ހަށިގަނޑުގެ އެކި ގުނަވަންތައް ދުޅަވެ ފުރާނައަށް ނުރައްކާވާ ބައްޔެއްކަމުގައިވާ މަލްޓިސިސްޓަމް އިންފްލެމޭޓަރީ ސިންޑްރޯމް އިން ޗިލްޑްރެން "މިސްކް" ރާއްޖޭގައި ކޯވިޑް ޖެހުނު ބައެއް ކުޑަކުދިންގެ ގައިން ފެނިފައިވާ ކަމަށް ކުޑަކުދިންގެ ޚާއްސަ ޑޮކްޓަރ ޑރ.އަޙްމަދު ފައިސަލް ވިދާޅުވެއްޖެއެވެ.
ފުރާނައަށް ނުރައްކާވާ މިބަލީގައި ބޮޑުވާރުވާ ކުދިންގެ ސިކުނޑިއާއި ކިޑްނީއާއި ލޮލާއި ހިތް ފަދަ ގުނަވަންތައް ބަލީގެ ސަބަބުން ދުޅަވެ ނުރައްކާތެރި ޙާލަތަށް ކުއްޖާ ދާކަމަށް ސިއްޙީ މާހިރުން ވިދާޅުވެއެވެ.
ޕީއެސްއެމް ނިއުސްއަށް ދެއްވި މަޢުލޫމާތުދެއްވަމުން ޑރ.އަޙްމަދު ފައިސަލް ވިދާޅުވީ މިސްކަކީ ހަށިގަނޑުގެ ކޮންމެވެސް ދެ ގުނަވަނެއް ޝާމިލުވެގެން ޖެހޭ ބައްޔެއްކަމަށެވެ. ބަލީގައި ހަށިގަނޑުގެ ކޮންމެވެސް ދެގުނަވަނެއް، މިސާލަކަށް ހިތާއި ފުއްޕާމޭ ނުވަތަ ސިކުނޑިއާއި ކިޑްނީ މިފަދައިން ދެގުނަވަނެއްގެ ޙިއްސާއާއެކު ބަލިޖެހުމަށް މެދުވެރިވާތީ މި ބައްޔަށް "މަލްޓިސިސްޓަމް ސިންޑްރޯމް" ނަމުން ނަން ދެވިފައިވާކަމަށް ޑޮކްޓަރ ވިދާޅުވިއެވެ.
މިސްކަކީ ކޯވިޑް ބަލި ތަޙައްމަލް ކުރަމުންދާ ކުދިންނާއި ބަލިން ރަނގަޅުވާ ކުދިންނަށް ވެސް ޖެހޭ ބައްޔެކެވެ. އަދި ކޯވިޑް ބަލިން ރަނގަޅުވާތާ 2 ހަފްތާ ފަހުން ވެސް މިބަލި ބައެއް ކުދިންގެ ގައިން ފެންނަ ކަމަށް ރެކޯޑް ކުރެވިފައިވާކަމަށް ފައިސަލް ވިދާޅުވިއެވެ. މިބަލި އާއްމުކޮށް ޖެހެނީ އުމުރުން 10 އަހަރާއި 11 އަހަރުން ދަށުގެ ކުދިންނަށެވެ. ނަމަވެސް އެހެންނިހެން އުމުރުފުރާތަކުގެ ކުދިންނަށް ވެސް ބަލިޖެހުން ގާތްކަމަށް އޭނާ ވިދާޅުވިއެވެ.
ކޮވިޑުގެ ރާޅަށްފަހު #MIS_C ޖެހިގެން އަންނަ ކުދިން ފެންނަން ފަށައިފި
— Ahmed Faisal (@Faisalnaifaru) June 21, 2021
ބަލީގެ ތެރޭގަޔާ ބަލި ން ރަނގަޅުވެ 2 ހަފްތާފަހުން އަންނަ ކުދިންވެސް އެބައުޅޭ
ގަދަހުމާއެކު ކަރުގަޔާ ގައިގާ ރިއްސުމާ ހޮޑުލުން ލޭގެ ޕުރެޝަރ ދަށްވުންފަފަ ތަފާތު ޢަލާމާތްތައް އެބަފެނޭ https://t.co/3vP3spQ5lD pic.twitter.com/JtUHCr2OUq
މިސްކަކީ ކޯވިޑުގެ ސަބަބުން ޖެހޭ ނުރައްކާތެރި ބައްޔެކެވެ. މިބަލީގެ ސަބަބުން ގަދަޔަށް ބަނޑުގައި ރިއްސުމާއި، ލޭގެ ޕްރެޝަރ ދައްވުންފަދަ ސިއްޙީ މައްސަލަތަކާ ކުރިމަތިލާން ޖެހެއެވެ. އަދި ކިޑްނީއާއި ސިކުނޑިއަށް ވެސް ބަލީގެ ސަބަބުން އަސަރުކުރާކަމަށް ފައިސަލް ވިދާޅުވިއެވެ.
ކޯވިޑް ބަލިޖެހުމަށްފަހު 2 ހަފްތާފަހުންވެސް މިބަލީގެ އަލާމާތްތައް ފެންނަން ފަށައެވެ. އެގޮތުން ގަދަޔަށް ކަރުގައި ރިއްސުމާއި، އުކުޅުވަޅަށް ތަދުވުމާއި، 39-40 ޑިގްރީއަށް ހުން ގަދަވުމާއި، ބޭރަށް ހިންގުން ފަދަ އަލާމާތްތައް ބަލީގެ ކުރީކޮޅު ފެންނަމުންދާ ކަމަށް ފައިސަލް ވިދާޅުވިއެވެ.
މީގެ އިތުރުން އަތާއިފައި އަދި ހަށިގަނޑު ރަތްވުން، އަތާއިފައި ދުޅަވުން، އަތާއިފައިން ހަންފޮޅުން، އެކިވައްތަރުގެ ބިހިތައް ނެގުން، ލޮލުގަ މަޑުނުލާ ލޯ ރަތްވުން، ކަރުގައި ގޮށްލުން އަދި ދުލާއި ތުންފަތާއި ކަރު ރަތްވުން ފަދަ އަލާމާތްތައް ހިމެނޭ ކަމަށް އޭނާ ވިދާޅުވިއެވެ.
#MIS_C
— Ahmed Faisal (@Faisalnaifaru) June 22, 2021
ކޮވިޑަށްފަހު ޢާއްމުކޮށް 2 ހަފްތާވަރުފަހުން
ޢަލާމާތްތައް؛
ކަރުގަ ރިއްސަންފެށިގޮތަށް ގުޑާނުލެވޭވަރަށް ތަދުވުން
އުކުޅުވަޅާ ސުކުރޯޓަމަށް ތަދުވުން
ހުންގަދަވިގޮތަށް މަޑުނުވުން، ވަރަށް ހުންގަދަ 39-40 ޑިގުރީއާދެމެދު
ބަނޑުގައިރިއްސާ ހޮޑުލުން، ބޭރަށްހިންގުން
ލޭގެ ޕުރެޝަރ ދަށްވުން
އިތުރަށް ޑޮކްޓަރ ވިދާޅުވީ، މިހާތަނަށް ރާއްޖެއިން ތިން އަހަރާއި ދިހަ އަހަރާއި ދެމެދުގެ އުމުރުފުރާގެ ހަތް ކުއްޖަކަށް މިބަލިޖެހިފައިވާކަމަށެވެ. ގިނައިން މިބަލީގެ އަސަރު ފެނިފައިވަނީ މާލޭ ސަރައްޙައްދަށް ނިސްބަތްވާ ކުދިންނަށް ނަމަވެސް އަތޮޅުތެރެއިންވެސް ބަލީގެ އަލާމާތް ފެނުނު ކުއްޖަކަށް ފަރުވާދެމުންދާކަމަށް ފައިސަލް ވިދާޅުވިއެވެ. އޭގެތެރެއިން ހަތަރު ކުދިން ކްރިޓިކަލް ހާލަތުގައި ވާއިރު، ތިން ކުދިންނަށް ފަރުވާދެމުންދަނީ އައިޖީއެމްއެޗް އައިސީޔޫގައެވެ. އަދި ޓްރީޓްޕޮގައި އެއް ކުއްޖަކަށް ފަރުވާދެމުންދާ ކަމަށް ވެސް ފައިސަލް ވިދާޅުވިއެވެ.
މިސްކަކީ ނުރައްކާތެރި ބައްޔެއްކަމުން، ބަލިން ރައްކާތެރިވުމަށް އެންމެ ފުރަތަމަ އަޅަންޖެހޭ ފިޔަވަޅަކީ ކޯވިޑުން ރައްކާތެރިވުންކަމުގައި ޑޮކްޓަރ ވިދާޅުވިއެވެ. އަދި އިތުރަށް ބަލިން ރައްކާތެރިވުމަށްޓަކައި ކޯވިޑުން ރައްކާތެރިވުމަށް އަޅަންޖެހޭ ހުރިހާ ފިޔަވަޅުތައް އެޅުމަށް ފައިސަލް އިރުޝާދުދެއްވިއެވެ. ހަމައެއާއެކު ބަލިޖެހުމާއެކު ގިނައިން ދިޔާއެއްޗެހި ކުދިންނަށް ދިނުމާއި، ދިޔާއެއްޗެހި ދޭއިރު އެއްފަހަރާ ދިޔާއެއްޗެހި ނުދީ މަދުމަދުން ދިނުމަށްވެސް ފައިސަލް ވިދާޅުވިއެވެ. ބަލީގެ ބާވަތާއި، ބަލި ދެނެގަންނާނެ ގޮތާއި، ޢަލާމާތްތައް ބަލީގެ ކުރީކޮޅުގައި ފާހަގަކޮށް ފަރުވާހޯދުމަށް އަވަސްވެގަތުމަށްވެސް ފައިސަލް އިލްތިމާސްކުރެއްވިއެވެ.