ކެޓްރީނާ ކައިފް ލީޑްރޯލުން ފެނިގެންދިޔަ "ޓައިގަރ ޒިންދާ ހޭ" ގެ ތީމް ލަވަ "ނޫރު" އަކީ ވޭތުވެދިޔަ 20 އަހަރު ދުވަހު ތެރޭގައި އަންހެން ލީޑްރޯލް ކުޅުނު ތަރިއެއްގެ އެންމެ ވަރުގަދަ އެކްޝަން ސީން ދައްކާލަފައިވާ އެއް ލަވައެވެ.
އޭގެ ފަސް އަހަރު ފަހުން އަނެއްކާވެސް ކެޓްރީނާ މި ވަނީ "ޓައިގަރ 3" އިން ޒޯޔާ ރޯލަށް ފިޓްވެފައެވެ. މިފަހަރު ފިލްމުގައި ކެޓްރީނާ ދައްކާލަނީ އޭނާގެ ކެރިއަރުގައި އަދި މިހާތަނަށް ފެނިފައިނުވާ ބިޔަ އެކްޝަން ސީން ތަކެކެވެ. އަދި ދުވަހަކުވެސް ނު ހަދާ ކަހަލަ ވަރުގަދަ ސްޓަންޓްތަކެއް މި ފިލްމުގައި ކެޓްރީނާގެ ފަރާތުން ފެނިގެންދާނެއެވެ. މި ހުރިހާ ސީންތަކަކަށް ތައްޔާރުވުމަށް ކެޓްރީނާ މިހާރު ދަނީ ޓްރެއިނިންތައް ހަދަމުންކަމަށްވެސް ފިލްމުގެ ޕްރޮޑަކްޝަން ޓީމުން ބުނެއެވެ.
މި މަންޒަރުތަތަކީ ކެޓްރީނާގެ ސޯލޯ ސީންތަކެއްކަމަށާއި ހިންދީ ސިނަމާގައި އަންހެން ބަޠަލާއަކު މިހާތަނަށް ކުޅޭ އެންމެ ވަރުގަދަ ސީންތަތަކީ މީކަމަށްވެސް ފިލްމުގެ ޓީމުން ބުނެއެވެ.
"ޓައިގަރ 3" ގެ ޝޫޓިންތައް މިހާރު މުމްބާއީގައި ކުރިއަށްދާއިރު މިމަހު ފަހުކޮޅަށް ރާވާފައި އޮތް މެރެތަން ޝެޑިއުލްއެއްވެސް ކުރިއަށް އެބައޮތެވެ. ފިލްމު ސިނާމަތަކުގައި ރިލީޒްކުރަން ނިންމާފައި އޮތީ އަންނަ އަހަރުއެވެ.
ފިލްމުގެ ވާހަކަ ލިޔެފައިވަނީ އަދިތްޔާ ޗޯޕްރާ އަދި ޝްރިދާރް ރާގަވަން އެވެ. ޕްރިތަމްގެ މިޔުޒިކް ފިލްމުގައި ހިމަނާފައިވާއިރު ސަލްމާން އަދި ކެޓްރީނާގެ އިތުރުން "އޭކްތާ ޓައިގަރ" ގައި ގޯޕީގެ ރޯލުން ފެނުނު ތަރި ރަންވީރު ޝޯރޭވެސް މުހިންމު ރޯލަކުން ފެންނާނެއެވެ. ބޮލީވުޑް އެކްޓަރ ޢިމްރާން ޙާޝްމީވެސް ނެގެޓިވް ރޯލަކުން މި ފިލްމުގައި ފެނިގެންދާނެއެވެ.
ގާތްގަޑަކަށް 35 މިލިއަން އެމެރިކާ ޑޮލަރުގެ ބަޖެޓެއްގައި ހަދާ މި ފިލްމުގެ މަންޒަރުތައް ނަގަން ފެށީ މާރިޗު މަހުއެވެ. އިސްތަންބޫލު، ޔޫއޭއީ އަދި އޮސްޓްރޭލިއާގައިވެސް މި ފިލްމުގެ ބައެއް މަންޒަރުތައް ޝޫޓްކުރާނެއެވެ.