ރާއްޖެއާ ދެކޮޅަށް ފިޔަވަޅު އެޅުމަށް ގޮވާލައި، ޔޫރަޕިއަން ޔޫނިއަންގެ ޕާލިމެންޓަށް ހުށަހަޅާފައިވާ ޤަރާރަކީ، ވިލާތުގެ އިއްތިޙާދުގެ މެމްބަރު ޤައުމުތަކުން ޢަމަލުކުރުން ލާޒިމު ކުރާ ޤަރާރެއް ނޫންކަމަށް ރާއްޖެއިން އީ.ޔޫ.އަށް ކަނޑައަޅާފައި ހުންނަވާ ސަފީރު އަޙްމަދު ޝިޢާން ވިދާޅުވެއްޖެއެވެ.ޕީ.އެސް.އެމް.އާ ވާހަކަފުޅު ދައްކަވަމުން ޝިޢާން ވިދާޅުވީ، މި ޤަރާރަކީ މިދިޔަ އޭޕްރިލް މަހު އީ.ޔޫ. ޕާލިމެންޓުން ފާސްކޮށްފައިވާ ޤަރާރު ފަދައިން ރާއްޖެއާދެކޮޅަށް ފިޔަވަޅުތަކެއް އެޅުމަށް އީ.ޔޫ.ގެ މެމްބަރު ޤައުމުތަކަށް ލާޒިމުކުރާ ޤަރާރެއް ނޫންކަމަށެވެ. މި ޤަރާރު ހުށަހަޅާފައިވަނީ އިނގިރޭސި ވިލާތުގެ ކޮންޒަރވޭޓިވް ޕާޓީއިން އިސް ނަގައިގެންނެވެ. ޝިޢާން ވިދާޅުވީ، މި ޤަރާރަކީ ރާއްޖޭއާއި މެދު ހުށަހަޅާފައިވާ ޤަރާރު އީ.ޔޫ.ގެ އެހެން މުއައްޞަޞާތަކުގެ ސަމާލުކަމަށް ގެނައުމުގެ މަޤްޞަދުގައި ހުށަހަޅާފައިވާ ޤަރާރެއްކަމަށެވެ. އަދި، މި ޤަރާރުގެ ސަބަބުން، ރާއްޖެއާއި ވިލާތުގެ އިއްތިހާދުގެ މެމްބަރު ޤައުމުތަކާއި، އީ.ޔޫ.ގެ އެހެން ގުނަވަންތަކުގެ މެދުގައި އޮތް ގުޅުމަށް އެއްވެސް ހީނަރުކަމެއް އަންނާނެކަމަށް ޤަބޫލްފުޅު ނުކުރައްވާކަމަށްވެސް ވިދާޅުވިއެވެ.ޝިޢާން ވިދާޅުވީ، ވިލާތުގެ އިއްތިހާދުގެ ވަފްދެއް އަންނަ މަހު ރާއްޖެއަށް ޒިޔާރަތް ކުރެއްވުމަށް ހަމަޖެހިފައިވާކަމަށާއި، ރާއްޖޭގެ މިނިވަން މުވައްސަސާތައް އިތުރަށް ހަރުދަނާކުރުމުގައި އީ.ޔޫ.އިން އެހީތެރިކަން ފޯރުކޮށްދެއްވަމުން ގެންދަވާނެކަމަށެވެ. މީގެ އިތުރުން، ވިލާތުގެ އިއްތިހާދުގެ ދައުވަތަކަށް ޚާރިޖީ ވަޒީރު ދުންޔާ މައުމޫން ބްރަސެލްސްއަށް ޒިޔާރަތް ކުރެއްވުމަށް ހަމަޖެހިފައިވާކަމަށާއި، މި ދަތުރުފުޅުގެ އިންތިޒާމްތައް މިހާރު ހަމަޖައްސަވަމުން ގެންދަވާކަމަށް ޝިޢާން ވިދާޅުވިއެވެ.