ދުނިޔޭގެ ޕޮޕްސްޓާރ އަދި ގްރެމީ އެވޯޑަށް ނޮމިނޭޓްވެފައިވާ ގްރޫޕް ބީޓީއެސްއާއި އެމެރިކާގެ ފާސްޓްފުޑް ކުންފުނި މެކްޑޮނާލްޑްސް މިއަހަރު އޭޕްރީލް މަހު ވަނީ "ބީޓީއެސް މީލް" ކެމްޕޭނެއް ފަށާފައެވެ. މެކްޑޮނަލްޑުން ފަށާފައިފައިވާ ސެލިބްރީޓީން ބައިވެރިކޮށްގެން އެމީހުންގެ ކެއުންތައް އިޝްތިހާރުކުރުމުގެ ކެމްޕޭންގައި މިފަހަރުގެ ބައިވެރިޔަކީ ހިޕް ހޮޕް އާޓިސްޓް ސާވަތީ އެވެ.
"ސާވަތީ މީލް" ގެ ނަމުން ނަން ދީފައިވާ މި މީލް މިމަހުގެ 9 ވަނަ ދުވަހުން ފެށިގެން ލިބޭނެއެވެ. މީލްގައި ހިމެނެނީ ބިގް މެކް، ފޯ ޕީސް ޗިކަން ނަގެޓްސް، މީޑިއަމް ފްރައިސް، މީޑިއަމް ސްޕްރައިޓް އަދި ބާބަކިއު ސޯސް އެކެވެ. މި ސޯސްގެ ނަން ވެސް މިހާރު ވަނީ "ސާވަތީ އެންޑް ސަވަރ" އަށް ބަދަލުކޮށްފައެވެ.
މީގެއިތުރުން ބިގް މެކް ނުވަތަ ނަގެޓް ފްރައިސް ޓޮޕިން ބޭނުންކޮށްގެން މި މީލް "ރީމިކްސް" ކުރުމަށްވެސް މެކްޑޮނަލްޑުން ދަނީ ހިތްވަރު ދެމުންނެވެ.
މިދިޔަ އަހަރު ފެށި މި ކެމްޕޭން ވަރަށް ކާމިޔާބު ކަމަށާއި މެނޫގައި މި ކަހަލަ ތަފާތު އައިޓަމްތަކެއް ހިމަނާލަންވެސް ފަސޭހަކަމަށް މެކްޑޮނަލްޑުން ބުނެއެވެ.
މިދިޔަ އޭޕްރީލްމަހު ފެށި "ބީޓީއެސް މީލް" އިންވެސް މެކްޑޮނަލްޑަށްވަނީ ބޮޑު ފައިދާއެއް ލިބިފައެވެ. މިގޮތުން ކޮރެއާގައި ހުންނަ މެކްޑޮނާލްޑްސް ރެސްޓޯރެންޓުން ބުނީ މިދިޔަ މެއި މަހުގެ 27 ވަނަ ދުވަހު މި މީލް ތަޢާރަފް ކުރުމާއެކު 1.2 މިލިއަން ބީޓީއެސް މީލް ވަނީ ހަމައެކަނި ކޮރެއާގައިވެސް ވިކިފައެވެ. ކޮރެއާގައި ބީޓީއެސް މީލް ތަޢާރަފް ކުރުމާއިއެކު ހަތަރު ހަފްތާ ތެރޭގައި ޗިކަން ނަގެޓްސް އިން 250 އިންސައްތަ ވަނީ އިތުރުވެފައެވެ.