ދުނިޔޭގެ އެކި ހިސާބުތަކުގައި ބޭސްފަރުވާ ދިނުމަށް މަސައްކަތް ކުރާ މެޑިސިންސް ސެން ފްރަންޓިއަރސް އެމް.އެސް.އެފް އިން ޔަމަނުގެ އުތުރުގައި ހިންގާ ކްލިނަކަށް ދިން ހަމަލާއެއްގައި 5 މީހުން މަރުވެއްޖެއެވެ.މި ހަމަލާގައި އިތުރު 8 މީހަކު ޒަޚަމްވެފައިވާ ކަމަށް އެމް.އެސް.އެފްއިން މަޢުލޫމާތުދެއެވެ. މިހަމަލާގައި މަރުވި މީހުންގެ ތެރެއިން 2 މީހުންނަކީ ކްލިނިކްގައި މަސައްކަތް ކުރަމުން ދިޔަ 2 މީހުން ކަމަށް ވެސް އެޖަމާޢަތުން ހާމަކުރިއެވެ. ވަރުގަދަ ދާޚިލީ ހަނގުރާމައެއް ހިނގަމުންދާ ޔަމަނުގައި ހުންނަ އެމް.އެސް.އެފްގެ މި ކްލިނަކަށް ހަމަލާ ދީފައިވަނީ ކޮން ފަރާތަކުން ކަން އެޖަމާޢަތަކުން ހާމައެއް ނުކުރެއެވެ.މިއީ ފައިތުވި 3 މަސްދުވަހުގެ ތެރޭގައި ސިއްޙީ ފަރުވާ ދޭ އިމާރާތަކަށް ހަމަލާތައް އަމާޒުވި 3 ވަނަ ހަމަލާއެވެ.ޔަމަނުގައި ހިނގަމުންދާ ދާޚިލީ ހަނގުރާމައިގައި ސަރަހައްދީ ބާރުތަކުން ގުޅިގެން އެކުލަވާލާފައިވާ އިއްތިހާދުން ގެންދަނީ ވަރުގަދަ ވައިގެ ހަމަލާތައް ޔަމަނުގެ ސަރަހައްދުތަކަށް ދެމުންނެވެ.