އެކްޝަން ހީރޯ މާޝިއަލް އާޓްގެ އަދި ނެށުމުގެ މާހިރެއް ކަމަށް ގިނަ ބަޔަކު ޤަބޫލުކުރާ ބޮލީވުޑް ތަރި ޓައިގަރ ޝްރޮފް އެންމެ ފުރަތަމަ ފެނިގެން ގޮސްފައިވަނީ ފިލްމު "ހީރޯޕަންތީ" އިންނެވެ. އޭގެފަހުން "ބާގީ" ، "މުންނާ މައިކަލް" ، "ބާގީ 2" ، "ސްޓޫޑެންޓް އޮފް ދަ ޔިއަރ 2" ، "ވޯ" އަދި "ބާގީ 3" ފަދަ ހިޓްފިލްމުތަކެއް ޓައިގަރ ވަނީ ބެލުންތެރިންނަށް ދޫކޮށްލާފައެވެ.
31 އަހަރުގެ މި ތަރިއަކީ އަބަދުވެސް އޭނާގެ ފޭނުންނާއި ރަގަޅު ގުޅުމެއް ބާއްވާ ތަރިއެކެވެ. މިގޮތުން ދާދިފަހުން އޭނަގެ އިންސްޓްގްރާމް ފޭނުންނާއިއެކު ބޭއްވި "އާސްކް މީ އެނީތިންގް" ސެޝަންގައި ޓައިގަރ ވަނީ ފޭނުން ކުރި ހުރިހާ ސުވާލަކަށް ޖަވާބު ދީފައެވެ.
ޓައިގަރގެ ވާހަކަތަކުން އެންމެ ގިނަ ބަޔަކު އަބަދުވެސް ދައްކަނީ އެނާ އާއި ދިޝާގެ ވާހަކައެވެ. މި ދެތަރިންވެސް އެ ވާހަކަތަކަށް އެއްބަހެއް ނުވެއެވެ. އެހެންނަމަވެސް އެކަކު އަނެކަކަށް ވަރަށް ކަމުދެއެވެ.
ޓައިގަރ އަށް އެންމެ ކަމުދާ ބޮލީވުޑް ބަޠަލާއަކީ ކާކުތޯ ފޭނަކު ކުރި ސުވާލަކަށް ޖަވާބު ދެމުން ޓައިގަރ ބުނީ މާދުރީ ޑިކްސިޓް ކަމަށެވެ. މާދޫރީވެސް ޓައިގަރގެ ނެށުމުގެ ހުނަރަށް އަބަދުވެސް ވަރަށް ތަޢުރީފް ކުރާކަން ފާހަގަކުރެވެއެވެ. ޓައިގަރވެސް އޭނާގެ ނެށުމުގެ ހުނަރު ދައްކާލުމުގައި ފަހަތަކަށް ނުޖެހެއެވެ.
ޓައިގަރގެ ކުރިއަށްހުރި ފިލްމުތަކުގެ ތެރޭގައި 'ބާގީ 4' ، 'ހީރޯޕަންތީ 2' ، 'ރާމްބޯ' އަދި 'ގަނަޕަތް' ހިމެނެއެވެ.