ކުޑަކުދިންނަށް ލިބިގެންވާ ޙައްޤުތައް ނިގުޅައިގަތުމުގެ 74 މައްސަލައެއް ބަލަމުންދާކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް "އެޗްއާރްސީއެމް" އިން ވިދާޅުވެއްޖެއެވެ.
ޕީއެސްއެމް ރާއްޖެ މިއަދުގައި އެޗްއާރްސީއެމްއިން ކުރަމުންދާ މަސައްކަތާއި، މިހާރު ބަލަމުންދާ މައްސަލަތަކާއި ބެހޭގޮތުން މައުލޫމާތު ދެއްވަމުން އެ ކޮމިޝަނުގެ މެމްބަރު މަރިޔަމް މުނާ ވިދާޅުވީ، 633 މައްސަލައެއް އެކޮމިޝަނުން ބަލަމުންދާކަމަށެވެ. އޭގެތެރެއިން ކުޑަކުދިންގެ ޙައްޤުތަކާ ގުޅިގެން ހުށަހަޅާފައިވާ 74 މައްސަލައެއްވެސް ހިމެނޭކަމަށް މުނާ ވިދާޅުވެއެވެ.
އާންމުގޮތެއްގައި ކޮމިޝަނަށް ހުށަހެޅޭ މައްސަލަތަކަކީ ޤައިދީންގެ ޙައްޤުތައް ނުލިބިގެން ހުށަހަޅާ މައްސަލަތަކާއި، އެންޓި ޓޯޗަރގެ މައްސަލަތަކާއި، ކުޑަކުދިންނާ ގުޅުން ހުރި މައްސަލަތަކުގެ އިތުރުން ވަޒީފާއާއި ގުޅިގެން ހުށަހަޅާ މައްސަލަތަށްކަމުގައި އެޗްއާރްސީއެމުން ވިދާޅުވެއެވެ. މީގެ އިތުރުންވެސް އެހެނިހެން ދާއިރާތަކުން ޙައްޤު ނުލިބިގެން ހުށަހަޅާ މައްސަލަތައްވެސް ހުންނަކަމަށް އެ ކޮމިޝަނުން ހާމަކުރައްވައެވެ.
ކުޑަކުދިންނާއި ގުޅިގެން ހުށަހަޅާފައިވާ މައްސަލަތައް ތަފްސީލުކުރައްވަމުން އެޗްއާރްސީއެމުން ވިދާޅުވީ، މިދިޔައަހަރުގެ 67 މައްސަލަ އަދި މިއަހަރުގެ 7 މައްސަލަ ބަލަމުންދާ ކަމުގައެވެ. މިއަހަރާއި މިދިޔައަހަރު މިބާވަތުގެ މައްސަލަތައް އިތުރު ވެފައިވާކަމަށް ކޮމިޝަނުން ވިދާޅުވެއެވެ. ކުޑަކުދިންނާ ގުޅިގެން ހުށަހަޅާފައިވާ މައްސަލަތަކަކީ ކުޑަކުދިންނަށް އިހުމާލުވުމާއި، އެކުދިންގެ ޒިންމާ ނުނެގުމާއި، އެކުދިންނާމެދު އިހާނެތިވުމާއި، ލާއިންސާނީ ދަށުދަރަޖައިގެ އަމަލުތައް ހިންގުމުގެ މައްސަލަތަކެވެ.
ޤައިދީންގެ ޙައްޤުތައް ނުލިބިގެން ހުށަހަޅާ މައްސަލަތައް ވެސް އިތުރުކަމަށާއި، އެގޮތުން މިދިޔައަހަރާއި މިއަހަރުގެ 90 މައްސަލައެއް ބަލަމުންދާކަމަށް އެޗްއާރްސީއެމްއިން ވިދާޅުވެއެވެ. މިގޮތަށް ހުށަހެޅޭ މައްސަލަތަކަކީ ޤައިދީންނަށް ލިބިގެންވާ ސިއްޙީ ހިދުމަތް ނުލިބުމުގެ މައްސަލައިގެ އިތުރުން އިނާޔަތްތައް ނުލިބުމުގެ މައްސަލައެވެ. މިދިޔަ އަހަރު މިބާވަތުގެ 60 މައްސަލަ ހުށަހެޅިއިރު، މިއަހަރު މިހާތަނަށް މިބާވަތުގެ 30 މައްސަލައެއް ބަލަމުންދާކަމަށް ވެސް އެ ކޮމިޝަނުން ވިދާޅުވެއެވެ.
ވަޒީފާގެ ދާއިރާއިން ހުށަހަޅާފައިވާ 38 މައްސަލަ އެއްވެސް އެޗްއާރްސީއެމް އިން ބަލަމުންދާކަމަށް އެ ކޮމިޝަނުން ވިދާޅުވެއެވެ. ކޯވިޑްގެ ޙާލަތާއި ގުޅިގެން މިބާވަތުގެ މައްސަލަތައް ވަނީ އިތުރުވެފައެވެ. އެގޮތުން މުސާރަ ނުލިބުމުގެ މައްސަލައާއި، ވަޒީފާއިން ވަކިކުރުމުގެ މައްސަލަ، ބިދޭސީންނަށް ވަޒީފާނެތިފައި ތިބެން ޖެހުމުގެ އެތަކެއް މައްސަލައެއް ކޯވިޑުގެ ބަލިމަޑުކަމުގެ މުއްދަތުގައި ރިޕޯޓުކޮށްފައިވާކަމަށް އެ ކޮމިޝަނުން ވިދާޅުވެއެވެ.
މީގެއިތުރުން ސިއްޙީ ދާއިރާއިން ހުށަހަޅާފައިވާ ގިނަ މައްސަލަތަކަކީ ވެސް ކޯވިޑާއި ގުޅިގެން ހުށަހަޅާފައިވާ މައްސަލަތައްކަމުގައި ކޮމިޝަނުން ވިދާޅުވެއެވެ. މިބާވަތުގެ އިހުމާލުގެ މައްސަލަތަކާއި، ފަރުވާ ލަސްވުމުގެ މައްސަލަތައް އަދި ޙިދުމަތް ނުލިބުމުގެ 38 މައްސަލައެއް ކޮމިޝަނުން ބަލަމުންދެއެވެ. ހަމައެއާއެކު، ޙާއްޞަ އެހީއަށް ބޭނުންވާ ފަރާތްތަކުގެ ޙައްޤުތައް ހޯދައިދިނުމުގެ 12 މައްސަލައެއްވެސް ކޮމިޝަނުން ދަނީ ބަލަމުންނެވެ.
ކޮމިޝަނަށް ހުށަހަޅާފައިވާ މައްސަލަތަކުގެ ތެރެއިން މިއަހަރުގެ މިހާތަނަށް އިންސާނީ ޙައްޤެއް ގެއްލިޖެކަމަށް ކަނޑައަޅާ 9 މައްސަލައެއް ބަލައި ޙައްޤު ހޯދައިދީފައިވާކަމަށާއި، މިއަހަރުގެ 5 ވަނަ ދައުރުގައި މިހާތަނަށް އެންޓި ޓޯޗަރ ޤާނޫނުގެ ދަށުން 5 މައްސަލައެއް ދައުވާކުރުމަށް ޕްރޮސެކިއުޓަރ ޖެނެރަލް އޮފީހަށް ފޮނުފައިވާކަމަށްވެސް ކޮމިޝަނުން ހާމަކުރައްވައެވެ. އަދި މިއަހަރުގެ މިހާތަނަށް ޖުމްލަ 129 މައްސަލަ ބަލައި ނިންމާފައިވާކަމަށްވެސް ކޮމިޝަނުން ވިދާޅުވެއެވެ.