ބްރޯޑްކާސްޓިންއާގުޅޭ ޤާނޫނުތަކާއި ޤަވާއިދުތައް އިސްލާހުކުރުމަށް ވަނީ ފޮނުވާފައި: މަރިޔަމް ވަހީދާ
ބްރޯޑްކާސްޓިންއާ ގުޅޭ ޤާނޫނާއި ޤަވާއިދުތަކަކީ ޒަމާނަށް ފެތޭ ގަވާއިދުތަކަށް ހެދުމުގެ މަސައްކަތް ފަށާފައިވާކަމަށް ބްރޯޑްކާސްޓިންގ ކޮމިޝަންގެ ރައީސް މަރިޔަމް ވަހީދާ ވިދާޅުވެއްޖެއެވެ.
ބްރޯޑްކާސްޓިންގ ދުވަސް ފާހަގަކުރަނީ ކޮންމެ އަހަރެއްގެ އޮކްޓޯބަރުމަހުގެ 4 ވަނަ ދުވަހުއެވެ.
ބްރޮޑްކާސްޓިންގ ދުވަސް ފާހަގަކުރަމުން އަންނަނީ، ދިވެހިރާއްޖެއަށް ރޭޑިއޯ ސިގްނަލް ފުރަތަމަ ތާޢާރަފްވި ދުވަހާއި ގުޅުވައިގެންނެވެ.
ބްރޯޑްކާސްޓިންގ ދުވަހާއި ގުޅިގެން ކޮމިޝަންގެ ރައީސް މަރިޔަމް ވަހީދާ ދެއްވި މެސެޖުގައި ވިދާޅުވީ ބްރޯޑްކާސްޓިންގ ދާއިރާއަކީ މީޑިއާގެ މިންގަނޑުތަކަށް ފެތޭ ދާއިރާއަކަށް ހެދުމަށް ކޮމިޝަނުން ގިނަ މަސައްކަތްތަކެއް ކުރައްވަމުންދާކަމަށެވެ. އަދި ޚާއްސަކޮށް ޒަމާނަށް އަންނަމުންދާ ބަދަލާއި، ރާއްޖޭގައި ބްރޮޑްކާސްޓް ކުރުމުގައި ބޭނުންކުރާ ގޮތްތަކަށް އައި ބަދަލުތައް ޤަވާއިދަށް ފެއްތުމުގެ މަސައްކަތް ކުރަމުންދާކަމަށްވެސް އޭނާ ވިދާޅުވިއެވެ.
މަރިޔަމް ވަހީދާ ވިދާޅުވީ ބްރޮޑްކާސްޓްކުރުމާއި ގުޅޭގޮތުން ހެދިފައިވާ ޤަނޫނާއި ގަވައިދުތަކުގައި ޒަމާނީ ކަންކަމަށް ރިޢާޔަތްކޮށްފައި ނެތްކަމަށެވެ. އެކަމާއި ގުޅިގެން އެދާއިރާގެ މިންގަނޑުތައް ހިފެހެއްޓުމަށް، ޤާނޫނާއި ޤަވާއިދު ތަންފީޒުކުރުމުގައި ދަތިތައް ހުރިކަން މަރިޔަމް ވަހީދާ ވިދާޅުވިއެވެ. އެހެންކަމުން ބްރޯޑްކާސްޓިންއާގުޅޭ ޤަވާއިދުތަކާއި ޤާނޫނުތައް އިސްލާހުކުރުމުގެ މަސައްކަތް ކޮމިޝަނުން ޚާއްސަ އިސްކަމެއްދީގެން ފަށާފައިވާކަމަށް މަރިޔަމް ވަހީދާ ވިދާޅުވިއެވެ.
"ޝޯޝަލް މީޑިއާ މެދުވެރިކޮށްވެސް މިހާރު ކޮންޓެންޓް ގެނެސްދެމުންދޭ. މި ކަންކަމަށް ޤާނޫނާ ގަވައިދުގަ ރިއާޔަތްކޮށްފައެއްނެތް. ޒަމާނާ އެއްގޮތަށް ޤާނޫނާ ޤަވައިދުތައް އިސްލާހްކޮށްފިނަމަ މިއަށްވުރެ ފަހި މުސްތަގްބަލެއް ދާއިރާއަށް އެބައޮތް. ގަވައިދުތައް އިސްލާހުކުރުމަށް ގެންނަން ޖެހޭ އިސްލަހުތައް ހިމަނާ މިހާރުވާނީ މަޖިލީހަށާ ކާމާބޭހޭ ފަރާތްތަކަށް ފޮނުވާފަ. މަސައްކަތްތައް ވަރަށް އަވަހަށް ފެށޭނެ." މަރިޔަމް ވަހީދާ ވިދާޅުވިއެވެ.
ބްރޯޑްކާސްޓްކުރުމުގެ ދުވަސް 2021
— MVbroadcom (@broadcomMV) October 4, 2021
"ދުރަށް ފޮނުވުން - ލޯތްބާއި އިޙްތިރާމާއެކު"
❤️?#MVBroadcastingDay2021 pic.twitter.com/zLD8cfesTa
މަރިޔަމް ވަހީދާ ވިދާޅުވީ ރަނގަޅު ބަޖެޓެއް ނެތުމަކީވެސް ބްރޯޑްކާސްޓިން ކޮމިޝަންގެ މަސައްކަތްތައް އެކަށީގެންވާ ގޮތެއްގައި ކުރިއަށްގެންދިއުމަށް އޮތް ބޮޑު ހުރަހެއްކަމަށެވެ. އެކަމުގެ ސަބަބުން ކޮމިޝަނަށް އަންނަ ޝަކުވާތަކާއި ހުށަހަޅާ މައްސަލަތައް ބެލުމުގައިވެސް ގޮންޖެހުންތައް ހުރިކަމަށް އޭނާ ވިދާޅުވިއެވެ.
ބްރޯޑްކާސްޓިންގ ދުވަހެއް ފާހަގަކުރުމުގެ މަޤުސަދަކީ ޤައުމު ބިނާކުރުމާއި، ޑިމޮކްރަސީ އާލާކުރުމާއި، ރައްޔިތުންގެ ޙޭލުންތެރިކަން އިތުރުކޮށް މަޢުލޫމާތު މުއްސަނދިކުރުމުގައި ބްރޮޑްކާސްޓަރުން އަދާކުރާ މުހިންމު ދަޢުރުގެ އަގު ވަޒަންކޮށް، ދާއިރާގެ ތަރައްޤީއަށް މަގުފަހިކޮށްދިނުމެވެ.
މިއަހަރުގެ ބްރޮޑްކާސްޓިންގ ދުވަހުގެ ޝިޢާރަކީ "ދުރަށް ފޮނުވުން – ލޯތްބާ އިޚުތިރާމާއެކު" މިއެވެ. މީގެ ބޭނުމަކީ ޓީވީއާއި ރޭޑިއޯގެ ދާއިރާއިން ދުރަށްފޮނުވާ ޚަބަރާ މަޢުލޫމާތަކީ މިންގަނޑުތަކަށްފެތޭ، ޒިންމާދާރު ގޮތެއްގައި ފޮނުވާ މަޢުލޫމާތަށްވުމުގެ މުހިންމުކަން ހާމަކޮށްދިނުމެވެ. ޚާއްސަކޮށް ދުރަށް ފޮނުވާ މަޢުލޫމާތުގެ ސަބަބުން ދިވެހީންގެ ދީނީ، އިޖުތިމަޢީ، ސަޤާފީ، އިޤްތިޞާދީ އަދި ސިޔާސީ ފޭރާން ރައްކާތެރިކޮށް އެކަކު އަނެކަކަށް އަޅާލުމާއި އޯގާތެރި މުޖުތަމަޢުއެއް ބިނާކުރުމަށް ބާރުއެޅުމެވެ.
ބްރޯޑްކާސްޓިންގ ދުވަހާއި ގުޅިގެން އެކި ހަރަކާތްތައް ކުރިއަށްގެންދިއުމަށްވެސް ކޮމިޝަނުން ވަނީ ނިންމާފައެވެ. އެގޮތުން މީޑިއާ މެދުވެރިކޮށް ކޮމިޝަންގެ މަސައްކަތްތަކުގެ މަޢުލޫމާތު ޙިއްސާކުރުމާއި، ސްކޫލް ދަތިވަރުން ނޫސްވެރިކަމާއި މީޑިއާގެ ދާއިރާއަށް އަހުލުވެރިކުރުމުގެ ހަރަކާތްތަކާއި ކޮމިޝަންގެ ސްޓާފުންގެ އަގު ވަޒަންކުރުމުގެ ހަރަކާތެއް ރާވާފައިވާކަމަށް ކޮމިޝަނުން މަޢުލޫމާތުދެއެވެ.