ކޯވިޑްގެ ބަލިމަޑުކަމާއި ހެދި 2 އަހަރު ދުވަހުގެ މެދުކެނޑުމަކަށްފަހު "މެޓް ގާލާ 2021" މި އަހަރު ބާއްވާގޮތަށް ހަމަޖެހިފައެވެ.
އަންނަ ސެޕްޓެމްބަރުމަހު ބާއްވަން ހަމަޖެހިފައިވާ މި އިވެންޓް ބާއްވާނީ ބަލިމަޑުކަމާއި ދެކޮޅަށް ހަރުކަށި ފިޔަވަޅުތަކާއެކުގައިކަމަށް އިވެންޓް އޮގަނައިޒް ކުރާ ފަރާތުން ބުނެއެވެ. މިގޮތުން އިވެންޓަށް ދާ ހުރިހާ އެންމެވެސް ވެކްސިން ފުރިހަމަކޮށް އަދި ވެކްސިން ފުރިހަމަކުރި ކޮށްފައިވާ ކަމުގެ ހެކިވެސް ހުށަހަޅަންޖެހޭނެއެވެ. މީގެ އިތުރުން މާސްކު އަޅައިގެން އުޅުމާއި މާސްކު ނެގޭނީ ހަމައެކަނި ކައިބޮއި ހަދަން ކަމަށްވެސް އޮގަނައިޒަރުން ބުނެއެވެ.
މިއަހަރުގެ "މެޓް ގާލާ" ހޯސްޓްކުރާ ފަރާތްތަކުގެ ތެރޭގައި ބިލީ އެއިލިޝް، ނައޯމީ އޮސާކާ، އަމަންޑާ ގޯމޭން، އަދި ތިމޮތީ ޗަލަމެޓް ހިމެނެއެވެ. ގާލާ ގެ އޮނަރަރީ ޗެއަރ އަކީ ޓޮމް ފޯރޑް އަދި އަނާ ވިންޓުއަރ އެވެ.
މިއަހަރުގެ އިވެންޓުގައި އެންމެ ބޮޑު ސަމާލުކަމެއް ލިބޭނީ އަަޅައިގެން ދާ ހެދުމުގެ ބަދަލުގައި ފޭސްމާސްކަށް ކަމަށް މިހާރުވެސް ވަނީ ބެލެވިފައެވެ.
"މެޓް ގާލާ" ގެ އިތުރުން ސެޕްޓެމްބަރުގައި ފަށާ "ނިއުޔޯކް ފެޝަން ވީކް" ގައިވެސް ބަލިމަޑުކަމާއި ދެކޮޅަށް ފިޔަވަޅުތައް އަޅާނެކަމަށް އިވެންޓް އޮގަނައިޒްކުރާ ފަރާތުން ބުނެއެވެ.