މަޝްހޫރު ލަވަކިޔުންތެރިޔާ އަދި ލިރިސިސްޓް ގުރޫ ރަންދަވަން ފުރަތަމަ ފަހަރަށް ހިންދީ ފިލްމެއްގެ ލީޑްރޯލުން ފެންނަން ތައްޔާރުވެއްޖެއެވެ.
29 އަހަރުގެ ލަވަކިޔުންތެރިޔާ ގުރޫ ފެނިގެންދާނީ އެންޑެމޯލް ޝައިން އިންޑިއާއިން ޕްރޮޑިއުސްކުރާ ޕްރޮޖެކްޓަކުންނެވެ. މިކަން އެންޑެމޯލް ޝައިނުންވެސް ވަނީ އިޢުލާނުވެސް ކޮށްފައެވެ. މިޔުޒިކަލް ޑްރާމާ ފިލްމެއްކަމަށްވާ މި ފިލްމުގައި ފެންނާނީ ޒުވާން މިޔުޒީޝަނެއްގެ ޙަޔާތުގައި ހިނގާ ކަންތައްތައްތެކެކެވެ.
އެންޑެމޯލް ޝައިން އިންޑިއާގެ ސީއީއޯ ބުނީ ގުރޫ އަކީ މިޔުޒިކަލް ޕަވަރ ހައުސްއެއްކަމަށާއި ގުރޫއާއެކު މަސައްކަތްކުރަން ވަރަށް ހިތްހަމަޖެހޭކަމަށެވެ.
މިކަމާއި ބެހޭގޮތުން ގުރޫ ބުނީ އާޓިސްޓެއްގެ ގޮތުގައި އޭނާގެ ހުނަރު ދައްކާލަން ވަރަށް ބޭނުންވެފައި ހުރިކަމަށެވެ. އަދި މި ފުރުޞަތު ލިބުމުން ވަރަށް އުފާވާކަމަށްވެސް ގުރޫ ބުނެއެވެ. އަދި އޭނާއަށް މިކަން ވާނެކަން އެންޑެމޯލް ޝައިންއިން ޤަބޫލުކުރީތީ އުފާވާކަމަށްވެސް ގުރޫ ވަނީ ބުނެފައެވެ. އެންޑެމޯލް ޝައިން އިން މިހާރު ދަނީ ފިލްމުގެ ކާސްޓުން ނެގުމުގެ މަސައްކަތް ކުރަމުންނެވެ.
ލަވަކިޔުންތެރިޔާ އަދި މިޔުޒިކް ކޮމްޕޯސަރ ގުރޫ ވަނީ މީގެކުރިންވެސް ބައެއް ހިންދީ ފިލްމުތަކަށް އޭނާ ކިޔާދީފައިވާ ލަވަތަކުން ފެނިފައެވެ. މިގޮތުން ފާހަގަކޮށްލެވޭ ލަވަތަކުގެ ތެރޭގައި "ހިންދީ މިޑީއަމް" ގެ ލަވަ "ސޫޓްސޫޓް"، "ބްލެކްމެއިލް" ގެ ލަވަ "ޕެޓޯލާ" އަދި "ޓައިމް ޓު ޑާންސް" ގެ ލަވަ "މުންޑޭ މަރް ގަޔާ" ހިމެނެއެވެ.