ރަންޖީތު ތިވާރީ ޑައިރެކްޓްކޮށް މިމަހުގެ 27 ގައި ރިލީޒްކުރަން ތާވަލު ކޮށްފައިވާ ސްޕައި ތްރިލަރ ފިލްމު "ބެލްބޮޓަމް" އަށްފަހު އަކްޝޭ ކުމާރު އަނެއްކާވެސް ރަންޖީތު ތިވާރީގެ އެހެން ފިލްމެއްގެ މަސައްކަތް ފަށަން ތައްޔާރުވެއްޖެއެވެ.
2018 ވަނަ އަހަރު ދެއްކި ތަމަޅަ ސައިކޮލޮޖިކަލް ތްރިލަރ "ރަތްސަސަން" ގެ ހިންދީ ރީމޭކެއްކަމަށްވާ މި ފިލްމުގެ ނަމަކީ "މިޝަން ސިންޑްރެއްލާ" އެވެ.
ފިލްމުގައި އަކްޝޭގެ ރޯލަކީ ޕޮލިސް އޮފިސަރެއްގެ ރޯލެވެ. އަކްޝޭއާއެކު ފިލުމްގައި ދެން ފެންނާނެ އަންހެން ލީޑު ތަރިއަކީ ރަކުލް ޕްރީތް ސިންގެވެ. އަދި މިއީ މި ދެތަރިން އެކުގައި ސްކްރީނުން ފެންނަ ފުރަތަމަ ފަހަރެވެ.
"ރަތްސަސަން" ގެ ތެލުގޫ ރީމޭކެއްވެސް "ރަކްޝާސުދޫ" ގެ ނަމުގައި 2019 އަހަރު ވަނީ ހަދާފައެވެ.
އޯގަސްޓް މަހު ފެށުމަށް ހަމަޖެހިފައިވާ މި ފިލްމުގެ މަންޒަރުތައް ނަގަން ހަމަޖެހިފައިވަނީ އިނގިރޭސިވިލާތުގެ ލަންޑަންގައިކަމަށް މީގެކުރިން ވަނީ އަޑު ފެތުރިފައެވެ.
ޖެކީ ބައްގާނީ އަދި ވާޝޫ ބައްގާނީ ޕްރޮޑްޑިއުސްކުރާ މި ފިލްމުގެ ޕްރީ ޕްރޮޑަކްޝަންގެ މަސައްކަތް މިހާރު ފަށާފައިވާކަމަށް އިންޑިއާގެ މީޑިއާތަކުން ރިޕޯޓްކުރެއެވެ
.
2014 ވަނަ އަހަރު ދެއްކި ތަމަޅަ އެކްޝަން ތްރިލަރ "ޖިގަރްތަންޑާ" ގެ ހިންދީ ރީމޭކް "ބައްޗަން ޕާންޑޭ" ގެ ލީޑްރޯލުންވެސް ފެނިގެންދާނީ އަކްޝޭ އެވެ. މިއާއެކު ރަންޖީތު ތިވާރީގެ މި ފިލްމު ވެގެންދާނީ އަކްޝޭ ދެން އެންމެ އަވަހަށް ފެންނާނެ ހިންދީ ރީމޭކަށެވެ.
ޖެކީ އަދި ވާޝޫ ބައްގާނީއާއެކު އަކްޝޭގެ އެހެން މިޝަން ފިލްމެއްވެސް ކުރިއަށް އެބައޮތެވެ. އެއީ 'މިޝަން ލަޔަން' އެވެ.