2005 ވަނަ އަހަރު ދެއްކި ތަމަޅަ ފިލްމު "އަނިޔާން" ގެ ހިންދީ ރީމޭކްގައި މަސައްކަތް ކުރުމަށް ރަންވީރު ސިންގް ތައްޔާރުވެއްޖެއެވެ.
އެސް ޝަންކަރު ޑައިރެކްޓްކޮށްފައިވާ ސައިކްލޮޖިކަލް ތްރިލަރ ފިލްމު "އަނިޔާން" ގެ ހިންދީ ރީމޭކްވެސް ޑައިރެކްޓްކުރާނީ ޝަންކަރްއެވެ. ވަކި ނަމެއް އަދި ނުނިންމާ މި ފިލްމަކީ ޝަންކަރާއި އެކު ރަންވީރު މަސައްކަތްކުރާ ފުރަތަމަ ފިލްމެވެ.
ތަމަޅަ ހިޓް ފިލްމުތައްކަމަށްވާ "އެންތިރަން" އަދި "ޝިވާޖީ" އަކީވެސް ޝަންކަރުގެ ޑައިރެކްޝަނެވެ. ޝަންކަރަކީ ހިންދީ ސިނަމާތަކުގައި ހުރި މޮޅު ދުރިވިސްނޭ ޑައިރެކްޓަރެއްކަމަށް ބުނެ ޝަންކަރާއި އެކު މަސައްކަތް ކުރަން ނިންމި ކަން ރަންވީރު އިއުލާންކުރީ އޭނާގެ އިންސްޓަރގްރާމްގައެވެ. އަދި ޝަންކަރަކީ ވަރަށޤ ހުނަރުވެރި މޮޅު ޑައިރެކްޓަރެއްކަމަށް ބުނެ ރަންވީރުވަނީ ޝަންކަރަށް ތައުރީފު އޮއްސާލާފައެވެ.
"އަނިޔާން" ގެ ހިންދީ ރީމޭކްގެ ޕްރޮޑިއުސަރަކީ ޑޮކްޓަރ ޖަޔަންތީލާލް ގާދާ އެވެ. ރަންވީރުގެ އިތުރުން މި ފިލްމުގައި ސަދާ، ނެދުމުދީ ވޭނޫ، ނަސާރު އަދި ޕްރަކާޝް ރާޖޫ ވެސް ފެނިގެންދާނެއެވެ.
ތަމަޅަ ހިޓް "އަނިޔާން" އަށްވަނީ 53 ވަނަ ނެޝަނަލް ފިލްމު ފެއަރ އެވޯޑުން އެންމެ މޮޅު ސްޕެޝަލް އިފެކްޓް ފިލްމުގެ އެވޯޑް ލިބިފައެވެ. މީގެ އިތުރުން 53 ވަނަ ސައުތު ފިލްމު ފެއަރ އެވޯޑުން އެންމެ މޮޅު ފިލްމު، އެންމެ މޮޅު ޑައިރެކްޓަރ، އެންމެމޮޅު އެކްޓަރ، އެންމެ މޮޅު ލިރިކްސް، އެންމެމޮޅު އާރޓް ޑައިރެކްޓަރ، އެންމެމޮޅު މިޔުޒިކް ޑައިރެކްޓަރ، އެންމެމޮޅު އެކްޝަން ޑައިރެކްޓަރ އަދި އެންމެ މޮޅު ސިނެމަޓްގްރޮފަރ ގެ އެވޯޑްވެސް މި ފިލްމު ވަނީ ޙާޞިލް ކޮށްފައެވެ.