މޭއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައިސް، ރައީސް މުޙައްމަދު ނަޝީދަށް އަމާޒުކޮށްދިން ޙަމަލާގައި ލިބިވަޑައިގެންނެވި ޒަޚަމްތަކަށް އިތުރު ފަރުވާ ހޯއްދެވުމަށް އިނގިރޭސިވިލާތަށް ވަޑައިގަންނަވައިފިއެވެ.
އެމަނިކުފާނު އިނގިރޭސިވިލާތަށް ވަޑައިގެންނެވީ އެޙަމަލާގައި ލިބިވަޑައިގެންނެވި ޒަޚަމްތަކަށް ޖަރުމަރުވިލާތުގައި ފަރުވާ ހޯއްދެވުމަށްފަހުގައެވެ.
ޙަމަލާއަށްފަހު އޭޑީކޭގައި 16 ގަޑިއިރުގެ ތެރޭގައި ގިނަ އޮޕަރެޝަންތަކެއް ކުރެއްވުމަށްފަހު ޙާލުކޮޅު ރަނގަޅުވަމުން އައިނަމަވެސް އިތުރަށް ފަރުވާ ހޯއްދެވުމަށް މޭއި މަހުގެ 13 ވަނަ ދުވަހު ރައީސް ނަޝީދު ވަނީ ޖަރުމަނަށް ފުރާވަޑައިގަންނަވާފައެވެ. އެގޮތުން ޖަރުމަންވިލާތުގެ ބަރލިންގ ބުންޑެސްވެއަރ ހޮސްޕިޓަލުގައި އެމަނިކުފާނު ވަނީ ފަރުވާ ހޯއްދަވާފައެވެ. އެހޮސްޕިޓަލުގައި ފަރުވާގައި ޙަރަކާތްތެރިވެވަޑައިގަތް ޑޮކްޓަރުންގެ ޓީމުގެ ލަފާގެ މަތިން އިތުރު ފަރުވާއަށް މިއަދު އިނގިރޭސިވިލާތަށް ފުރާވަޑައިގަންނަވާފައިވާކަމަށް ރައީސް ނަޝީދުގެ އޮފީހުން ވިދާޅުވެއެވެ.
ރައީސް ނަޝީދު އިނގިރޭސިވިލާތަށް ވަޑައިގަންނަވާފައިވާއިރު އިތުރު އޮޕަރޭޝަނެއް ކުރައްވަން ޖެހިދާނެކަމަށް މީގެކުރިން ވަނީ ވިދާޅުވެފައެވެ.
މޭއިމަހުގެ 6 ވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައިއޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. އެމަނިކުފާނަށް އެންމެ ފުރަތަމަ ފަރުވާދެއްވި އޭޑީކޭގެ ސްޕެޝަލިސްޓުންގެ ޓީމުންވެސް ވަނީ އެކަން ހާމަކުރައްވާފައެވެ.
ރައީސް ނަޝީދަށް އަމާޒުކޮށް ދިން ޙަމަލާއަކީ ޓެރަރިޒަމްގެ ޢަމަލެއްކަމަށް ކަނޑައަޅާ އެމައްސަލަ ފުލުހުން އަންނަނީ ސީރިއަސް މައްސަލައެއްގެ ގޮތުގައި ބަލަމުންނެވެ. އަދި އެމައްސަލައިގެ ތަހުޤީޤަށް 5 މީހަކު ފުލުހުން ވަނީ މިހާތަނަށް ހައްޔަރުކޮށްފައެވެ.