އިންޑޮނޭޝިއާގައި ބުރުގާ އެޅި ތިން މެމްބަރުންގެ މައްޗަށް އެކުލެވޭ ބޭންޑް "ވީއޯބީ" ގެ މަޤުބޫލުކަން މިޔުޒިކްގެ ދުނިޔޭގައި އަންނަނީ އިތުރުވަމުންނެވެ. ރޮކް މިޔުޒިކްގެ ބައެއް ފަންނާނުންވެސް މިހާރުވަނީ މިބޭންޑުގެ ފޭނުންނަށް ވެފައެވެ.
2014 ވަނަ އަހަރުން ފެށިގެން އެކި މިޔުޒިކް ފެސްޓިވަލްގައި ލަވަތައް ކިޔަމުން އަންނަ މި ބޭންޑް މިހާހިސާބަށް އައުމަށް ގިނަ ދަތިތަކާއި ކުރިމަތިލާންޖެހިފައިވާ ކަމަށް އެމީހުން ބުނެއެވެ. ހުޅަނގު ޖާވާ ޕްރޮވިންސްފަދަ ހަރުކަށި މުޖުތަމަޢުއެއްގައި ބޮޑެތިވެފައިވާ ކުދިންތަކެއްކަމުން ޢާއިލާއާއި އަވަށްޓެރިންގެ ފަރާތުން މާބޮޑު ތަރުޙީބެއް ނުލިބޭކަމަށް ބޭންޑުން ބުނެއެވެ.
ސަރަހައްދުގެ މީހުންގެ ފާޑުކިޔުންތަކަށް ބޭންޑްގެ މެމްބަރުންގެ ވާހަކަތައް ތަފާތެވެ. ސްޓޭޖްގައި އޭނާ ހުންނައިރު މީހުން އޭނާގެ ކިބައިން އުންމީދުކުރާނެ ކަންތައްތަކާމެދު މާބޮޑަށް ނުވިސްނާ އަމިއްލަ މީހާހެ ހުނަރު ދައްކަލާލެވޭތޯ މަސައްކަތް ކުރާކަމަށް ބޭންޑްގެ 19 އަހަރުގެ ބޭސިސްޓް ވިދީ ރަޙްމަވަތީ ބުނެއެވެ. އެ މުޖުތަމަޢުން އުންމީދުކުރި ގޮތަށް އެމީހުން ތަބާވީނަމަ ސްކޫލް ނިންމާ ގޮތަށް ޖެހޭނީ ކައިވެނި ކުރަންކަމަށްވެސް މި ބޭންޑްގެ މެމްބަރުން ބުނެއެވެ.
20 އަހަރުގެ ލަވަންކިޔުންތެރިޔާ އަދި ލީޑް ގިޓަރިސްޓް ފިރުދާ މާޝިޔާ ބުނީ އޭނާގެ މައިންބަފައިން އޭނާއަށް ކިޔެވުމަށް މާބޮޑު ހިތްވަރެއް ނުދެއެވެ. އަދި ކައިވެނި ކުރުމުން ފިރިމީހާ ފޮތް ކިޔާކަށް ނުބުނާނެކަމަށާއި ބުނާނީ ކައްކާ ސާފުކުރުމަށްކަމަށްވުމުން އެކަން ކަންކަން ދަސްކުރަން މަންމަ ބާރު އެޅުވިކަމަށް ފިރުދާ ކިޔާދިނެވެ. ނަމަވެސް އާއިލާއާއި މުޖަތަމައުން ދިމާވި ހުރިހާ ހުރަސްތަކަށް ފަހު މި ބޭންޑަށް ކާމިޔާބީއާއި ހަމައަށް ވާޞިލުވެފައިވާކަމަށް އެމީހުން ދެކެއެވެ.
ކޯވިޑްގެ ބަލިމަޑުކަމާއި ހެދި ފުރަބަންދު ކޮށްފައި އޮތުމުން ބޭންޑުން ވަނީ އޮންލައިން ކޮންސެޓްތަކެއް ކުރިއަށް ގެންގޮސްފައެވެ. މިގޮތުން މި ވީޑިއޯތައް ބެލުމަށްފަހު ރޮކް ބޭންޑް ނިރުވާނާގެ ބޭސިސްޓް ކްރިސްޓް ނޮވޯސެލިކް އަދި ރޭގް ގެ ގިޓަރިސްޓް ޓޮމް މޯރެލޯގެ ޝައުޤުވެރިކަން ވަނީ ބޭންޑަށް ލިބިފައެވެ.