ހިންދީ ފްރެންޗައިޒް ފިލްމުތަކުން އެންމެ ހިނގި އެއް ސީރީޒަކީ "ރޭސް" އެވެ. ބޮލީވުޑްގެ މަޝްހޫރު އެކްޝަން ތްރިލަރގެ ފުރަތަމަ ދެ ބައިންވެސް ފެނިގެންދިޔައީ ސައިފް އަލީ ހާނާއި އަނިލް ކަޕޫރްއެވެ. ތިންވަނަ ބައިގެ ލީޑަކީ ސުޕަރ ސްޓަރ ސަލްމާން ހާނެއެވެ. ސަލްމާނާއި އެކު މި ބައިގައިވެސް އަނިލް ކަޕޫރްގެ މުހިއްމު ރޯލެއް ހިމަނާފައިވެއެވެ. އަދި ބޮބީ ޑިއޯލްވެސް މި ސީރީޒްގެ 3 ވަނަ ބައިން ފެނިގެން ދިޔައެވެ.
މި ސްރީޒްގެ 4 ވަނަ ބައެއް އަންނަން ތައްޔާރުވާން މި ވަނީ ފަށާފައެވެ. ފިލްމުގެ ޕްރޮޑަކްޝަން ޓީމުން އަންނަނީ ފިލްމުގެ ސްކްރިޕްޓް ލިޔަމުންނެވެ. އަދި މިއަހަރު ނިމުމުގެ ކުރިން ފިލްމުގެ ހުރިހާ މަސައްކަތެއް ނިންމާލެވޭނެކަމަށް އެޓީމުން ބުނެއެވެ.
ހަތަރު ވަނަ ބައިގައި ލީޑްކުރާނީ ކޮން ތަރިއެއްކަމެއް އަދި ނޭގައެވެ. ބައެއް ރިޕޯޓްތައް ބުނާ ގޮތުން މިބައިންވެސް ފެނިގެންދާނީ "ރޭސް" ގެ އެންމެފަހުން ބައިން ފެނިގެންދިޔަ ސަލްމާން ހާނެވެ.
ފިލްމުގެ ފުރަތަމަ ދެ ބައިވެސް ޑައިރެކްޓް ކުރީ ޢައްބާސް މަސްޠާންއެވެ. އެންމެ ފަހުން ނުކުތް "ރޭސް 3" ޑައިރެކްޓްކުރީ ރެމޯ ޑިސޫޒާއެވެ.
2008 ވަނަ އަހަރު ދެއްކި މި ފްރެންޗައިސްގެ ފުރަތަމަ އިންސްޓޯލްމެންޓުގައި ސައިފާއި އަނިލްގެ އިތުރުން ދެން ހިމެނުނީ އަކްޝޭ ކަންނާ، ކެޓްރީނާ ކައިފް، ބިޕާޝާ ބާސޫއެވެ. ސައިފް، އަނިލް ، ޖޯން އަބްރަހަމް، ދީޕިކާ ޕަޑްކޯން، ޖެކްލިން ފެނާންޑަރޒް އަދި އަމީޝާ ޕަޓޭލް ދެވަނަ އިންސްޓޯލްމެންޓުން ފެނިގެންދިޔައިރު އެންމެ ފަހުގެ އިސްޓޯލްމެންޓުން ސަލްމާނާއި އަނިލްގެ އިތުރުން ޖެކްލިން، ބޮބީޑިއޯލް އަދި ޑެއިޒީ ޝާ ވަނީ ފެނިގެންގޮސްފައެވެ.
މި ސީރީޒްގެ މިހާތަނަށް ނުކުތް 3 ބައިވެސް ޕްރޮޑިއުސްކުރީ ރަމޭޝް އެސް ތައުރާނީއެވެ. އެނާ މިހާރުވެސް އަންނަނީ ސައިފް، ޖެކްލިން، އަރުޖުން ކަޕޫރު އަދި ޔައްމީ ގޯތަމް ފެނިގެންދާނެ ފިލްމު "ބޫޓު ޕޮލިސް" ރިލީޒްކުރުމުގެ މަސައްކަތް ކުރަމުންނެވެ. މި ފިލްމު ރިލީޒްކުރަން ތާވަލުކޮށްފައި އޮތީ އަންނަ ސެޕްޓެމްބަރުމަހު ޑިޒްނީ ޕްލަސް ހޮޓްސްޓާރގައެވެ. އެއަށްފަހު ރަމޭޝް ޕްރޮޑިއުސްކޮށް ކެޓްރީނާ ކައިފް އަދި ދެކުނު ސްޓާރ ވިޖޭ ސެތުޕަތީ ފެނިގެންދާ "މެރީ ކްރިސްމަސް" ވެސް އޮތީ ރިލީޒްވުމުގެ މަގުމަތީގައެވެ.