މަލަޔާލަމް އަދި ތަމަޅަ ފިލްމުތަކުގެ މަޝްހޫރު އެކްޓަރ އަދި ޕްރޮޑިއުސަރ މޯހަންލާލުގެ ބޮޑު ޕްރޮޖެކްޓެއްކަމަށްވާ މަލަޔާލަމް ފިލްމު "މަރައްކާ: ދަ ލަޔަން އޮފް އެރޭބިއަން ސީ" ރިލީޒްކުރުން އަންނަ އޯގަސްޓުމަހު 12 އަށް ތާވަލުކޮށްފިއެވެ. މި ފިލްމު ރިލީޒް މި ކުރަނީ ކެރެލާގައި ކޮންމެ އަހަރަކު ފާހަގަކުރާ އޯނަމް ދުވަހާއި ދިމާކޮށެވެ.
މި ފިލްމު ރިލީޒްކުރަން ފުރަތަމަ އިއުލާންކުރީ މީގެ އަހަރެއްހާ ދުވަސްކުރިންނެވެ. އެހެންނަމަވެސް ކޯވިޑާއި ހެދި މިހާތަނަށްވެސް ފިލްމު އޮތީ ރިލީޒްނުކޮށް ބާއްވާފައެވެ. މޯހަންލާލުގެ ގާތް އެކުވެރިއެއްކަމަށްވާ ޕްރިޔާދަރްޝަން ޑައިރެކްޓްކޮށްފައިވާ މި ފިލްމުގައި ދައްކަނީ ކާލިކަޓް ގެ މަޝްހޫރު ނޭވީ ޗީފް ކުންހާލީ މަރައްކާރު ގެ ވާހަކައެވެ.
ކޮންމެ ރޯލަކަށްވެސް ފިޓް މޯހަންލާލް މި ފިލްމުގައި ކުޅެނީ މަރައްކާރު ގެ ރޯލެވެ. މޯހަންލާލުގެ އިތުރުން މަދޫ، މަންޖޫ ވެރިއަރ ވެސް ފިލްމުގައި ފެނިގެންދާނެއެވެ. ދެކުނު ސިނަމާ އަދި ބޮލީވުޑްގެ ތަރިންގެ އިތުރުން އިނގިރޭސިވިލާތުގެ 4 އެކްޓަރުން އަދި ޗައިނާގެ އެކްޓަރެއްވެސް މި ފިލްމުގައި ފެނިގެންދާނެއެވެ.
ކެރެލާގެ އިތުރުން ޕޭން އިންޑިއާ އާއި އެޤައުމުން ބޭރުގައިވެސް މި ފިލްމު އެއްދުވަހެއްގައި ރިލީޒްކުރަން ވަނީ ނިންމާފައެވެ.