ތާރީޚި ޝަޚްސިއްޔަތުތަކަށާއި ހާދިސާތަކުގެ މައްޗަށް ހަދާ ފިލްމުތަކާއި ދެކޮޅަށް އަޑުއުފުލުމަކީ އިންޑިއާގައި ޢާންމުކަމެކެވެ. "ޖޯދާ އަކްބަރު" އަދި "ޕަދްމާވަތު" މި ދެ ފިލްމުވެސް ވަނީ މިފަދަ ކަންތައްގަޑަކާއި ކުރިމަތިލާން ޖެހިފައެވެ. މި ފިލްމުތަކާއި އެއްގޮތަށް ހުޅަނގު އުތުރު އިންޑިއާގައި ކުރިން ވެރިކަން ކުރި ރަސްކަލެއްކަމަށްވާ ޕްރިތްވީ ޗޯހާންގެ މައްޗަށް ހަދާ ފިލްމު "ޕްރިތްވީރާޖް" މިވަނީ މި ކަންތައްގަނޑާއި ކުރިމަތިލާންޖެހިފައެވެ. މި ފިލްމާއި ދެކޮޅަށް އިންޑިއާގެ ޗަންދީގަރުގައި ދަނީ މުޒާހަރާކުރަމުންނެވެ.
ޔާޝް ރާޖް ފިލްމުސް އިން އަކްޝޭ ކުމާރާއެކު ހަދާ މި ބޮޑު ފިލްމުގެ ނަން ބަދަލުކުރުމަށް ގޮވާލާއި ޗަންދީގަރުގެ އަކިލް ބަރާތިޔާ ކްޝަތްރިޔާ މަހާސަބާ ކިޔާ ޖަމާޢަތަކުން ދަނީ އަޑު އުފުލަމުންނެވެ. އެމީހުން ބުނާގޮތުގައި ފިލްމުގެ ނަމުން ރަސްގެފާނަށް ފުރިހަމަ އިންސާފު ލިބިދިނުމަށްޓަކައި "ހިންދޫ ސަމަރާތް ޕްރިތްވީ ރާޖް ޗޯހާން" ނުވަތަ "އެމްޕަރަރ ޕްރިތްވީރާޖް ޗޯހާން"ގެ ނަމަށް ފިލްމުގެ ނަން ބަދަލުކުރަން ޖެހެއެވެ. މީގެއިތުރުން ފިލްމު ރިލީޒްކުރުމުގެ ކުރިން އެ ޖަމާޢަތް ތަމްސީލުކުރާ މީހަކަށް ފިލްމު ދެއްކުމަށްވެސް އެމީހުން ދަނީ ގޮވާލަމުންނެވެ.
މި މުޒާހަރާތަކުގައި ހަމައެކަނި ޕޯސްޓަރުތައް ހިފައިގެން މުޒާހަރާ ކުރުމުގެ އިތުރުން ފިލްމުގެ ޕްރޮޑިއުސަރ، ޑައިރެކްޓަރ އަދި އަކްޝޭގެ ފޮޓޯ ހިއްޕައިގެން ހަދާހުރި ބުދުތަކުގައި ރޯކޮށް ވަނީ އަންދާލާފައެވެ.
ހިސްޓޯރިކަލް އެކްޝަން ޑްރާމާއެއްކަމަށްވާ މި ފިލްމު ޑައިރެކްޓްކުރަނީ ޗަންދުރަޕްރަކާޝް ދިވޭދީ އެވެ. ޔާޝްރާޖް ފިލްމުސްއިން ޕްރޮޑިއުސްކުރާ މި ފިލްމުގެ ރަސްމީ ޓީޒަރ މޯޝަން ޕިކްޗަރ މިދިޔަ އަހަރުގެ ސެޕްޓެމްބަރުމަހު ވަނީ ދައްކާފައެވެ. އަދި އަންނަ ދިވާލީއަށް ދިމާކޮށް މިއަހަރުގެ ނޮވެމްބަރު މަހު ފިލްމު ރިލީޒްކުރަން ވަނީ ނިންމާފައެވެ. މީގެކުރިން ފިލްމު ރިލީޒްކުރަން ނިންމާފައި އޮތީ މިދިޔަ އަހަރުގެ ދިވާލީ އާއ ދިމާކޮށެވެ.
2017 ވަނަ އަހަރުގެ މިސް ވޯރލްޑް މަނީޝާ ޗިއްލަރު ފުރަތަމަ ފަހަރަށް ހިންދީ ފިލްމަކުން ފެނިގެންދާ "ޕްރިތްވީރާޖް" ގައި އަކްޝޭ އަދި މަނީޝާގެ އިތުރުން ސަންޖޭ ދަތު، ސޯނޫ ސޫދު، އަޝުތޯޝް ރާނާ، ސާކްޝީ ތަންވާރު، މާނަވް ވިޖް އަދި ލަލިތް ތިވާރީވެސް މުހިންމު ރޯލުތަކުން ފެނިގެންދާނެއެވެ.