އިންޑިއާގައި ހަލުވިކަމާއިއެކު ފެތުރެމުންދާ ކޯވިޑްގެ ބަލިމަޑުކަމުގެ ސަބަބުން ކުރިއަށް ހުރި ގިނަ ފިލްމުތައް އެޅުވުން ދަނީ ލަސްވަމުންނެވެ. މިގޮތުން އަނެއްކާވެސް އިތުރު ފިލްމެއް ރިލީޒްކުރުން މިހާރު ވަނީ ފަހަތަށް ޖައްސަން ޖެހިފައެވެ.
މި މަހުގެ 14 ވަނަ ދުވަހު ރިލީޒްކުރުމަށް މީގެކުރިން ތާވަލުކޮށްފައިވާ ފިލްމު "ރާދޭ ޝާމް" ރިލީޒްކުރުން މިހާރު ވަނީ ލަސްކޮށްފައެވެ.
ރާދާ ކްރިޝްނާ ކުމާރު ލިޔެ، ޑައިރެކްޓްކުރާ "ރާދޭ ޝާމް" ގައި "ބަހޫބާލީ" ގެ ތަރި ޕްރަބާސް އާއި ޕޫޖާ ހެގްޅޭ ލީޑްރޯލުން ފެންނާނެއެވެ. މި ފިލްމުގެ ޓްރެއިލަރ މިދިޔަ މަހު ދައްކާލާފައިވާއިރު ފިލްމުގެ ޕޯސްޓަރުވެސް މީގެކުރިން ވަނީ ދައްކާލާފައެވެ. ޕޯސްޓަރަށް ވަނީ ބޮޑު ތަރުޙީބެއްވެސް ލިބިފައެވެ.
ބުޝަން ކުމާރުގެ ޓީ ސީޒީރުން ވެސް ހިއްސާވާ މި ފިލްމު ހިންދީ ބަހުގެ އިތުރުން ތެލެގޫ، ތަމަޅަ އަދި މަލަޔާޅަމް ބަހުންވެސް ގެނެސްދޭނެއެވެ.
މި ފިލްމުގެ މަންޒަރުތައް އިންޑިއާގެ އިތުރުން އިޓަލީ އަދި ޖޯޖިއާގައިވެސް ވަނީ ނަގާފައެވެ. ފިލްމުގެ ކާސްޓުންގެ ގޮތުގައި ޕްރާބާސް އާއި ޕޫޖާގެ އިތުރުން ބަގިޔާޝްރީ އާއި ކުނާލް ރޯއި ކަޕޫރާއި ސަޗިން ޚެދްކަރް އަދި މުރާލީ ޝަރުމާ ފަދަ ތަރިން ހިމެނެ އެވެ.
"ރާދޭ ޝާމް" އަކީ 200 ކްރޯޑް ރުޕީސްގެ ބަޖެޓަކުން ހަދާ ރޮމޭންޓިކް ޑްރާމާއެކެވެ. ޕްރަބާސްގެ ކުރިއަށްހުރި ފިލްމުތަކުގެ ތެރޭގައި ދީޕިކާ ޕަދްކޯން އާއި އަމީތާބް ބައްޗަނާ އެކު ކުޅޭ އަދި ނަން އިއުލާންނުކުރާ ފިލްމަކާއި ސައިފް އަލީ ޚާނާ އެކު ފެނިގެންދާނެ "އަދިޕުރުޝް" ހިމެނެ އެވެ.