2017 ވަނަ އަހަރު ޢިޢުލާނުކޮށްފައިވާ ފިލްމު "ސާރޭ ޖަހާސެ އައްޗާ" އުފައްދާނެކަމަށް ޕްރޮޑިއުސަރ ސިދާތް ރޯއި ކަޕޫރު އަނެއްކާވެސް ބުނެފިއެވެ.
އެނާ މިވާހަކަ އަލުން މި ދެއްކީ އެސްޓްރޯނެޓެއްކަމަށްވާ ރަކޭޝް ޝަރުމާގެ ޙަޔާތުގެ މައްޗަށް އުފައްދާ މި ބަޔޯޕިކްގެ އެއްވެސް ޙަބަރެއް ނުވެ ގިނަ ދުވަސްތަކެއްވެފައި ވަނިކޮށެވެ.
މަހޭޝް މަތިއާ ޑައިރެކްޓްކުރާ މި ފިލްމަށް މިހާރުވަނީ ގިނަ ބަދަލުތަކެއްވެސް ގެނެސްފައެވެ. ޝަރުމާގެ ރޯލު އެންމެ ފުރަތަމަ ހުށަހެޅީ ޢާމިރުޚާނަށެވެ. އޭގެފަހުން ޝާހުރުކްޚާނަށްވެސް މި ރޯލު ވަނީ ހުށަހަޅާފައެވެ. ނަމަވެސް އެންމެ ފަހު ވަގުތު ޝާހު މި ރޯލަށް ސޮއެއް ނުކުރިއެވެ. މި ދެ ތަރިންގެ އިތުރުން ވިކީ ކޯޝާލް، ފަރްހާން އަޚްތަރް އަދި ރަންބީރު ކަޕޫރަށްވެސް މި ރޯލު ހުށަހެޅިކަމަށްވެސް ވާހަކަ ދެކެވުނެވެ. އެހެންވީމާ ފިލްމުން ފެންނާނީ ކާކުކަމެއް އަދި ނޭގެއެވެ.
މި ފިލްމު ޕްރޮޑިއުސްކުރަނީ ސިދާތް އާއި ރޯނީ ސްކްރޫވާލާ އެވެ.
ސިދާތް އެންމެފަހުން އުފައްދާފައިވާ ނެޓްފްލިކްސް ސީރީޒް "އާރަނަޔަކް" އަށް އަންނަނީ ބޮޑު ތަރުޙީބެއް ލިބެމުންނެވެ. އޭނާގެ ކުރިއަށް ހުރި މަސައްކަތްތަކުގެ ތެރޭގައި އިޝާން ކައްތަރުގެ އެކްޝަން ވޯ ފިލްމު "ޕިއްޕާ" ، ކޮމެޑީ ޑްރާމާ "ގޯބަރް" އަދި އިންޑިއާގެ ނިއުކްލިއަރ ފިޒިޝަނުންކަމަށްވާ ހޯމީ ބާބާ އަދި ވިކްރަމް ސަރާބައިގެ ޙަޔާތުގެ މައްޗަށް އުފައްދާ ބަޔޯޕިކް ހިމެނެއެވެ.