މަހެއްހާ ދުވަސްތެރޭ އެ ކްލަބްގެ ކޮންޓްރެކްޓް ހަމަވުމުން ތަޖުރިބާކާރު ޑިފެންޑަރު ސާޖިއޯ ރާމޯސް ވެސް ރެއާލް ދޫކޮށްލަން ނިންމާފައިވާކަމަށް ރިޕޯޓްތައް ބުނެފިއެވެ.
ސްޕެއިންގެ މީޑިއާ ރިޕޯޓްތައް ބުނާގޮތުން ރާމޯސް މިހާރު ނިންމައިގެން ހުރީ ކޮންޓްރެކްޓް ހަމަވުމުން ރެއާލް ދޫކޮށްލާށެވެ. ރާމޯސްގެ ގާތް ފަރާތްތަކާ ހަވާލާދީ ސްޕެއިންގެ ރޭޑިއޯ އަކުން ދާދި ފަހުން ވަނީ ރާމޯސް އަންނަ ސީޒަނުގައި ފެނުމުގެ ފުރުސަތު އޮތީ ސްޕެއިން ނޫން ގައުމެއްގެ ކްލަބަކުން ކަމަށް ބުނެފައެވެ. ސެވިއްޔާ ދޫކޮށް 2005 ވަނަ އަހަރު ރެއާލަށް ބަދަލުވި ރާމޯސް އެ ކްލަބާ އެކު ކޮންޓްރެކްޓްގައި ހުރީ އަންނަ މަހުގެ ނިޔަލަށެވެ.
މިހާތަނަށް ރާމޯސްއާ އެކު އާ ކޮންޓްރެކްޓެއް ހަދަން ރެއާލުން ކުރި އެއްވެސް މަސައްކަތަކަށް އަލިމަގެއް ފެންނަ ގޮތް ވަނީ ނުވެފައެވެ. ރާމޯސް ހޯދަން އެންމެ ބޮޑަށް މަސައްކަތް ކުރަނީ ފްރާންސްގެ ޕީއެސްޖީންނެވެ. ޕީއެސްޖީން ނިންމާފައިވަނީ އަހަރަކު 15 މިލިއަން ޑޮލަރު ލިބޭ ގޮތަށް ރާމޯސް އަށް ދެ އަހަރުގެ ކޮންޓްރެކްޓެއް ހުށަހަޅާށެވެ. ރާމޯސް ވަނީ އެ ގޮތަށް އެއްބަސްވެފައި ކަމަށް ފްރާންސްގެ މީޑިއާތަކުން ރިޕޯޓްކުރި ނަމަވެސް ރާމޯސްގެ އޭޖެންޓް ވަނީ އެކަން ދޮގުކޮށްފައެވެ.