ކަލާޒްގެ ކާމިޔާބު ރިއަލިޓީ ޝޯ " ހަތުރޯން ކޭ ކިލާޅީ " ގެ ސީޒަން 11 މިމަހުގެ ޖުލައިގައި ދައްކަން ފަށާނެކަން އިއުލާންކޮށް ޝޯގެ ޕްރޮމޯތައް ދައްކަން ފަށައިފިއެވެ.
ބޮލީވުޑްގެ މަޝްހޫރު އަދި ކާމިޔާބު ޑައިރެކްޓަރ ރޯހިތް ޝެޓީ ހުށައަޅަމުން އަންނަ މި ޝޯ އަކީ 1990ގެ ތެރޭގައި މަޝްހޫރުވެގެންދިޔަ އެމެރިކާގެ ޓީވީ ޝޯ " ފިއަރ ފެކްޓަރ" ގެ އިންޑިއާ ވާޝަންއެވެ. ޓީވީ ސްރީޒްތަކުން މަޝްހޫރު ތަރިން ހިމނައިގެން ގެނެސްދޭ މި ޝޯގައި ނުރައްކާތެރި ބުރުވެރި ސްޓަންޓްތައް ހަދަން ބައިވެރިންނަށް މަޖްބޫރުވެއެވެ.
މި ސީރީޒްގެ 11 ވަނަ ސީޒަން މިހާރު ތާވަލުކޮށްފައިވާ ގޮތުން ދައްކަން ފަށާނީ މިމަހުގެ 17 ވަނަދުވަހުގެ ރެއެވެ. ހަފްތާގެ ބަންދާއި ދިމާކޮށް ގެނެސްދޭ މި ޝޯ އޮންނާނީ ހޮނިހިރު އަދި އާދިއްތަ ދުވަހުގެ ރެއެވެ.
މި ފަހަރުގެ ޝޯގައި ވާދަކުރާ ތަރިންގެ ތެރޭގައި ބިގްބޮސްގެ އެންމެ ފަހުގެ ސީޒަންގެ ވިނަރ ރުބީނާ އާއި އެނާގެ ފިރިމިހާ އަބިނާވްވެސް ހިމެނެއެވެ. މީގެއިތުރުން ބިގްބޮސްގެ ދެވަނަ ރާހުލް ވައިދިއާ އަދި ތިންވަނަ ހޯދި ނިކީ ތަމްބޯލީވެސް މިފަހަރުގެ " ހަތުރޯން ކީ ކިލާޅީ " ގައި ވާދަކުރާނެއެވެ.
މީގެއިތުރުން ކަސޯޓީން މަޝްހޫރުވި ޝްވޭތާ ތިވާރީ، ދާދި ފަހުން ކްރައިމް ޕެޓްރޯލް ހުށައަޅާދިން ދިވްޔަންކާ ތުރިޕަތީ، ލަވަކިޔުންތެރިޔާ އާސްތާ ގިލް، އެމްޓީވީގެ "ރޯޑީޒް" އިން ވިދާލި ވަރުން ސޫދާއި ބަތަލާ ސަނާ މަކްބޫލްވެސް މި ފަހަރުގެ ޓީމްގައި ހިމެނެއެވެ. މި ފަހަރުގެ ސީޒަން ޝޫޓްކޮށްފައި ވަނީ ދެކުނު އެފްރިކާގައެވެ.