ކަލާސް ޓީވީން ދެން އެންމެ އަވަހަށް ފަށާ ޓީވީ ޝޯ "ސްޕައި ބަހޫ" ނެރޭޓްކުރާނީ ބޮލީވުޑް އެކްޓްރެސް ކަރީނާ ކަޕޫރުޚާނެވެ.
ކަލާސް އިން އެމީހުންގެ އިސްޓަގްރާމަށް ދޫކޮށްލާފައިވާ ޝޯގެ ޕްރޮމޯގައި ހުރިހާ ކެރެކްޓަތައް ތައާރަފްކުރަނީ ކަރީނާއެވެ. ޕްރޮމޯގައި ފުރަތަމަ ފެންނަނީވެސް ކަރީނާ ހިންދީ ބަހުން ވާހަކަދައްކާތަނެވެ.
"ސްޕައި ބަހޫ" އަކީ ޒުވާން ސްޕައި ސޭޖަލް އާއި ޓެރަރިސްޓެއް ކަމަށް ތުހުމަތު ކުރެވޭ ޔޯހަން އާއި ދެމެދު އުފެދޫ ލޯބީގެ ގުޅުން ދައްކާ ޝޯ އެކެވެ.
2000 ވަނަ އަހަރު ފިލްމު "ރެފިއުޖީ" އިން ހިންދީ ސިނަމާއަށް ނިކުތް ކަރީނާ ވަނީ ކާމިޔާބު ގިނަ ފިލްމުތަކެއް ބެލުންތެރިންނަށް ދޫކޮށްލާފައެވެ. "ކަބީ ޚުޝީ ކަބީޤަމް" ، "3 އިޑިއަޓްސް" ، "ގުޑް ނިއުސް" "ބަޖްރަންގީ ބައިޖާން" އަދި "ބޮޑީގާޑް" އަކީ ފާހަގަކޮށްލެވޭ ބައެއް ފިލްމުތަކެވެ.
އާމިރުޚާނާއިއެކު ކަރީނާ ދެން އެންމެ އަވަހަށް ފެންނާނީ މިއަހަރު ރިލީޒްކުރަން ހަމަޖެހިފައިވާ ފިލްމު "ލާލްސިންގް ޗައްޑާ" އިންނެވެ.