ކޯވިޑްގެ ބަލިމަޑުކަން މަޑުޖެހުމެއްނެތި އިންޑިއާގައި ފެތުރެމުންދާނީ އެޤައުމުވަނީ ފުރަންބަންދުކޮށް ގިނަ ފިޔަވަޅުތަކެއް އަޅާފައެވެ. ފިލްމު އިންޑަސްޓްރީއާއި އެއްގޮތަށް ޓީވީ އިންޑަސްޓްރީގެ މަސައްކަތްތަކަށްވެސް ވަނީ މިކަމުގެ ސަބަބުން ބޮޑެތި ބުރޫތަކެއް އަރާފައެވެ. ބައެއް ތަރިން މި ބައްޔަށް ޕޮޒިޓިވްވެ ބައެއްތަރިންވަނީ ބަލިން ރަގަޅުވެސް ވެފައެވެ. އަދި ބައެއް ތަރިން ވަނީ މި ދުނިޔެއާއި ވަކިވެސް ވެފައެވެ.
މަހާރަޝްތްރާ ސިޓީ ފުރަބަންދުކޮށްފައި އޮތުމުގެ ސަބަބުން ބައެއް ޓީވީ ޝޯތަކުން ޝޫޓިންތައްވެސް ވަނީ ގޯއާ، ގުޖުރާތު އަދި ހައިދަރުއާބާދު ފަދަ ތަންނަތަނަށް ބަދަލުކޮށްފައެވެ. މިގޮތުން ސްޓާރޕްލަސްއިން ދައްކާ ޓީވީ ޝޯ "އާޕް ކީ ނަޒްރޯން ނެ ސަމްޖާ" ވެސް ވަނީ ގޯއާއަށް ޝޫޓް ކުރުން ބަދަލުކޮށްފައެވެ. ނަމަވެސް ދާދިފަހުން ގޯއާ ސަރުކާރުން ވަނީ އެ ސްޓޭޓް ފުރަންބަންދުކުރުމުން އަނެއްކާވެސް މި ޓީމަށް މިވަނީ އެހެންގޮތެއް ހޯދާފައެވެ.
ގޯއާގެ ދޮރު ބަންދުވުމުން މި ޝޯ ގެ ޝޫޓިން އަނެއްކާވެސް މިވަނީ އިންޑިއާގެ ހުޅަނގުން ގުޖުރާތާއި މަހާރަޝްތްރާއާއި ދެމެދު އޮންނަ ސިލްވާސާއަށް ބަދަލުކޮށްފައެވެ. މިއީ މި ޝޯގެ ފޭނުންނަށް އޮތް އުފާވެރި ޚަބަރަކަށް ވީ ނަމަވެސް ޓީވީ އިންޑަސްޓްރީގެ އެހެން ޝޯތައް ކުރިއަށް ގެންދާކަމެއް ނުވަތަ ނޫން ކަމެއް އަދި ނޭގެއެވެ.
މިދިޔަ އަހަރު މާރިޗްގައި ފަށާފައިވާ މި ޝޯ އަކީ ބެންގާލީ ސީރީޒް އެއްކަމަށްވާ "ސަންޖޭރް ބާތީ" ގެ ރީމޭކެކެވެ. ފުލް ހައުސް މީޑިއާއިން ޕްރޮޑިއުސް ކުރާ ޝޯގެ ލީޑް ރޯލުން ފެނިގެންދަނީ ވިޖެޔަންދުރާ ކުމޭރިއާ އަދި ރިޗާ ރާތޯރްއެވެ.