މަޝްހޫރު ކޮމީޑިއަން ކަޕިލް ޝަރުމާގެ އައު ކޮމެޑީ ސްޕެޝަލް ޝޯ "ކަޕިލް ޝަރުމާ:އައި އޭމް ނޮޓް ޑަން ޔެޓް" މި މަހު 28 ގައި ނެޓްފްލިކްސްއިން ޕްރިމިއަރ ކުރަން ނިންމައިފިއެވެ. މިކަން އިއުލާނުކޮށް ކަޕިލް ވަނ ބުދަ ދުވަހު ވީޑިއޯއެއްވެސް ނެރެފައެވެ. އެއް މިނެޓާއި 34 ސިކުންތުގެ މި ވީޑިއޯގައި ކަޕިލް މިހާ ހިސާބަށް ކުރި ދަތުރުގެ ވާހަކަ ކިޔަދޭނެއެވެ.
ކަޕިލް މިހާރު ގެނެސްދޭ ޝޯ " ކަޕިލް ޝަރުމާ ޝޯ" އަކީ އިންޑިޔާގެ ޓީވީ ޗެނަލްތަކުން ދައްކާ ޝޯތަކުގެ ތެރެއިން އެތައް މިލިއަން މީހުންނެއްގެ އެންމެ ފޭވަރިޓް ޝޯ އެވެ. އަދި އިންޑިއާގައި ވެސް މިއީ އެންމެ ގިނަ މީހުން ބަލާ 10 ޝޯގެ ތެރޭގައި އަބަދުވެސް ހިމެނެމުން އަންނަ ޝޯއެކެވެ.
ކަޕިލްއާ އެކު ޝޯގެ މުހިއްމު ބައިވެރިންނަކީ ސަޕްނާގެ ކެރެކްޓަރ ކުޅޭ އަބީޝެކް ކްރިޝްނާ އާއި ބައްޗާ/އައްޗާ ޔާދަވްގެ ކެރެކްޓަރ އިން ފެންނަ ކިކޫ ޝަރްދާ އާއި ޗަންދޫގެ ކެރެކްޓަރ އިން ފެންނަ ޗަންދަން ޕްރަބާކަރާއި ބޫރީގެ ކެރެކްޓަރ އިން ފެންނަ ސުމޯނާ ޗަކްރަވަތީގެ އިތުރުން ބަބްލީ/ލައްލީ މޯސީގެ ކެރެކްޓަރ އިން ފެންނަ ބާރްތީ ސިންގެވެ.
މީގެ އިތުރުން ޚާއްޞަ މެހުމާނެއްގެ ގޮތުން އަރްޗަނާ ޕުރާން ސިންގް އަކީ ވެސް ޝޯގެ މުހިއްމު ހިއްސާއެކެވެ.
"'ދަ ކަޕިލް ޝަރުމާ ޝޯ" ގެނެސްދެމުން އަންނަނީ 2018 ގެ ޑިސެމްބަރު މަހުގެ ފަހުކޮޅުން ފެށިގެންނެވެ. އަދި މި ޝޯގައި ޕްރޮޑިއުސަރެއްގެ ގޮތުގައި އެކްޓަރު ސަލްމާން ޚާން ވެސް ޙިއްޞާވެ އެވެ.
މި ޝޯ ފެށި ފަހުން އެންމެ ފަހުން މެދުކެނޑުމެއް އައީ މިދިޔަ އަހަރު ކޮވިޑާއި ހެދި އެވެ. ލޮކްޑައުންއާ ގުޅިގެން މަސައްކަތް ހުއްޓިފައި އޮތުމަށް ފަހު، ޝޯ އަލުން ގެނެސްދޭން ފެށީ މިދިޔަ އޮގަސްޓް މަހުގެ 1 ގ އެވެ.