މާޅޮސްމަޑުލު އުތުރުބުރީ އިނގުރައިދޫގެ ބަނދަރު މަރާމާތުކުރުމުގެ މަސައްކަތް ފެށުމަށް ބޭނުންވާ ސާމާނާއި މެޝިނަރީޒް އެމް.ޓީ.ސީ.ސީން އެރަށަށް ގެންގޮސްފިއެވެ.ސަރުކާރުން އެ ބަނދަރު މަރާމާތުކުރުމަށް 300 ދުވަހުގެ މުއްދަތަކަށް އެމް.ޓީ.ސީ.ސީއާއި ހަވާލުކުރީ، މިއަހަރުގެ އޭޕްރީލްމަހުގައެވެ. 42.6 މިލިޔަން ރުފިޔާ ޚަރަދުކުރާ މި މަޝްރޫއުގެ ދަށުން އިނގުރައިދޫ ބަނދަރު މަރާމާތުކޮށް ނިމޭއިރު ބޮޑެތި ބަދަލުތަކެއް ގެނެވި، ފަޅުވެސް އިތުރަށް ބޮޑުވެގެންދާނެކަމަށް މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރއިން މަޢުލޫމާތުދެއްވައެވެ. އެގޮތުން ރަށުގައި މިހާރު ހަދާފައިވާ ބަނދަރު 750 ފޫޓަށް ބޮޑު ކުރާނެ ކަމަށް މިނިސްޓްރީން މަޢުލޫމާތު ދެއްވައެވެ.އަދި މި މަޝްރޫޢުގެ ދަށުން ބަނދަރު މަރާމާތު ކުރުމުގެ މަސައްކަތް ނިމޭއިރު، އޮޑިދޯނިފަހަރު އެހެލުމަށް ހާއްސަ ސަރަހައްދެއްވެސް ހެދިގެންދާނެކަމަށާއި، މި މަޝްރޫޢުގެ ހުރިހާ މަސައްކަތެއްވެސް ރަނގަޅު ފެންވަރަކަށް ކުރެއްވުމަށް ސަރުކާރުގެ ކަމާގުޅުންހުރި އިދާރާތަކުގެ އެއްބާރުލުން ލިބެމުންދާކަން އިނގުރައިދޫ ކައުންސިލްގެ ރައީސް އަބްދުލް ފައްތާހު ވަނީ ފާހަގަ ކުރައްވާފައެވެ.މި މަޝްރޫޢުގެ ދަށުން އިނގުރައިދޫ ބަނދަރުގައި 288 މީޓަރުގެ ބޮޑު ހިލައިގެ ބޭރު ތޮއްޓަކާއި، 353 މީޓަރުގެ އެއްގަމު ތޮއްޓެއްވެސް ލުމަށް ވަނީ ހަމަޖެހިފައެވެ. އަދި އެ ރަށުގެ ބަނދަރު ސައުވީސް ގަޑިއިރު ބޭނުންކުރެވޭނެގޮތް ހެދުމަށްޓަކާ އެއްގަމު ތޮށި ކައިރީގައި ލައިޓް ހަރުކުރުމަށްވެސް ހަމަޖެހިފައިވާކަމަށް ހައުސިންގ މިނިސްޓްރީން މަޢުލޫމާތު ދެއްވައެވެ. އިނގުރައިދޫގައި ސޯޅަ ސަތޭކައެއްހާ މީހުންގެ އާބާދީއެއް ދިރިއުޅެއެވެ.