ފަހަކަށް އައިސް ދެކުނު ސިނަމާގެ ގިނަ ފިލްމުތަކެއްގެ ރައިޓްސް ގަނެ ހިންދީ ރީމޭކްތަކެއް ހެދުން ވަނީ ޢާންމުވެފައެވެ. މިދިޔަ ދެތިން އަހަރެއްގައި ބޮލީވުޑްގައި އެންމެ ހިނގި ފިލްމުތަކުގެ ތެރޭގައި ގިނައިން ހިމެނުނީވެސް އިްނޑިއާގެ ދެކުނު ޑައިރެކްޓަރުން އުފެއްދި ފިލްމުތަކުފެ ހިންދީ ރީމޭކެއެވެ.
އަނެއްކާވެސް އެކަހަލ މޮޅު ފިލުމެއްގެ ރައީޓް ހޯދުމުގެ މަސައްކަތް ބޮލީވުޑްގެ ޑައިރެކްޓަރ ބޮނީ ކަޕޫރް މިވަނީ ފަށާފައެވެ. މި އަހަރު ނެޓްފިލިކްސްއިން ރިލީޒްކޮށް ގިނަ ބަޔަކަށް ކަމުދިޔަ މަލަޔާލަމް ފިލްމު "ވަން" ގެ ރައިޓްސް ގަތުމަށް ބޮނީ ކަޕޫރް އަންނަނީ ވާހަކަދައްކަމުންނެވެ.
ސަންތޯޝް ވިޝްވަނަތް ޑައިރެކްޓްކުރި އޮރިޖިނަލް ފިލްމުގެ ލީޑުރޯލުން މަލަޔާލަމް އެކްޓަރ މަމޫޓީ ފެނިގެންދަނީ ޗީފް މިނިސްޓަރެއްގެ ރޯލުންނެވެ. ހިންދީ ރީމޭކުން ފެންނާނީ ކޮން ބައެއްކަން އަދި ނޭގުނުނަމަވެސް އަންނަ އަހަރުގެ މެދުތެެރޭގައި ފިލްމު ރިލީޒްކުރާނެކަމަށް ރިޕޯޓްތައް ބުނެއެވެ.
މި ފިލްމުގެ އިތުރުން 2019 ވަނަ އަހަރު ދެއްކި މަލަޔާލަމް ފިލްމު "ހެލެން" ގެ ރައިޓްސްވެސް ބޯނީ ވަނީ ގަނެފައެވެ. އަޖޭ ދޭވްގަން ފެނިގެންދާ ފިލްމު "މައިދާން" އަށް ފަހު މި ފިލްމުގެ މަސައްކަތް ބޯނީ ފަށަން އަންނަނީ ތައްޔާރުވަމުންނެވެ. ދަރިފުޅު އަރުޖުން ކަޕޫރާއެކު 2019 ވަނަ އަހަރު ދެއްކި ތަމަޅަ ފިލްމު "ކޮމާލި" އަކީވެސް ބޯނީ ރައިޓްސް ގަނެ ހިންދީ ރީމޭކް ހަދަން ނިންމާފައިވާ ފިލްމެކެވެ.
އިންޑިއާގެ ދެކުނު ބަހުން ރީމޭކް ހެދުމަށްވެސް ބޯނީ ދަނީ ފިލްމުތަކުގެ ރައިޓްސް ގަންނަމުންނެވެ. މިގޮތުން ދާދިފަހުން ދެއްކި "ވަކީލް ސާބް" އަކީ ހިންދީ ފިލްމު "ޕިންކް" ގެ ރީމޭކެކެވެ. އަޔުޝްމާން ކުރާނާ ފެނިގެންދިޔަ "އާރޓިކަލް 15" ގެ ތަމަޅަ ރީމޭކެއް ހެދުމުގެ މަސައްކަތްވެސް ބޯނީ އަންނަނީ ކުރަމުންނެވެ.
"މިސްޓަރ އިންޑިއާ" ، "ނޯ އެންޓްރީ" ، "ޖުދާއީ" އަދި "ވޯންޓެޑް" ފަދަ ފިލްމުތައް ޕްރޮޑިއުސްކޮށްފައިވާ ބޯނީ ކަޕޫރަކީ ހިންދީ ސިނަމާގައި ގިނަ ފިލްމުތަކެއް ޕްރޮޑިއުސްކޮށްފައިވާ ކާމިޔާބު ޕްރޮޑިއުސަރެކެވެ.