އަހަރުތަކަކަށްފަހު ޝިލްޕާ ޝެޓީގެ އެކްޓިންގ ފެނިގެންދާނެ ފިލްމު "ހަންގާމާ 2" ގެ ޓްރެއިލަރ މިހާރު ދައްކާލާފާވާއިރު ފިލްމު ރިލީޒް ކުރަން ހަމަޖެހިފައިވަނީ މިމަހުގެ 23 ގައި ޑިޒްނީ ޕްލަސް ހޮޓް ސްޓާރއިންނެވެ.
ޕްރިޔަދަރްޝަން ޑައިރެކްޓްކުރާ މި ފިލްމުގައި ޝިލްޕާގެ އިތުރުން ޕަރޭޝް ރާވަލް، ޕްރަނީތާ ސްބާޝް އަދި މީޒާން ޖެފްރީވެސް ފެނިގެންދާނެއެވެ.
މި ފިލްމަކީ 2003 ވަނަ އަހަރު ދެއްކި ފިލްމު "ހަންގާމާ" ގެ ސީކުއަލް އެކެވެ. މީގެއިތުރުން މި ދެ ފިލްމަކީވެސް މަލަޔާލަމް ދެ ފިލްމުގެ ރީމޭކެކެވެ. އޮރިޖިނަލް ފިލްމު "ހަންގާމާ" އަކީ 1984 ވަނަ އަހަރު ދެއްކި މޯހަން ލާލް ލީޑް ރޯލުން ފެނިގެންދިޔަ މަލަޔާލަމް ފިލްމު "ޕޫޗަކޯރު މޫކުތީ" ގެ ރީމޭކެކެވެ. "ހަންގާމާ 2" މީވެސް މޯހަންލާލް ލީޑްރޯލުން ފެނިގެންދިޔަ މަލަޔާލަމް ފިލުމް "މިނަރަމް" ގެ ހިންދީ ރީމޭކެވެ. ތަމަޅަ ފިލުމް "މިނަރަމް"ވެސް ޑައިރެކްޓްކުރީ ޕްރިޔަދަރްޝަންއެވެ.
"ހަންގާމާ 2" އިން މީޒާން ފެނިގެންދާނީ އޮރިޖިނަލް ފިލްމުގައި ފެނިގެންދިޔަ މޯހަން ލާލްގެ ރޯލުންނެވެ. މީޒާންގެ ކުރީގެ ލޯބިވެރިޔާ އޭނާގެ ދަރިއެއްކަމަށްބުނެ ކުއްޖަކު ގޮވައިގެން އައުމުން މީޒާންގެ ޙަޔާތަށް އަންނަ ބަދަލުތައް މި ފިލްމުގައި ދައްކުވައިދެއެވެ.