ޝިލްޕާ ޝެޓީ އަދި މީޒާން ޖެފަރީ ލީޑްރޯލުން ފެނިގެންދާ ފިލްމު "ހަންގާމާ 2" ގެ ޓްރެއިލަރ މިމަހުގެ ކުރީކޮޅު ބެލުންތެރިންނަށް ދޫކޮށްލި ފަހުން މި ފިލްމުގެ ވާހަކަ އަންނަނީ ވަރަށް ގަދަޔަށް ދެކެވެމުންނެވެ. ފިލްމުގެ ޓީމުން މިވަނީ އަނެއްކާވެސް ފޭނުން އިންތިޒާރުކުރަމުން އައި ފިލްމުގެ އެއް ލަވަ ދައްކާލާފައެވެ.
1994 ވަނަ އަހަރު ނުކުތް ޝިލްޕާ ޝެޓީ އަދި އަކްޝޭ ކުމާރު ފެނިގެންދިޔަ ފިލްމު "މެއި ކިލާޅީ ތޫ އަނާރީ" ގެ މަޝްހޫރު ލަވަ "ޗުރާކެ ދިލްމެރާ ގޮރިއާ ޗަލީ" ގެ ރީމިކްސް އިއްޔެ ވަނީ ރިލީޒްކޮށްފައެވެ.
މި ލަވައަކީ 90ގެ އަހަރުތަކުގެ އެންމެ މަޝްހޫރުވި އެއް އައިކޯނިކް ލަވައެވެ. "ހަންގާމާ 2"ގައި ހިމެނޭ މި ރީމިކްސްގައި އެތައް ނެށުމުގެ ޝޯތައް ޖަޖުކުރަމުން އަންނަ ޝިލްފާގެ ނެށުމުގެ ހުނަރަށް އަދިިވެސް ބަދަލު ނާންނަކަން އޭނާ ވަނީ ދައްކާލާފައެވެ. އަދި ޝިލްޕާއަށް މީޒާންވެސް ވަކި ދުލެއް ނުދެއެވެ.
އޮރިޖިނަލް ލަވައިގައި ރޮމޭންޓިކް ފީލިންއެއް ހުރިނަމަވެސް އަލަށް ނިކުތް މި ރީމިކްސްގައި ބޮޑަށް ފެނިގެންދަނީ ޕާޓީ ސްޓައިލްއެވެ.
ރީމިކް ލަވަ ކިޔާފައިވަނީ ބެނީ ޑެއާލް އަދި އަންމޯލް މާލިކްއެވެ. ބޮލީވުޑްގެ މަޝްހޫރު ކޮމްޕޯސަރ އަނޫ މާލިކްގެ މިއުޒިކަށް ތައްޔާރުކޮށްފައިވާ މި ލަވައިގެ އޮރިޖިނަލް ލަވަކިޔުންތެރިންނަކީ ބޮލީވުޑްގެ ލެޖެންޑްރީ ލަވަކިޔުންތެރިން ކަމަށްވާ ކުމާރު ޝާނޫ އަދި އަލްކާ ޔަގްނިކްއެވެ.