ފަލަސްޠީނުގެ ރައްޔިތުންނަށް އެހީތެރިކަމުގެ އަތެއް ފޯރުކޮށްދިނުމުގެ މަޤްޞަދުގައި، ވޭސްޓް މެނޭޖްމަންޓް ކޯޕަރޭޝަން ލިމިޓެޑް، ވެމްކޯއިން 50،000 ރުފިޔާގެ ފައިސާގެ އެހީއެއް އިންޓަރނޭޝަނަލް އެއިޑް ކެމްޕެއިން (އައިއޭސީ) އާއި ޙަވާލުކޮށްފިއެވެ.
މިއަދު ވެމްކޯގައި ބޭއްވި ބައްދަލުވުމެއްގައި ފައިސާގެ އެހީ އައިއޭސީ އާއި ޙަވާލުކުރެއްވީ ވެމްކޯގެ މެނޭޖިންގ ޑިރެކްޓަރ އާދަމް އަހުމަދެވެ.
ވެމްކޯއިން ފަލަސްޠީނުގެ ރައްޔިތުންނަށް ފައިސާގެ އެހީތެރިކަން ފޯރުކޮށްދިނުމުގެ ގޮތުންވަނީ ފަންޑް ރައިޒިންގ ޕްރޮގްރާމެއް ހިންގާފައެވެ. އެގޮތުން މިދިޔަ މެއި މަހުގެ 30 މިމަހުގެ 5 ވަނަ ދުވަހުގެ ނިއަލަށް ވެމްކޯގައި މިވަގުތު ކުނިނެގުމުގެ އޮފަރޭޝަން ހިންގާ ހުރިހާ ސައިޓުތަކެއްގައި ފަންޑް ފޮށިތައް ބަހައްޓާފައިވެއެވެ.
ޕީއެސްއެމްއަށް މައުލޫމާތު ދެއްވަމުން ވެމްކޯއިން ވިދާޅުވީ، ފަސް ދުވަހުގެ މުއްދަތަށް ކުރިޔަށް ގެންދިޔަ ފަންޑް ރައިޒިންގ މަސައްކަތުގައި މުވައްޒަފުންގެ ފުރިހަމަ އެއްބާރުލުން ލިބުނުކަމަށާއި، ކޯވިޑް-19 އާއި ގުޅިގެން އަތްމަތި ދަތި ހާލަތުގައި ވެސް މުވައްޒަފުންގެ ދީލަތި އެހީތަކެއް ލިބުނުކަމަށެވެ. އަދި ފަންޑް ފޮށިތަކަށް ވަޑައިގެން އެހީތެރިކަން ފޯރުކޮށްދިނުމަށް އުޒުރިވެރިވި މުވައްޒަފުން އޮންލައިން ޓްރާސްފާ މެދުވެރިކޮށް އެހީތެރިކަން ފޯރުކޮށްދިން ކަމަށް ވެސް އެ ކޯޕަރޭޝަނުން ވިދާޅުވެއެވެ.
މިފަދަ ފަންޑް ރައިޒިން އިވެންޓެއް ކުރިޔަށް ގެންދިޔުމުގެ ބޭނުމަކީ ވެމްކޯގެ ރައްޔިތުން ފަލަސްޠީނާއި އެކު ތިބިކަން ހާމަކުރުމަށާއި، ފަލަސްޠީނުގެ ރައްޔިތުންނަށް ނުޙައްޤުން ލިބެމުންދާ ލާއިންސާނީ އަނިޔާތައް ހަރުކަށި އިބާރާތުން ކުށްވެރިކުރުން ކަމުގައިވެސް ވެމްކޯއިން ހާމަކުރައްވައެވެ.