ސްޕޭންގެ އެންމެ ބޮޑު ސިނަމާ އިވެންޓްގައި ހޮލީވުޑްގެ މަޝްހޫރު އެކްޓަރ ޖޯނީ ޑެޕަށް ލައިފް އެޗީވްމަންޓް އެވޯޑް ދޭން ނިންމުމުން އެޤައުމުގެ އަންހެން ފަންނާނުން ނުރުހުން ފާޅުކުރަން ފަށައިފިއެވެ.
ޖޯނީ ޑެޕަށް ލައިފް އެޗީވްމަންޓް އެވޯޑް ދޭން ނިންމާފައިވަނީ ސެން ސެބްސެޓެއިން ފިލްމު ފެސްޓިވަލްގައެވެ. މި ނިންމުމަށް ފާޑުކިޔާ ނުރުން ފާޅުކުރަމުން އަންނަނީ ސްޕެއިންގައި ފިލްމު އުފައްދާ އަންހެން ފަންނާނުގެ ޖަމިއްޔާކަމަށްވާ ސްޕެއިން އެސޯސިއޭޝަން އޮފް ފީމޭލް ފިލްމު މޭކާސްއިންނެވެ.
އެ ޖަމިއްޔާއިން ބުނީ އަންހެނުން ނަށް ގެވެށި އަނިޔާކޮށްފައިވާ މީހަކަށް ބޮޑު ޝަރަފެއް ދިނުމަކީ ލަދުވެތިކަމެއްކަމަށެވެ. އަދި މި އެވޯޑް ދިނުމުން އޭގެއިން ދޭހަ ކޮށްދެނީ ގެވެށި އަނިޔާ ކުރާ މީހަކީ މޮޅަށް އެކްޓްކުރާ މީހަކަށްވެއްޖެނަމަ އެއީ އެއްވެސް މައްސަލައެއް ނޫންކަމަށެވެ.
ޖޯނީ ޑެޕް އޭނާގެ ކުރީގެ އަންހެނުން ބަތަލާ އެމްބާ ހާޑަށް ގެވެށި އަނިޔާކުރި ކަމަށް ބުނެ ނޫހެއްގައި ލިޔެފައިވާ ވާހަކަތަކީ ސައްހަ ވާހަކަތަކެއް ކަމަށް އިނގިރޭސިވިލާތުގެ ކޯޓަކުން ވަނީ ނިންމާފައެވެ. މި ތުހުމަތުތަކާއި ޑެޕް އޭރު ކުޅެން ތައްޔާރުވަމުންދިޔަ ފިލްމު "ފެންޓާސްޓިކް ބީސްޓްސް 3" ވަނީ ވަކިވެސްކޮށްފައެވެ.
ޖޯނީ ޑެޕްގެ ކުރީގެ އަންހެނުން އެމްބާ ހާޑަށް ގެވެށި އަނިޔާ ލިބުނުކަމަށް ބުނެ އެމްބާ އެވާހަކަތައް ލިޔެފައިވަނީ ވޮޝިންޓަން ޕޯސްޓްގައެވެ. އެހެންނަމަވެސް އެ ލިޔުމުގައި ޖޯނީގެ ނަން ހިމަނާފައެއް ނުވެއެވެ. މި ލިޔުމާއި ގުޅިގެން ލިބުނު ގެއްލުމުގެ ބަދަލުގެ ގޮތުގައި އެމްބާގެ އަތުން 50 މިލިއަން ޑޮލަރުގެ ބަދަލެއް ހޯދުމަށް ކޯޓްގައި ވަނީ ދައުވާކޮށްފައެވެ. އެހެންނަމަވެސް މި މައްސަލައިގެ އަޑުއެހުންތައް އަންނަ އަހަރުގެ އޭޕްރިލަށް ވަނީ ފަސްކޮށްފައެވެ.