ތްރިލަރ ފިލްމު "ކިލަރ 3" އިން ފުރަތަމަ ޑައިރެކްޝަން ފެށި ބާރަތު ނީލަކަންތަންގެ ސައިންސް ފިކްޝަން ފިލްމުގެ ލީޑްރޯލުން ފެނިގެންދާނީ ތާޕްސީ ޕަންނޫކަން މިހާރު މިވަނީ ގާތްގަޑަކަށް ޔަޤީންވެފައެވެ.
ޕޭން އިންޑިއާގެ މި ސައިންސް ފިކްޝަން ފިލްމުގެ ވަގުތީ ނަމަކީ "އޭލިއަން" އެވެ. ފިލްމުގައި ދައްކުވައިދޭނީ ހޮލީވުޑް ފިލްމުތަކުގައި ފެންނަ ކަހަލަ އޭލިއަން ވާހަކަތަކެއް ނޫނެވެ. އޭގެ ބަދަލުގައި ފެނިގެންދާނީ އިންޑިއާގައި އޭލިއަނުން އުޅޭނެ ގޮތުގެ ވާހަކަތައްކަމަށް ފިލްމުގެ ޕްރޮޑަކްޝަން ޓީމުން ބުނެއެވެ.
އިންޑިއާގެ އެކި ސްޓޭޓްތަކުގައި ވާހަކަ ދައްކާ ގިނަ ބަހުރުވަތަކުން ފިލްމު ޝޫޓް ކުރަން ނިންމާފައިވާއިރު ގިނަ ވިޝުއަލް އިފެކްޓްތަކެއް ފިލްމުގައި ހިމެނޭނެއެވެ. މިއާއެކު ޕްރީ ޕްރޮޑަކްޝަންގެ ދިގުލައިގެން ހިގައިދާނެކަމަށް ވަނީ ބެލެވިފައެވެ. ހަމައެކަނި ވިޝުއަލް އިފެކްޓަށްވެސް 10 ކްރޯޑް ރުޕީސް އަރާނެކަމަށްވެއެވެ. އަދި މި މަސައްކަތައް ހޯދާނީ އިންޑިއާގެ ޓެކްނީޝަނުންކަމަށްވެސް ފިލްމުގެ ޓީމުން ބުނެއެވެ.
ތާޕްސީގެ އެންމެ ފަހުގެ ފިލްމު "ޙަސީން ދިލްރުބާ" އަންނަ ހުކުރު ދުވަހު ރިލީޒްކުރުމަށް އަންނަނީ އެންމެ ފަހުގެ ތައްޔާރީތައް ވަމުންނެވެ.
ތާފްސީ ދެން އެންމެ އަވަހަށް މަސައްކަތް ފަށާނީ "ޝާބަޝް މީތޫ" ގެ ޝޫޓިން އެވެ. "ރަޝްމީ ރޮކެޓް" ، "ލޫޕް ލަޕޭޓާ" އަދި "ދޮބާރާ" އަކީ ތާޕްސީގެ ކުރިއަށްހުރި ފިލްމުތަކެވެ.