އަވަސް އަރުވައިލައިގެން ކައިވެނި ކުރަން ބޭނުންނުވާކަމަށް "ހަސީން ދިލްރުބާ" އާއި "ރަޝްމީ ރޮކެޓް" ގެ ބޮޑު ކާމިޔާބާއެކީގައި އަހަރު ނިންމާލައިވާ ބޮލީވުޑް އެކްޓްރެސް ތާޕްސީ ޕަންނޫ ބުނެފިއެވެ.
ކުރީގެ ކްރިކެޓް ކުޅުންތެރިޔާ މެތިއަސް ބޮއެ އާއި ލޯބީގެގޮތުން ގުޅިގެން އުޅޭ ތާޕްސީ ބުނީ މިއީ ކައިވެނީގެ މޫސުން ކަމުގައި ވީނަމަވެސް އޭނާ އަދި އެހާ އަވަހަށް ކައިވެނި ކުރަން ބޭނުން ނުވާ ކަމަށެވެ. އަދި ކުރިއަށް މަސައްކަތްތައް އަދިވެސް އެބަހުރިކަމަށް ތާޕްސީ ބުނެއެވެ. ކައިވެނި ކުރަން ބޭނުންވަނީ ވަގުތު އޮވެގެން ވަރަށް ހަމަޖެހިގެން ކަމަށްވެސް ތާޕްސީ ވަނީ ބުނެފައެވެ.
2013 ވަނަ އަހަރު ދެއްކި ޑޭވިޑް ދަވަންގެ ކޮމެޑީ ފިލްމު "ޗަޝްމޭ ބައްދޫރް" އިން ބޮލީވުޑަށް ތަޢާރަފްވި ތާޕްސީ އަކީ ހިންދީ ސިނަމާގެ އިތުރުން ތަމަޅަ އަދި ތެލުގޫ ސިނަމާގައިވެސް މަޝްހޫރު ތަރިއެކެވެ.
ތާޕްސީގެ ފާހަގަކޮށްލެވޭ ފިލްމުތަކުގެ ތެރޭގައި 2013 ވަނައަހަރު ދެއްކި "ޗަޝްމޭ ބައްދޫރު" ، 2015 ވަނަ އަހަރު ދެއްކި "ބޭބީ" ، 2016 ވަނަ އަހަރު ދެއްކި "ޕިންކް" ، 2017 ވަނަ އަހަރު ދެއްކި "ޣާޒީ އެޓޭކް" ، 2018 ވަނަ އަހަރު ދެއްކި "މަންމަރުޒިއާން" 2019 ވަނަ އަހަރު ދެއްކި "ބަދްލާ" އަދި މިދިޔަ އަހަރު ދެއްކި "ޙަސީން ދިލްރުބާ" ހިމެނެއެވެ.