ސައޫދީ ޢަރަބިޔާގެ ރެޑްސީ އިންޓަރނޭޝަނަލް ފިލްމު ފެސްޓިވަލް އަނެއްކާވެސް ލަސްކޮށްފިއެވެ. ކުރިން ނޮވެމްބަރުމަހު ބާއްވަން ނިންމާފައި އޮތް މި ފެސްޓިވަލް މިހާރުވަނީ ޑިސެމްބަރަށް ފަހަތަށް ޖައްސާލާފައެވެ.
މީ ސައުދީގައި އިންޓަރނޭޝަނަލް ފިލްމު ފެސްޓިވަލެއް ބާއްވާ ފުރަތަމަ ފަހަރެވެ. މި ފެސްޓިވަލް ބާއްވަން ނިންމީ ސައުދީގައި ފިލްމު ދައްކާ ސިނަމާތައް ހިންގުން މަނާކޮށްފައި އޮތް އޮތުން 30 އަހަރަށްފަހު ނިމުމަކަށް ގެނެސް ސިނަމާތައް ހިނގުމުގެ ހުއްދަ މިދިޔަ 2017 ވަނަ އަހަރު އެ ޤައުމުގެ ސަރުކާރުން ދިނުމުންނެވެ.
ރެޑްސީ އިންޓަރނޭޝަނަލް ފިލްމު ފެސްޓިވަލުގެ ނަމުގައި މި ފެސްތިވަލް ބޭއްވުމުގެ ވާހަކަތައް ފުރަތަމަ ފެށުނީ 2019 ވަނަ އަހަރުއެވެ. އަދި މިއަހަރުގެ މާރިޗުމަހު ފެސްޓިވަލް ބާއްވަން ނިންމި ނަމަވެސް ކޯވިޑާއި ހެދި އަދިވެސް މި ފެސްޓިވަލް ބޭއްވިފައެއް ނުވެއެވެ.
މި ފެސްޓިވަލް ބާއްވާ ތާރީހު ފަސްކުރުމުން އަންނަ ޑިސެމްބަރު 1 އިން 10 އަށް އޮންނަ ކައިރޯ އިންޓަރނޭޝަނަލް ފިލްމް ފެސްޓިވަލާއި ސައުދީ ފިލްމު ފެސްޓިވަލާ ފުށު އަރައެވެ. އެހެންނަމަވެސް ސައުދީ ފެސްޓިވަލް ކަނޑައެޅިފައިވާ ތާރީހުގައި ބާއްވާނެކަމަށް އެކަން އިންތިޒާމުކުރާ ފަރާތުން ބުނެއެވެ. ސައުދީގައި ބާއްވާ ފިލްމް ފެސްޓިވަލް އޮންނާނީ ވެރިރަށް ޖިއްދާގައެވެ.
ސައޫދީ ޢަރަބިއާ ރެޑް ސީ އިންޓަރނޭޝަނަލް ފިލްމު ފައުންޑޭޝަން އަކީ ސައުދީ ޢަރަބިއާގެ ފިލްމު އިންޑަސްޓްރީއަށް އެހީވުމުގެ ގޮތުން 2018 ވަނަ އަހަރު އުފައްދާފައިވާ މިނިވަން ފައުންޑޭޝަނެކެވެ.
މިހާތަނަށް ސައުދީގައި މަނާކޮށްފައި އޮތް ގިނަ ކަންކަމަށް އެ ޤައުމުގެ ރަސްކަމުން އަންނަނީ ދޫދެމުންނެވެ. މީގެތެރޭގައި ސިނަމާތައް ހުޅުވާ ހިންގުމާއި އަންހެނުންނަށް ކާރުދުއްވުމާއި މި ނޫންވެސް ބައެއް ނިންމުންތައް ހިމެނެއެވެ.