ބައިނަލްއަޤްވާމީ ފެންވަރުގެ އެއަރ ޓްރެފިކް ކޮންޓްރޯލަރުން ތަމްރީންކުރެވޭ ފެންވަރުގެ "އޭޓީސީ ޓަވަރ ސިމިއުލޭޓަރ"އެއް އެމްއޭސީއެލްގެ ތަމްރީންތަކުގައި ބޭނުންކުރަން ފަށައިފިއެވެ. މިއީ މި ފެންވަރުގެ ތަމްރީން ރާއްޖޭގައި ފަށާ ފުރަތަމަ ފަހަރެވެ.
ރާއްޖޭގެ ވައިގެ ދަތުރުފަތުރުގެ ނިޒާމު ފުޅާވަމުން އަންނަ އިރު، މި ދާއިރާއަށް ބޭނުންވާ ތަމްރީން ލިބިފައިވާ މީހުން ނުލިބުމަކީ ރާއްޖޭގެ އޭވިއޭޝަން ދާއިރާއަށް ކުރިމަތިވެފައިވާ ގޮންޖެހުމެކެވެ. ޚާއްސަކޮށް އެއަރ ޓްރެފިކް ކޮންޓްރޯލް ފަދަ ދާއިރާތަކަށް އެކަށީގެންވާ މީހުން ލިބެނީ، ވަޒީފާއަށް ނެގުމަށްފަހު އެމީހުންނަށް ބޭނުންވާ ޓެކްނިކަލް ތަމްރީން ދީގެންނެވެ.
އެމްއޭސީއެލްއިން ގެނައި، އެއަރ ޓްރެފިކް ކޮންޓްރޯލް ސިމިއުލޭޓަރ އިފްތިތާޙުކޮށްދެއްވީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްގެ ޑެޕިއުޓީ ޗީފް އޮފިސަރ އަދި އެކްޓިންގ އިންޗަރޖް އިބްރާޙިމް ތާހާއެވެ. އޭޓީސީ ޓަވަރ ސިމިއުލޭޓަރަކީ އެއަރޕޯޓް ސަރަޙައްދުގެ ފްލައިޓްތަކުގެ ދަތުރުކުރުން ކޮންޓްރޯލްކުރުމުގައި ބޭނުންވާ ތަމްރީން ދިނުމަށް ބޭނުންކުރާ ސިސްޓަމެކެވެ. މި ސިސްޓަމުން އެއަރޕޯޓްގެ 50 މޭލުގެ ރޭޑިއަސް ސަރަޙައްދެއްގެ އުދުހުންތައް ބަލާލެވޭނެއެވެ.
ތާހާ ވިދާޅުވީ، އޭޓީސީގެ ޒަމާނީ ތަމްރީން ރާއްޖެއިން ލިބޭނެ ގޮތް ހަމަޖެހި، މަސައްކަތްތައް ފެށުންވެގެންދަނީ ކުރިމަގުގައި މުޅި ދާއިރާއަށް އަންނާނެ ބޮޑު ކުރިއެރުމަކަށްކަމަށެވެ. ޚާއްސަކޮށް ރާއްޖެއިން ބޭރަށް ފޮނުވައިގެން ތަމްރީންތައް ދިނުމަށް، ކޮންމެ އަހަރަކު ކުރާ ބޮޑެތި ހޭދަތައް ބޮޑުތަނުން ކުޑަކުރެވޭނެކަމަށެވެ. މި ސިސްޓަމަކީ 4މިލިއަން ރުފިޔާގެ ސިސްޓަމެކެވެ.
"އެތައް މިލިއަން ރުފިޔާގެ އިންވެސްޓްމަންޓެއް މިއީ. ރާއްޖެއިން ބޭރަށް ތަމްރީނަށް ފޮނުވުމަށް ވަރަށް ބޮޑެތި ހޭދަތައް ކޮންމެ އަހަރަކު ކުރޭ. ނަމަވެސް ރާއްޖޭގައި ތިބެގެން ތަމްރީން ލިބޭނެ އިންތިޒާމާއެކު ޚަރަދުތައް ވަރަށް ބޮޑަށް ކުޑަކުރެވޭނެ." ތާހާ ވިދާޅުވިއެވެ.
އެއަރ ޓްރެފިކް ކޮންޓްރޯލްގެ ޖެނެރަލް މެނޭޖަރ އިބްރާޙިމް ޙަމީދް ވިދާޅުވީ، މިފަދަ ޒަމާނީ ސިސްޓަމެއް ހޯދުމުގެ މަސައްކަތް ފެށީ 2019ވަނަ އަހަރުކަމަށެވެ. މިއީ ރާއްޖެއިން ބޭރުން ތަމްރީންތައް ހޯދުމުގައި ހުރި ގޮންޖެހުންތަކަށް ބޮޑު ލުޔެއް ލިބޭނެކަމެއްކަމުގައި ޙަމީދު ވިދާޅުވިއެވެ. އޭނާ ވިދާޅުވީ މިއީ މިހާރު ދުނިޔޭގައިވެސް ބޭނުންކުރާ އެންމެ ޒަމާނީ ސިމިއުލޭޓަރ ސިސްޓަމްކަމަށެވެ.
"މިއީ އެންމެ ޒަމާނީ ސިމިއުލޭޓަރެއް. އުއްމީދަކީ ކުރިމަގުގައި އެމްއޭސީއެލްއަކީ، އެއަރ ޓްރެފިކް ކޮންޓްރޯލަރުން ތަމްރީންކުރުމުގައި ސަރަޙައްދީގޮތުންވެސް އެންމެ ކުރިއަރާފައިވާ ތަމްރީންދޭ މަރުކަޒަށް ހެދުން." ޙަމީދު ވިދާޅުވިއެވެ.
ރާއްޖޭގައި މިހާރު ޚިދުމަތްދެމުންދާ 17 ވައިގެ ބަނދަރުގެ އެއަރ ޓްރެފިކް ކޮންޓްރޯލްކުރަނީ އެމްއޭސީއެލްއިންނެވެ.
"މި ސިމިއުލޭޓަރުން މުޅި ވީއައިއޭގެ ގްރައުންޑް މެޕް ތްރީޑީ އިމޭޖް ފެންނާނެ. އަދި ފްލައިޓް މޫވްމަންޓްތައް ފެންނާނެ. ވީއައިއޭގެ ކޮންމެ ތަނެއްގެ އެގްޒެކްޓް ޕޮއިންޓް ބަލާލެވޭނެ. ކުރިން ކިޔަވައިދިނީ މޭޒެއް މަތީގައި މޮޑެލްތަކެއް ބަހައްޓައިގެން". އޭޓީސީ އިންސްޓަރަކްޓަރ އަޙުމަދު ނަޒީރު ވިދާޅުވިއެވެ.
އޭޓީސީގެ ޓްރެއިނިންގ މެނޭޖަރ މޫސާ ޝާހިދު ވިދާޅުވީ، ސިމިއުލޭޓަރުގެ ޓްރެއިނިންތައް ގެންދާނީ، ބައިނަލްއަޤްވާމީ މިންގަނޑުތަކަށް ކަމަށެވެ. މި ސިމިއުލޭޓަރުގެ އެހީގައި ވެލާނާ އިންޓަރނޭޝަނަލް އެއަރޕޯޓްގެ އިތުރުން، އަތޮޅުތަކުގެ އެއަރޕޯޓް ސަރަޙައްދުގެ އެއަރ ޓްރެފިކް ބެލެހެއްޓުމާ ގުޅޭ މޮޑެލްތައް ތައްޔާރުކޮށް ތަމްރީން ދެވޭނެއެވެ.
"ބޭރުގެ އެކްސްޕަރޓަކާ ލޯކަލް އިންސްޓްރަކްޓަރުންގެ އެހީގައި އަދި ތަމްރީން ގެންދާނީ. އިންޓަރނޭޝަނަލް ފެންވަރަށް މޮޑިއުލްތައް ތައްޔާރުކޮށް ކުރިއަށްގެންދާނީ. މާނަޔަކީ ސިންގަޕޯ މެލޭޝިއާފަދަ ގައުމުތަކުން ހިންގާ ޓްރެއިނިންގ މިތަނުންވެސް ދޭނީ."ޝާހިދު ވިދާޅުވިއެވެ.
ފުރަތަމަ ތަމްރީންތައް އަންނަ ޖެނުއަރީމަހު ފެށުމަށްވަނީ ރާވާފައެވެ. ޕްރޮގްރާމް ފުރަތަމަ ގެންދާނީ އެމްއޭސީއެލްގެ މުވައްޒަފުންނަށެވެ. ނަމަވެސް ފަހުން ޕްރޮގްރާމްތައް އިތުރަށް ފުޅާކުރާނެކަމަށް އެ ކުންފުނިން ބުނެއެވެ.