންޓިކް ސްޕޯރޓްސް އެކްޝަން ފިލްމުގެ ލީޑް ރޯލުން ފެނިގެންދާނީ 2011 ވަނަ އަހަރު ފިލްމީ ކެރިއަރ ފެށި ތެލުގޫ އެކްޓަރ ވިޖޭ ދެވަރަކޯންޑާއާއި ފިލްމު "ސްޓޫޑަންޓް އޮފް ދަ ޔިއަރ 2" ގެ ތަރި އަނަންޔާ ޕާންޑޭއެވެ. މި ފިލްމުގައި ވިޖޭ ފެނިގެންދަނީ ބޮކްސިން ކުޅުންތެރިއެއްގެ ރޯލުންނެވެ.
ވިޖޭ އަކީ މިހާރު ތެލެގޫ އެކްޓަރުންގެ ތެރެއިން އެންމެ މަޝްހޫރު އެކެކެވެ. އޭނާގެ ބޮޑަށް މަޝްހޫރުވެގެންދިޔައީ 2017 ގެ ނެރުނު ތެލުގޫ ފިލްމު "އަރުޖުން ރެޑީ" އިންނެވެ. އޭގެ ހިންދީ ރިމޭކް 2019 ގައި ޝާހިދު ކަޕޫރާ އެކު ގެނެސްދިނީ "ކަބީރް ސިންގް" ގެ ނަމުގަ އެވެ.
ފިލްމު 'ސްޓޫޑެންޓް އޮފް ދަ ޔިއަރ 2' ން އަލަށް ފެނިގެންދިޔަ ތަރި އަނަންޔާ އަކީ އަދި މިދާއިރާއަށް އައު ތަރިއެކެވެ. އޭނާ މިހާތަނަށް ކުޅެފައިވާ ފިލްމުތަކަކީ 'ސްޓޫޑަންޓް އޮފް ދަ ޔިއަރ 2' 'ޕަތީ ޕަތްނީ އޯރް ވޯ' 'އަންގްރޭޒީ މީޑިއަމް' އަދި 'ކާލީ ޕީލީ'އެވެ. ދެން އެންމެ އަވަހަށް އަނަންޔާ ފެނިގެންދާނީ ފިލްމު 'ލައިގާ' އިންނެވެ.