ޖާންވީގެ ބައްޕަ ބޯނީ ކަޕޫރު ޕްރޮޑިއުސްކުރާ ފިލްމު "މިލީ" ގެ ޝޫޓިންތަކަށް ޖަންވީ ތައްޔާރުވެ ފިލްމުގެ މަސައްކަތްތައް ފަށައިފިއެވެ.
މި ފިލްމުގެ މަންޒަރުތައް ފުރަތަމަ ނަގަން ހަމަޖެހިފައި އޮތީ މުމްބާއީގައެވެ. އެހެންނަމަވެސް ކޯވިޑްގެ ބަލިމަޑުކަމާއި ހެދި ޝޫޓިންތައް ކުރިޔަށް ނުގެންދެވި އަނެއްކާވެސް މިވަނީ އަލުން ޝެޑިއުލެއް ކަނޑައަޅާފައެވެ. މި ފަހަރުގެ ޝެޑިއުލްގެ ދަށުން ފިލްމު ޝޫޓިންތަކަށް ދެހެރާދުން އަވަށަށް އަންނަ މަހު ޖާންވީ ފުރަން މިހާރު އަންނަނީ ތައްޔާރުވަމުންނެވެ.
ބައްޕަ ބޯނީއާއި އެކުގައި ޖާންވީ ފުރަތަމަ ފަހަރަށް މަސައްކަތް ކުރާ މި ފިލްމަކީ މަލަޔާލަމް ފިލްމު "ހެލެން" ގެ ހިންދީ ރީމޭކެކެވެ.
މި ފިލްމުގެ މަސައްކަތް މިދިޔަ ޖޫން މަހު ފަށަން ތާވަލުކޮށްފައި އޮތް ނަމަވެސް ކޯވިޑްގެ ބަލިމަޑުކަމާއި ހެދި މަސައްކަތްތައް ލަސްވެފައި އޮތުމަށްފަހު ޝޫޓިންތައް ފެށޭވަރު މިވީ އަދި ކިރިޔާއެވެ.
ބޯނީ ކަޕޫރާއި ޒީ ސްޓޫޑިއޯ ގުޅިގެން ޕްރޮޑިއުސްކުރާ މި ފިލްމުގެ ޑައިރެކްޓަރަކީ އޮރިޖިނަލް ފިލްމުގެވެސް ޑައިރެކްޓަރ މަތުކުއްޓީ ޒޭވިއަރއެވެ. ޖާންވީގެ ބައްޕަގެ ރޯލުން ފިލްމުގައި ފެނިގެންދާނީ ކުރީގެ އެކްޓަރ މަނޯޖް ޕަހްވާ އެވެ.
މަލަޔާލަމް ފިލްމު "ހެލެން" އަކީ ކެނެޑާއަށް ދިއުމަށް އަޒުމު ކަނޑައަޅައިގެން އުޅުނު ޒުވާން ނަރުހެއް ކުއްލިއަކަށް ވީނުވީއެއް ނޭގި ގެއްލިގެން ހިނގާ ހާދިސާތަކެއް މައްޗަށް ބިނާކޮށް ހަދާފައިވާ ފިލްމެކެވެ. ހެލެންގެ ރޯލުން އަނާ ބެން ފެނިގެންދިޔައިރު ލާލް، ނޮބެލް ބާބޫ ތޯމަސް، އަޖޫ ވަރުގީސް، ރޯނީ ޑޭވިޑް، ބިނޫ ޕާޕޫ ވެސް ފިލްމުން ފެނިގެންދިޔައެވެ.