ރައީސް ނަޝީދަށް ދިން ޙަމަލާއާ ގުޅިގެން ރާއްޖޭގެ އެކި ސަރަޙައްދުތަކުގައި ހަތިޔާރާއެކު ސިފައިން ހަރަކާތްތެރިވަނީ

މިމަހުގެ 6ވަނަ ދުވަހު ރައީސް ނަޝީދަށް ދިން ނުރައްކާތެރި ހަމަލާއާ ގުޅިގެން މާލެއާއި ރާއްޖޭގެ އެކި ސަރަޙައްދުތަކުގައި ހަތިޔާރާއެކު ސިފައިން ހަރަކާތްތެރިވާން ފަށައިފިއެވެ.

އެމްއެންޑީއެފުން ވިދާޅުވީ ރައީސް ނަޝީދަށް ދިން ޙަމަލާއާއި ގުޅިގެން މާލެ ސަރަޙައްދުގެ އިތުރުން ރާއްޖޭގެ އެކި ކަންކޮޅުތަކުގެ ސަލާމަތީކަންކަން ވަރުގަދަކޮށްފައިވާކަމަށެވެ. އަދި އެތަން ތަނުގައި ސިފައިން ހަތިޔާރާއެކު ހަރަކާތްތެރިވަމުން ގެންދާނެކަމަށްވެސް ޤައުމީ ދިފާޢީ ބާރުން ވަނީ ވިދާޅުވެފައެވެ.

ކުރީގެ ރައީސުލްޖުމްހޫރިއްޔާ އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު، ކާރުކޮޅަށް އަރާވަޑައިގަންނަވަނިކޮށް އެއްޗެއް ގޮއްވާލައި، އެމަނިކުފާނުގެ ހަށިކޮޅަށް ގެއްލުން ދިނުމާއި ގުޅިގެން އެމްއެންޑީއެފްގެ ސެކިއުރިޓީ ވަރުގަދަކޮށް، އެލާޓް ސްޓޭޓަސް ވަނީ މަތިކޮށްފައެވެ.

ރައީސް ނަޝީދަށް ދިން ހަމަލާއާއި ގުޅިގެން މިހާތަނަށް 3 މީހަކު ހައްޔަރުކޮށްފައިވާއިރު، މި ޙާދިސާގައި ގޮއްވާލި ބޮމާއި ގުޅޭ އިތުރު ކަންތައްތަކެއް ދެނެގަތުމުގެ މަސައްކަތް ސިފައިންނާއި ގުޅިގެން ފުލުހުންދަނީ ކުރަމުނެވެ.