ކޯވިޑްގެ ފުރަބަންދަށް ފަހު އިންޑިއާގެ ސިނަމާތައް އަލުން ހުޅުވާލީ މި އަހަރުގެ އޮކްޓޫބަރު މަހުގެ ތެރޭގައެވެ. އެހެންނަމަވެސް މާގިނަ ފިލްމުތަކެއް ސިނަމާތަކަށް ނާދެއެވެ. އަންނަ އަހަރު ވެގެންދާނީ ގިނަ ބަޔަކު ކޯވިޑްގެ ކުރިން އިންތިޒާރުކުރަމުން އައި ފިލްމުތައް ސިނަމާތަކަށް އަންނާނެ އަހަރަކެށެވެ. މިހާރުވެސް މި ކިއުގައި ފާހަގަކޮށްލެވޭ ބޮޑެތި ފިލްމުތައް އެބަ ހުއްޓެވެ.
ރާދޭ ޝާމް
1. 'ރާދޭ ޝާމް' : ރާދާ ކްރިޝްނަ ކުމާރު ޑައިރެކްޓްކުރާ މި ފިލްމަކީ ސައިންސް ފިކްޝަން ރޮމޭންޓިކް ފިލްމެކެވެ. ޕްރަބާސްއާއި ޕޫޖާ ހެގްޅޭ ލީޑްރޯލުން ފެންނަ މި ފިލްމު ރިލީޒްކުރާނީ އަންނަ ޖެނުއަރީ 14 ގައެވެ.
ޕްރިތްވީރާޖް
ހިސްޓޯރިކަލް އެޕިކް އެކްޝަން ޑްރާމާއެއްކަމަށްވާ މި ފިލްމަކީ އަކްޝޭ ކުމާރާއި މަނޫޝީ ޗިއްލަރު ފެންނާނެ ފިލްމެކެވެ. މި ފިލްމު ރިލީޒްކުރާނީ އަންނަ ޖެނުއަރީ 21 ގައެވެ.
ބަދާއީ ދޯ
ރާޖްކުމާރު ރާއޯ އާއި ބޫމީ ޕެޑްކަރް ލީޑްރޯލުން ފެނިގެންދާ މި ފިލްމަކީ ހަރްޝްވަރްދަން ކުލްކަރްނީ ޑައިރެކްޓްކުރާ ފިލްމެކެވެ. ރިލީޒްކުރަން ތާވަލުކޮށްފައިވަނީ އަންނަ ފެބްރުއަރީ 4 ގައެވެ.
ޝާބާޝް މިތޫ
އިންޑިއާގެ އަންހެން ޤައުމީ ކްރިކެޓް ޓީމުގެ ކެޕްޓަން މިތާލީ ރާޖްގެ ޙަޔާތުގެ މައްޗަށް އުފައްދާ މި ބަޔޯގްރޮފިކަލް ސްޕޯރޓްސް ޑްރާމާގައި ފެންނާނީ ތާޕްސީ ޕަންނޫއެވެ. މި ފިލްމުވެސް ރިލީޒްކުރަން ހަމަޖެހިފައި އޮތީ ފެބްރުއަރީ 4 ވަނަ ދުވަހުއެވެ.
ގަންގޫބާއީ ކާތިއާވާޅީ
ޙުސައިން ޒައިދީގެ ފޮތް "މާފިއާ ކުއީންސް އޮފް މުމްބާއީ" ގެ މައްޗަށް އުފައްދާ މި ބަޔޯގްރޮފިކަލް ކްރައިމް ޑްރާމާގެ އެންމު މުހިންމު ރޯލު ކުޅޭނީ ޢާލިއާ ބަޓް އެވެ. ސަންޖޭ ލީލާ ބަންސާލީ ޑައިރެކްޓްކޮށްފައިވާ މި ފިލްމު ވޯރލްޑްވައިޑްކޮށް ރިލީޒްކުރާނީ ފެބްރުއަރީ 18 ގައެވެ.
ބައްޗަން ޕާންޑޭ
އަކްޝޭ ކުމާރު، ކްރިތީ ސެނޮން އަދި ޖެކްލިން ފެނާންޑެޒް ލީޑްރޯލުން ފެންނާނެ މި އެކްޝަން ކޮމެޑީ ޑައިރެކްޓްކުރަނީ ފަރްހާސް ޝަމްސީއެވެ. ފިލްމު ރިލީޒްކުރާނީ އަންނަ މާޗް 4 ގައެވެ.
ޝަމްޝޭރާ
ކަރަން މަލޯތްރާ ޑައިރެކްޓްކުރާ މި ޕީރިއަޑް އެކްޝަން ޑްރާމާގެ ލީޑްރޯލުން ފެންނާނީ ރަންބީރު ކަޕޫރާއި ވާނީ ކަޕޫރު އަދި ސަންޖޭ ދަތް އެވެ. އެކި ތާރީޚްތަކުގައި ރިލީޒކުރަން މީގެކުރިން ތާވަލުކޮށްފައިވާ މި ފިލްމު މިހާރު ރިލީޒްކުރާނީ މާޗް 18 ގައެވެ.
ބޫލްބުލައްޔާ 2
2007 ވަނަ އަހަރު ދެއްކި ހޮރޯ ކޮމެޑީ "ބޫލް ބުލައްޔާ" ގެ ސީކުއަލް ކަމުގައިވާ މި ފިލްމު ޑައިރެކްޓްކުރަނީ އަނީސް ބަޒްމީއެވެ. ކާތިކް އާރްޔަން، ތައްބޫ އަދި ކިއަރާ އަދްވާނީ ލީޑްރޯލުން ފެންނަ މި ފިލްމު ރިލީޒްކުރާނީ މާޗް 25 ގައެވެ.
ދާކަޅް
ރަޒްނީޝް ގާއީ ޑައިރެކްޓްކުރާ މި އެކްޝަން ތްރިލަރގެ ލީޑްރޯލުން ކަންގަނާ ރަނައަޓް، އަރުޖުން ރާމްޕަލް އަދި ދިވްޔާ ދައްތާވެސް ފެންނާނެއެވެ. މި ފިލްމު ރިލީޒްކުރާނީ އަންނަ އޭޕްރީލް 8 ގައެވެ.
ލާލް ސިންގް ޗައްޑާ
1994 ވަނަ އަހަރު ދެއްކި ފިލްމު "ފޮރެސްޓް ގަމްޕް" އަސްލަކަށް ބަލައިގެން އުފައްދާފައިވާ މި ފިލްމަކީ ކޮމެޑީ ޑްރާމާއެކެވެ. ޢާމިރުޚާނާއި ކަރީނާ ކަޕޫރު ޚާން ލީޑްރޯލުން ފެންނާނެ މި ފިލްމު ރިލީޒްކުރާނީ އޭޕްރީލް 14 ގައެވެ.