ކުރިއަށް ޔޫރޯ ފުޓްބޯޅަ މުބާރާތުގައި ބެލްޖިއަމްގެ އެސިސްޓެންޓެއްގެ ގޮތުގައި މަސައްކަތްކުރުމަށް ތިއޮރީ އޮންރީ އެ ޓީމާ ގުޅޭ ގޮތަށް ހަމަޖެހިއްޖެއެވެ.
ވޯލްޑް ކަޕަށް ފަހު ބެލްޖިއަމްގެ ޓީމުން ވަކިވެ، އޮންރީ ގުޅުނީ ކުޅުންތެރިޔެއްގެ ގޮތުގައި އޭނާ ކެރިއާ ފެށި މޮނާކޯއާއެވެ. އެ ޓީމުގެ ހެޑް ކޯޗެއްގެ ގޮތުގައި މާ ކާމިޔާބު މަސައްކަތެއް އޭނާއަށް ނުކުރެވުނެވެ. އޭގެ ފަހުން އެމެރިކާގެ މޭޖާ ލީގުގައި މޮންޓެރެއާލްއަށް ކޯޗް ކޮށްދިނެވެ. ފަހުން ހަރަކާތްތެރިވީ އިނގިރޭސި ވިލާތުގެ ޓީވީ ޗެނަލްތަކުގައި ފުޓްބޯޅަ އެނަލިސްޓެއްގެ ގޮތުގައެވެ. ރަޝިއާގައި 2018 ގައި ބޭއްވި ވޯލްޑް ކަޕްގައި ބެލްޖިއަމްއަށް ތިން ވަނަ ހޯދައިދިނުމުގައި، ކޯޗް ރޮބާޓޯ މާޓިނޭޒަށް އެހީތެރިއެއްގެ ގޮތުގައި އޮންރީ ވަނީ މަސައްކަތް ކޮށްފައެވެ.
ބެލްޖިއަމްގެ ޓީމާ އެންމެ ފުރަތަމަ އޭނާ ގުޅުނީ 2016 ގެ މެދުތެރޭގައެވެ. ފްރާންސަށް 1998 ގެ ވޯލްޑް ކަޕް ހޯދައިދިނުމަށް މުހިންމު ދައުރެއް އަދާ ކުރި ކުޅުންތެރިޔާ ބެލްޖިއަމްގެ ކޯޗިން ޓީމާ ގުޅުމަކީ ޓީމަށް ލިބުނު އިތުރު ހިތްވަރެއް ކަމަށް ބެލްޖިއަމްގެ ފުޓްބޯޅަ އެސޯސިއޭޝަނުން ވަނީ ބުނެފައެވެ.