މަޝްހޫރު އިނގިރޭސި ލަވަކިޔުންތެރިޔާ އަދި ފިލްމީ ތަރި ޖެނިފަރ ލޮޕޭޒް މިހާރު އުޅެނީ އެންމެ ފަހުގެ ލޯބިވެރިޔާ ކުރީގެ ބޭސްބޯލް ތަރި އެލެކްސް ރޮޑްރިގޭޒްގެ އެންގޭޖްމަންޓް ރޫޅާލުމަށް ފަހު ކުރިން ވެސް ޖޭލޯގެ ބައިވެރިޔަކަށްވި މަޝްހޫރު އެކްޓަރު ބެން އެފްލެކް އާއެކުއެވެ.
މިއާއެކު ޖޭލޯ ވަނީ ކުރީގެ ބައިވެރިޔާ އެލެކްސް އޭނާގެ އިންސްޓަގްރާމުން އަންފޮލޯ ކޮށްފައެވެ. އަންފޮލޯ ކުރުމުގެ އިތުރުން އެލެކްސް އާއިއެކު ނަގާފައިވާ ހުރިހާ ފޮޓޯއެއްވެސް ޖެނިފަރވަނީ ޑިލީޓްކޮށްލާފައެވެ.
ހަތަރު އަހަރު އެކުގައި އުޅުމަށްފަހު އެލެކްސްއާއި ޖޭލޯ ގުޅުން ކަނޑާލާފައިވަނީ މި ދިޔަ އޭޕްރީލް މަހުއެވެ. މި ދެމީހުން އެންގޭޖްވެގެންވެސް 2 އަހަރު އެކުގައި އުޅެފައިވެއެވެ.
އެލެކްސްއާއި ގުޅުން ކަނޑާލުމަށްފަހު ޖޭލޯއާއި ބެންގެ ގުޅުން އަނެއްކާވެސް އަންނަނީ ގާތްވަމުންނެވެ. މިގޮތުން މި ދެމީހުން އާއިލާއާއި އެކު މިދިޔަ މަހު ޑިޒްނީލޭންޑަށްވެސް ޗުއްޓީ ދަތުރެއްވަނީ ކޮށްފައެވެ.
ދެކުދިންގެ މަންމައެއް ކަމަށްވާ ޖޭލޯ އުފަންވީ 1969 ވަނަ އަހަރު އެމެރިކާގެ ނިއުޔޯކަށެވެ.
ޖޭލޯ އެންމެ ފުރަތަމަ ކައިވެނި ކުރީ 1997 ވަނަ އަހަރު ކިއުބާގެ ވޭޓަރެއް ކަމަށްވާ އޮޖާނީ ނޯއާއެވެ. ނަމަވެސް އެގުޅުން މާގިނަ ދުވަހު ދެމިއޮންނަ ގޮތެއް ނުވެ 1998 ވަނަ އަހަރު އެކައިވެނި ވަނީ ރޫޅިފައެވެ. ދެން އޭނާ ކައިވެނި ކުރީ ކްރިސް ޖާޑްއާއިއެވެ. އެކައިވެނި ވެސް ދެމިއޮތީ 2001 ވަނަ އަހަރުން 2003 ވަނަ އަހަރަށެވެ. އޭގެފަހުން ތިން ވަނަ އަށް ޖޭލޯ ކައިވެނި ކުރީ މާކް އެންތަނީއާއިއެވެ. އެއީ 2004 ވަނަ އަހަރު އެވެ. އެކައިވެނި ރޫޅުނީ 2014 ވަނަ އަހަރު އެވެ.